Read Angami Naga Mathi 19 Bible Online

Mathi 19 - Angami Naga bible

Mathi 19

¹Siro Jisu mha hako pu tseiwa tse, Galil nunu tuo Jordan rükhie Judia kijü nu vota.

²Siro mia krodi puo siemedzi vota mu puo süko chü pevishü.

³Süki Farisiko huomia vor puo kedo di sie, “Mia puoe mha huo la puo kimia khawalie vi me?” idi ketsota.

⁴Sitse puo sie, “Sietsenu unie chükeshüu ‘Puo thenumia mu thepfumia chüshü,’ ükecü dze phrü mo zo me?

⁵Sidi sie, ‘Haha la themiau puo puo mu puo zuo khawa di puo kimia ze puo chütatuo, mu unie keze chü puo chütatuo.’

⁶Süla unie kenie monyü chü puota zo. Süla Ukepenuopfü chü kesakeshüu themia bu chükhowa hiecie” sishü.

⁷Sitse uko sie puo ki, “Siro kiüdi Mosa hie bu hie kimianuo khakewa leshü thushü di puo khawalie kevi hie ki diekhashü ga?” sita.

⁸Sitse puo uko ki, “Mosa nie bu nie kimianuo vawalie kevi khakeshü kekreilamonyü nie nou kere la zo, derei sietsenu zowe sishü mo.

⁹Süla a nieko ki pu toushütuo, kehoupuorei pieü la zo kemosie puo kimia khawa di kekrei lie la ro puo pieü chüta zo” sishü.

¹⁰Sitse puoe pethakelieko sie puo ki, “Mia puo puo nupfünuo gei si liro, kiya kemo we vikuo” sita.

¹¹Derei puo uko ki, “Die hau themia pete ze zolie kenjü, derei kekuo kha u tsükeshümia la rübei zo.

¹²Kekreilamonyü mia huomia u zuo va nu ketuo nunu inukmia chü, mu huomia kekreimia bu u chüpie dzücümia chüwa, mu huomia teigei kedi la u thuo u pepi di inukmia chü. Themia kehoupuorei die süu zelie keviu bu zeliecie” sita.

¹³Süsie mia puo bu puo dzie chapie uko geishü mu kechachüshünu di nhicuko ze puo ki vor. Sirei pethakelieko süko kerhieta,

¹⁴derei Jisu sie, “Nhicunuoko bu a ki vorlie, uko kha hiecie, kekreilamonyü teigei kedi haicüko vie zokecü la,” sita.

¹⁵Sidi puo puo dzie yhapie uko gei shüshü di sünu nu tuo lata.

¹⁶Siro mia puo Jisu ki vor di sie, “Kepethau, a kechachie kerhei ngulieketuo la mha kevi kikecü puo chü morosuo ga?” idi ketso.

¹⁷Sitse Jisu sie puo ki, “No kiüdi a ki mha keviu dze ketsoya ga? Keviu sü mia puo rübei zo. No kerhei nu le nyü liro, diekhakeshüko zeliecie” sishü.

¹⁸Sitse süu puo üse, “Kiko ga?” sita. Sitse Jisue sie, “No mia dukhri lho, No pieü chü lho; No rügu lho; No mia gei ketijü zhapu chü lho.

¹⁹N puo n zuo rhulie, tsiu n siezanuomia khriepie n thuo n kekhrie mhielie, isi pie kezhüko zo” sishü.

²⁰Sitse khriesau sie puo üse, “A mha süko ze phre tuote;[28] a mha kikecüpuo tso moluo ga?” sita.

²¹Jisu sie puo üse “No vi tseilie nyü ro, vo di n vie ketuoko zelie di khapie mhakejüko tsüwalie, siliero teigei n kinyi nyilietuo, sidi vor a siemedzilie” sishü.

²²Derei khriesau die süu sishü tse puo nou suosiei di tuota; kekreilamonyü puo mhanyi phikecü la.

²³Sitse Jisu sie puoe pethakelieko ki, “A nieko ki pu toushütuo, kenyimia puo bu teigei kedi nu leketuo chülie re phi zotuo.

²⁴A nieko ki pu sashütuo, kenyimia puo bu Ukepenuopfü kedi nu leketuou kirei ut puo bu thepre mei nu kepra we rüükuotuo” sita.

²⁵Sitse pethakelieko die hau sikeshü ki u ngo phi di sie, “Di siro supuonie kelalie vi ta?” ita.

²⁶Derei Jisu uko meho terü di sie, “Themia zo we süu chükelie jü, derei Ukepenuopfü la we mha pete chülie vi” sita.

²⁷Sitse Pitor puo die kela di sie, “Harie, hieko we mha pete khawa di n siemedzi tuote, süla hie kedipuo ngulie ta?” sita.

²⁸Sitse Jisu sie uko ki, “A nieko ki pu toushütuo, nieko a siemedzi tuoketako, mhachü kesa lakecüu va Themia Nuou puo kediba zapuzayie kechüu gei bakelie ki nieko rei kediba kerekenie gei ba di Israel seyie kerekenieko nyiekecütuo.

²⁹Themia kehoupuorei a za la u ki morei u siezedzürie morei u üpfünuo morei u puonuo morei u zuonuo morei u nuonuo morei u lieko khawaketau, süde thekrie kezie[29]ngulietuo, tsiu kechachie kerhei sa welietuo.

³⁰Derei rieketuoko kekra nuotatuo mu nuoketuoko kekra rietatuo.