Read Angami Naga Mathi 2 Bible Online

Mathi 2 - Angami Naga bible

Mathi 2

¹Herod kedi chü keba ki Judia kijü nu Bethlehem nu Jisu penuokelie ki, niathutsa nu mhakesimia[4] kro puo Jerusalem nu vor,

²di sie, “Judamia kediu penuo ze kebayo kirapuo ba ga? Kekreilamonyü hie niathutsa nu puo themvü ngu di puo kelutuoü vorzhüwe” ita.

³Siro süki kediu Herod hau sishü di puo nou kehoukeruo chüta, mu Jerusalem nu kebako rei puo ze u nou kemezhieta,

⁴sidi zievo kezhako mu themia donu mhakesithoko kie kengu phrelie di Khrista sü kirapuonu penuotuoü ba shicü ketso.

⁵Uko sie puo ki, “Judia kijü Bethlehem nunu tuo; kekreilamonyü siedzekesiu bu hai di thupiezhüwaketa la:

⁶‘Mu no, Juda kijü nu Bethlehem, no Juda kijü nu rüna kemeyieko donu kecütho-u mota zo; kekreilamonyü n geinu kedimia puo siertuo, puoe a themia Israelko kepfheu[5] chütuo.’ ”

⁷Sitse Herod pekhre mhakesi süko kielie di themvü süu parketa zha kitsuote shicü uko kinu si toulie.

⁸Süsie puo uko ketsepie Bethlehem nu shü di, “Nieko vo menuo di unuoyo pfhüliecie; sidi nieko puo ngulie ro dielie se a ki vorcie, a bu rei vo puo rüsuoketuo la” sishü.

⁹Siro uko kediu die silie di tuota; mu uko niathutsa nu ngukecü themvüu uko mhodzü rie vo unuoyo kebachüu tsolie di süu mho tou gei zhata.

¹⁰Siro ukoe themvüu süki thaketa ngutse uko neipie mhapuochüta.

¹¹Siro uko ki süu nu le ru, unuoyo puo zuo Maria ze ba di ngulie, siro uko khoutou tsu puo rüsuo; sitse uko u kinyidzeko phreilie di, suna, mharekethengu mu mharekethengu dzüpfü khapie puo tsüshü.

¹²Süsie uko bu Herod ki la vo moketuo la, uko mho geinu Ukepenuopfü medo silie di cha kekrei ze u thuo u ra vota.

¹³Siro uko tuoketa sie Josef mho geinu Niepu-u dieliemia puo vor di, “Sielie di unuoyo mu puo zuo ze Ijipt nu tsutalie; mu a n ki pushü kemochie no sünu ba zolie; kekreilamonyü Herod-e nuo cüyo dukhriwatuo üdi puo pfhütuo übate” sita.

¹⁴Sitse Josef sielie di unuoyo mu puo zuo ze pezei ta Ijipt nu tsuta,

¹⁵sidi Herod siata kemochie sünu bata. Mha hau chüketa thiedzü Niepuu siedzekesiu geinu, “A Ijipt nunu a nuo kieliewe” idi pupie kezhüu bu tseilieketuo la.

¹⁶Siro Herod-e mhakesiko puo sewaketa ngulie tse puo nou rüpepie mha puochüta, sidi puo mhakesiko kinu themvü kepar teiu sikelie medzi di mia ketsepie Bethlehem mu sükhiesümhou nhicunuomia cie kenie mu sükhroko pete dukhriwa.

¹⁷Hamhie di thiedzü Jeremia siedzekesiu geinu pupiekezhüu tseilie:

¹⁸“Rama nu kekra pfhe puo si vor, kra mu thekrü chü phi, Rachel bu puo nuonuoko krü krakra; puo nuonuoko tuo moketa la, puo nou luolie mvüta.”

¹⁹Siro Herod siaketa sie Niepu-u dieliemia puo Josef mho geinu puo pengu di sie,

²⁰“Sielie di unuoyo mu puo zuo zelie, di Israel kijü nu votalie, unuoyo dukhriwatuoü pfhüketuoko siatakecü la” si.

²¹Sitse Josef sielie di unuoyo mu puo zuo ze Israel kijü nu vorta.

²²Derei puo Arkelae puo puo Herod souchü di Judia nu kedi chü keba silie tse, puo sünu vo michieta. Mu puo mho geinu puo kireilie morokesuo sikelie sie tuo Galil kijü nu vota.

²³Sidi vo Nazaret ükecü rünau nu lhou, süla thiedzü siedzekesiko geinu, “Puo üse Nazaretmia ütuo” idi pupiekezhüu tseilie.