Read Angami Naga Mathi 17 Bible Online

Mathi 17 - Angami Naga bible

Mathi 17

¹Zha sorou sie, Jisu Pitor mu Jakob mu puo siezeu Johan uko zelie di krei kijüthou kerükrie puo gei vota.

²Siro uko kengu kinu puo rhi kreita, sidi puo zie niaki kezie tuoi mu puo pfhenei kra pouita.

³Süsie ukoe Mosa mu Elija unie-e puo ze kerüchü ketha ngulie.

⁴Sitse Pitor sie Jisu ki, “Niepu-u, úko keze haki bata ro vituolie; n medotuo üro, a pru[24] se chüshütuo, puo n la, puo Mosa la mu puo Elija la” sita.

⁵Siro puo die pu thaluocü nu, kimhou zie kruoikecü puo shü mhai vor uko zepfülieta, tsiu kimhou geinu mhapfhe puo, “Hauha a Nuo a Khrieu zo, a puo ngu a neithoyakezhau, nieko puo die rünyüliecie” isi vor.

⁶Siro pethakelieko hau sikeshü ki, michie phita di tsu zerepfü zhüta.

⁷Derei Jisu phir uko bie di sie, “Sielie mu michieta hie” sishü.

⁸Sidi uko mehosie ru Jisu rübei sie miapuorei ngu mota.

⁹Siro uko kijüthou geinu la kerzhü tse, Jisu sie uko ki, “Themia Nuou kesia nunu rheilasielie kemochie nieko kengu hau dze pie mia puo kirei pu hiecie” sita.

¹⁰Sitse pethakelieko sie, “Kiüdi thezho pethayakezhako Elija bu vor rietuoücü puya mu?” idi ketso.

¹¹Sitse puo la sie “Elija vor di mha peteko chü pevi la zotuo ketho,

¹²derei a nieko ki pushütuo, Elija vorwate, mu uko puo silie mota, di uko puo gei uneiunyü chüwate. Süla Themia Nuou rei uko dzienu kemezhiekecü seüdzütuo” sita.

¹³Süze puo Johan mia baptaiz chükezhau dze uko ki pukecü pethakelieko rei lelie.

¹⁴Süsie uko themia kro nu vorlie tse, mia puo vor puo mhodzünu khoutou zolie,

¹⁵di sie, “Niepu-u no a nuoyo ngumezhieshü zocie, kekreilamonyü puo terhuovüzie di kemezhie phi tuote; mu puo tsiemelie te mi morei dzü nu le tatate.

¹⁶Siro a puo ze n siedziko ki vor, derei uko puo chü pevilie mote,” sita.

¹⁷Sitse Jisu sie, “Harie, kepele kejü mu ziezhü kemo phouu, a bu kichiepuo nieko ze batieya mu? A bu nieko gei kichiepuo a kethe ba zotuo ga? Puo ze haki vorcie!” sita.

¹⁸Sidi Jisu terhuokesuou kechüshü, sitse süu unuoyo geinu prata, mu nuo süyo sütei touki shürholieta.

¹⁹Süsie pethakelieko thuo krei puo ki vor di sie, “Kiüdi hieko terhuokesuou whuolie lhota ga?” idi ketso.

²⁰Sitse puo sie, “Nieko kepele ketsa la zo. Kekreilamonyü a nieko ki pu toushütuo, mhanuü nieko kepele gakrieshü de yopuorei bakecü sie nieko kijüthou hau ki, ‘No haki nu rüdi lutsa votacie,’ isishü rei süu rüditatuo, mu nieko mha kehoupuorei chülie kelho jü” sita.

²¹(Derei mha hako kecha mu kemevo geinu zokemosie mha kekreipuo geinu rei chülie lho.)

²²Süsie uko Galil nu vor kengulieta tse, Jisu sie uko ki, “Themia Nuou tepie mia dzie nu shüwatuoü bate,

²³mu uko puo dukhriwatuo, derei puo zha se nhie rheilasielietuo,” sishü. Sitse uko nou suo phita.

²⁴Siro uko Kapernaum nu vorlie tse, rüsuoki khruo khruoyakezhako[25] Pitor ki vor di sie, “Nieko kepethau kerüsuoki khruo khruoshüya mo me?” idi ketsota.

²⁵Sitse puo sie, “U, khruoya” sishü. Siro puo kinu vorlie tse, Jisu puo rüchü di sie, “Simon, n nou kele kimhie ga? Kijü hau nu kediko suomia kinu mha kepfüzha morei khezhanuo lieya ga? U thuo u nuonuoko kinu mo kekreimia kinu ga?” sidi ketso.

²⁶Sitse Pitor sie, “Kekreimia kinu we” sishü, sitse Jisu puo ki, “Siüro puo nuonuoko we mha khashü morei vi.

²⁷Derei úko themia hako neikemo chüwa kelho la no dzükezha nu tsu di khuoshüwi pie khuo shücie; sidi khuo shülie kerietho-u me ciegashü ro raka puo[26] ngulietuo; no süu se vo a la mu n la khashüwacie” sita.