Read Angami Naga Mathi 18 Bible Online

Mathi 18 - Angami Naga bible

Mathi 18

¹Sükisü pethakelieko Jisu ki vor di sie, “Teigei kedi nu suomia üse kezhathotuo ga?” sidi ketso.

²Süla puo nhicunuomia yopuo kielie di puo bu uko donu balie.

³Sidi sie, “A nieko ki pu toushütuo, nieko rüdilie di nhicunuomia kemhielie kemosie nie mhakipuorei teigei kedi nu lelie kenjü zo.

⁴Kehoupuorei puo chü kerünuopie nhicunuomia hayo mhiekelieu teigei kedi nu kezhatho-uwe.

⁵Siro kehoupuorei a za nunu nhicumia hikecü yopuorei zeliekezhamia a zelieya.

⁶“Nie kehoupuorei a pelekezha kecü hako donu mia yopuorei chü pesuokeshümia, mha kegetsie kezha puo pie nie vo gei goushü di dzükezha kesou nunu pelheikhrikewa we nie dze vikuotuo.

⁷Mha chü kepesuoko la kijüu we ce, chülietie! Mhachü kepesuoko vor molie lho zo; derei puo la mha chükepesuo bu kevor-u we ce chülietie!

⁸“Siro n dzie morei n phi n chü pesuo liro, n geinu süu da kelhouwaliecie; n dzie kenie mu n phi kenie pfü di mia bu n kelhoupie kechachie keba mi nu shükewa ki n bou lalhi morei n phi lalhi di kerhei nu kele we n dze vikuotuo.

⁹Siro n mhi n chü pesuoya liro, n geinu süu kerülapie kelhouwacie; n mhi kenie pfü di mia bu n kelhoupie mizie nu shükewa ki rei mhi puo rübei pfü di kerhei nu kele we n dze vikuotuo.

¹⁰“Nieko kecü hako mia yopuo rei pese molieketuo le terü zoliecie; kekreilamonyü, a nieko ki pushütuo, teigei uko dielieko teigei kebau a Puou zie meho sei baya.

¹¹Kekreilamonyü themia Nuou jüketamia kelalietuo üdi vor zokecü la.

¹²Nieko kedipuo leya ga? mhanuü mia puo tekuo krie puo ba di süko donu puo yotuota ro, puo kekrei hiethepfüethepfüko pie kijüthou gei tha di vo jüketayo pfhü lhoü me?

¹³Siro a nieko ki pu toushütuo, puo süu ngulie ro, jüta kemo hiethepfüethepfüko kirei süyo la puo neikuotaya.

¹⁴Süsütuoi teigei keba nieko Puou rei kecü hako donu puorei bu jüketa puo medo mo.

¹⁵“Siro n siezedzürie mia puo n gei kejo chü liro, vo di nnie rübei zokecü kinu puo kejo pu puo kiecie. Puo n die rünyülie liro, no puo nguliete.

¹⁶Derei puo n die rünyü mvüta ro, no mia puo morei kenie ze sa vocie, mia keniekese tie se zhapu chü liro die kehoupuorei mvü kemeteilietuo.

¹⁷Siro puo süko die rei rünyü mvüta ro pie kehou-u ki pucie; sidi puo kehou die rei rünyü mvüta ro, puo bu Judakemomia mu thesokeliemia mhietacie.

¹⁸A nieko ki pu toushütuo, nie kijü nu mha kehoupuorei kha liro teigei rei kha zotuo, mu nieko kijü nu mha kehoupuorei khrükeshüu teigei rei khrüshü zotuo.

¹⁹Siro a nieko ki pu sashütuo, nieko mia kenie kenourhe di mha kehoupuorei cha ro, teigei keba a Puou thuo mha süu chüshü nie tsü zotuo.

²⁰Kekreilamonyü mia keniekese a za nu vo kehoukengukezhara a süko donu ba zotuokecü la” sishü.

²¹Sitse Pitor puo ki vor di, “Niepu-u, mhanuü a siezeu a gei kephouma puo chüwa ro, a bu va kitsuo vapie puo tsütuo ga? Va thenietuo me?” idi ketso.

²²Sitse Jisu puo ki, “Va thenie icüu mo, derei va hiethenie cü thenie reicie.

²³“Süla teigei kedi-e kedimia puo puo kituomia puo vie se kebako ze mha süko kela mehotuoü kesie ze kemhie zo.

²⁴Siro puo le kesie ki, mia puo talent nyie ker puo pu pfüzhüketa puo ze puo ki vor;

²⁵mu puo thepu su hulie kenjüketa la puo niepue sie puo mu puo kimia mu puo nuonuoko, tsiu puo vie pete zepie puo suwanuta.

²⁶Süla kituo süu tsu puo mhodzünu khoutoupfülie di sie, ‘No a pfhe zashücie, sitse a n pu chü tseishütuolie’ idi puo mezhiemelota.

²⁷Sitse kituo süu niepu-u puo ngumezhieta di puo khashüwa, mu thepuko rei vashü puo tsüwa.

²⁸Sirei kituo süu pra di puo dziese kituo kekrei puo denari[27] krie puo puo pu pfükezhü puo ze keselie tse puo mezha kenyie pielie di sie, ‘No a pu pfüketuoko chüshücie’ sita.

²⁹Sitse kituo kekreiu tsu zhülie di sie, ‘No a pfhe zashücie; a n pu chü lashütuolie’ idi puo mezhiemelota.

³⁰Derei puo mvüta, sidi puo pu chüshü kemochie puo te ze vo kedieki nu shüpie ba tso.

³¹Siro kituo kekreiko mha süu ngu di uko nou suo phita, sidi vor uko niepu-u ki mha süko pete pushü.

³²Süsie kediue puo kituo süu kie lalie di sie puo ki, “No kerüzhü kituou! No a ki n mezhiemeloketa la no a pupfü kezhü pete vapie n tsüwate.

³³A n ngumezhiekeshü tuoi no rei n zemia ngumezhieshü zhü mo me?’

³⁴Sidi puo niepu-u puo nou kemeyiepfü puo bu thepu pfükezhü pete chü tseishü kemochie puo pechüwanu di pie mia dzienu shüwa.

³⁵Süsütuoi nieko kehoupuorei nie nou nu nie siezemia kejo vapie tsülie kemosie, teigei keba u Puou rei nieko gei sükemhie chü zotuo” sita.