Read Angami Naga Mathi 16 Bible Online

Mathi 16 - Angami Naga bible

Mathi 16

¹Farisiko mu Sadukiko Jisu bu teigeinu zasi puo chüpie uko kienu di vor puo medophita.

²Sirei puo uko ki, “Thevatie ler tse nieko sie, ‘Tei vituoü bate, kekreilamonyü tei merie zhaketa la’ siya.

³Siro khise gei nieko sie, ‘Thie teirütuoü bate, kekreilamonyü tei merie mu zeide-i zhaketa la’ isiya. Nieko tei zie meho di tei kevikesuo si kekreilieya, derei nieko puotei zasiko we silie kenjü.

⁴Kerüzhü mu pieü themia hako zasi pfhüya, derei Jona geinu chüshüwaketa zasiu sie zasi kekrei puorei kha sashülie lhote” sita. Sidi puo uko khawa di tuota.

⁵Siro pethakelieko dzükezha cie kekreitsa khie vota, mu uko niekhrüda pfülie rükra mota.

⁶Sitse Jisu sie uko ki, “Nieko menuoliecie, Farisiko mu Sadukiko khreiu la nieko kirei tuolie” sita.

⁷Sitse uko thuo kerüchü di sie, “Haha, úko niekhrüda pfülie rükra moketa la zo” sita.

⁸Derei Jisu süu silie di sie uko ki, “Kepele ketsako, kiüdi nie thuo nie donu niekhrüda pfülie moketa kepuya ga?

⁹Nieko tsierei puoca silie mo me? Niekhrüda pengou pie themia nyie pengou va chülie di nieko bu merha kitsuo pfhü lalie ga?

¹⁰Morei niekhrüda thenie pie themia nyie dia va chülie di nieko bu merha kitsuo pfhülie shicü nieko rükra mote me?

¹¹Kiüdi nieko a niekhrüda kemo puo dze pu keba cau silie mo ga? Nieko Farisiko mu Sadukiko khreiu kitsa nie kireiliecie!” sita.

¹²Süze uko puo uko bu niekhrüda khreiutsatie monyü Farisiko mu Sadukiko dietsatie u kireinushü ücü lelie.

¹³Süsie Jisu Kaisaria Filipi rüna nu vorlie tse, puoe sie pethakelieko ki, “Mia Themia Nuou üse supuo üya ga?” idi ketso.

¹⁴Sitse uko sie, “Huomia pucü Johan mia baptaiz chükezhau üya, kekreiko pucü Elija mu huomia Jeremia morei siedzekesiko mia puo üya” sishü.

¹⁵Di siro “Nieko a üse supuo üya ga?” idi ketso.

¹⁶Simon Pitor sie, “No Khristau, rheituoyakezha Ukepenuopfü Nuou zo” sita.

¹⁷Sitse Jisu sie, “Jona nuou Simon, no thejakepfütho zo, uchü uzie nunu monyü, teigei keba a Puou thuo pie n pesipengushü zokecü la.

¹⁸Süla harie, no Pitor[23], a ketsie hau geinu a kehou chütuo; siro Hades kharuko puo penyülie lho.

¹⁹A teigei cabiko pie n tsütuo; tsiu no kijü nu khakecüko teigei rei khatuo mu mha kehoupuorei kijü nu khrüshü ro teigei rei khrüshü zotuo” sita.

²⁰Süsie puoe pethakelieko bu puo Khristau zoükecü se mia puo ki rei pu hienuwa.

²¹Süyawinu Jisu Jerusalem nu vo di pehüko mu phichükezhako mu thezho kepethako dzie nunu kemezhie phiketuo mu mia bu puo dukhriwa di zha se nhie rheilasielie morosuo ükecü pupie pethakelieko kie tuota.

²²Sitse Pitor puo ze mharapuo vo puo kekha di sie, “Niepu-u, kenyüthor! Mhakipuorei n bu silie lho zo” sita.

²³Sitse Jisu reipra Pitor ki, “A sietsa votalie, Satan! No a chakha puo zo, kekreilamonyü no Ukepenuopfü medoko le monyü themia medoko leyakezha zocü la” sita.

²⁴Süsie Jisu pethakelieko ki, “Kehoupuorei a siemedzi kenyümia sümia bu u thuo u meliewa, mu u krus pielie, di a siemedziliecie.

²⁵Kekreilamonyü kehoupuorei u thuo u phou pekru nyükezhamia süu pejüwatuo; derei kehoupuorei a la puo phou pejükeshüu süu ngu lalietuo.

²⁶Siro miapuonie kijü pete peviepie puo vie chülie ürei puo phou pekapejüwa ro kedipuo pralietuo ga? morei mia puo kedipuo pie puo phousou chülie vi ga?

²⁷“Kekreilamonyü Themia Nuou puo Puou zayie se di puo dielieko ze tsurtuo, mu puo mia puopuo mhatho kheki sü chü zhakhra chüshütuo.

²⁸A nieko ki pu toushütuo, haki ketha themia huo Themia Nuou kedi chü vor kemochie sialie lho” sita.