Read Angami Naga Mathi 20 Bible Online

Mathi 20 - Angami Naga bible

Mathi 20

¹“Teigei kedi-e lie niepumia puo mia bu puo khubelie nu mhachütuoü khiserüna vo mia zha khrükecü mhie zo.

²Süsie puo khunhie zhakhra[30] puopuo pie uko zha chüketuo kepfhekholieketa sie uko ketsepie puo lie nu shüwa.

³Sidi puo bavüdo thepfüu mese ki chazou la par ru puo mia kro puo lhithochü nu mhapuorei kechü jü di doupfü ketha ngulie,

⁴Sitse puo sie uko ki, “Nieko rei a khubelie nu tsucie, a nieko zha chüshü kezhüde chüshütuo,” sishü. Süla uko tsuta.

⁵Süsie puo khinhieluo mu keba se meseki pra di sükemhie chü la.

⁶Siro keba pengou mesetazhü tse puo la pra kekreimia kro puo süki rüge ketha ngulie, sitse puo sie süko ki, “Nieko kiüdi zhate mhachü mo di haki tha ga?” sishü.

⁷Sitse uko sie puo ki, “Miapuorei hie zhakhrü kemo lalie” sita. Ru puo sie uko ki, “Siüro, nieko rei khubelie nu tsucie” sishü.

⁸Siro thevatieta tse, khubelie niepu-u sie puo lie kemeho-u ki, “No mhakechümiako kieshü di kenuothoko zha chü rierie di vo keriethoko ketso zha chüpie tsüwacie” sishü.

⁹Sitse bavüdo pengou mesekinu u zhakhrükelieko vor di mia puo khunhie zhakhra puopuo ngulie.

¹⁰Siro uko tsu rieketako uko zha lietuoü kevor ki uko zha chü pekrashütuo nhiecü le di vor; derei uko rei mia puo khunhie zhakhra puopuo ngukelie zo.

¹¹Siro ukoe u zha ngukelie ki vor uko niepu-u ki panyata.

¹²Sidi sie, “Kenuo hako bavüdo puo zie mhachü mo, mu süko bu hie zhate teile perhiepfü kemezhie di mhachükecüko ze ketoute” sita.

¹³Derei puo sie süko mia puo ki, “A zeu, a nieko kedowa mo; no rei khunhie puo zhakhra puotuoü avu kepfhekholie mo me?

¹⁴N zhau pielie di tuotalie; a pie n ketsü de pie kenuo hau rei tsüketuo a medo zo.

¹⁵A thuo a vie pie a medo chükecü puotou zo mo me? A mephruomevuokecü la a ngupie n mhikeluya me?[31]

¹⁶Sükemhie kenuomia rietatuo, mu keriemia nuotatuo” sita.

¹⁷Siro Jisu Jerusalem nu khokezhü ki pethakelie kerekenieko ze krei tuo di puo chala nu uko ki,

¹⁸“Harie, úko Jerusalem nu khotuoüzhie, mu sünu mia Themia Nuou tepie phichükezhako mu thezho kepethako dzie nu shüwatuo. Siro uko puo pejo di puo pesiawatuo;

¹⁹Siro puo khapie Judakemoko dzie nu shüwa di süko bu puo pie kethekre, puo vü mu puo gouwatuo; mu zha se nhie puo kesia nunu rheilasielietuo” sishü.

²⁰Süki Zebedi nuonie zuopfü puo nuonie ze puo ki vor di puo mhodzünu khoutou tsu di puo ki puo mezhiemelota.

²¹Sitse puo sie süpfü ki, “No kedipuo mengu ga?” sishü. Süpfü sie puo ki, “No n kedi nu a nuo hanie mia puo bu n zatsa mu mia puo bu n vitsa balieketuo n die khashücie” sita.

²²Derei Jisu sie, “Nieko chaketuou si di chatuo mote. Nnie a krietuoü keba hieu krielie vi me?”[32] sidi ketso. Sitse unie puo ki, “Hienie chülie vi zo” sita.

²³Ru puo sie, “Nnie a hieu krie zotuo ketho, derei mia puo bu a zatsa mu mia puo bu a vitsa baketuo we a khashülie kenjü, derei süu we a Puou thuo kese setuoketamia vie zo” sishü.

²⁴Siro mia kerko die süu sishü tse, ukoe siezedzürie hanie gei u nei mota.

²⁵Derei Jisu uko kielie di uko ki, “Pelekemoko we kezhako bu u kekhaya, mu uko kekuoko bu uko mho diyakecü nieko si batuo.

²⁶Nieko donu we silie lho, sirei nieko donu kehoupuorei zha kenyümia nieko lie chü morosuo,

²⁷mu kehoupuorei nieko donu rie kenyümia bu nieko kituo chü morosuo.

²⁸Süsütuoi Themia Nuou rei mia bu puo theketuoü di monyü mia theketuoü tsiu themia kekra rhalieketuo la puo phou khashütuoü kevor zo” sita.

²⁹Süsie uko Jeriko nunu tuotazhü tse, mia krodi puo siemedzita.

³⁰Süki mhiciemia kenie cha khieki ba. Unie-e Jisu vozhü ükecü silie tse shiekhoui di sie, “Niepu-u, David Nuou, hienie ngumezhieshücie” sita.

³¹Sitse themia kro-u unie bu kemekrie batanu di unie kechüta, derei unie shie kechü sa di, “Niepu-u, David Nuou, no hienie ngumezhieshü zocie” si ba zota.

³²Süki Jisu tseseipfü thata di unie kieshü di sie, “A bu nnie gei kedipuo chüshü nyüya ga?” sishü.

³³Sitse unie sie, “Niepu-u, hienie mhi bu mhangulieyi,” sita.

³⁴Süla Jisu unie ngumezhie di unie mhi bie phreshü. Sitsemetha unie mhi mhangulieta, unie puo siemedzita.