Read Angami Naga Mathi 21 Bible Online

Mathi 21 - Angami Naga bible

Mathi 21

¹Siro Jisu mu pethakelieko Jerusalem kepenuo ki Oliv kijüthou gei Betfage nu vorlie; mu Jisue pethakeliemia kenie ketseshü,

²Sidi sie unie ki, “Nnie tuose rüna nnie petsou kebau nu volie, sitse nnie gadapfü puo puo nuo sa di khepie ketha ngulietuo ho; sünie phreilie di ze a ki vorliecie.

³Siro huomia nnie ki mha huo pu ro, ‘Niepu-u hanie se morosuoyalie’ sicie. Sitse puo sünie kha mhashütuo ho” ishü.

⁴Süsü thiedzü siedzekesiu bu pupiekezhü,

⁵“Nieko Zion nuopfü ki pushücie, Harie, n kediu n ki vorzhü ho, puo zho vi mu gadapfünuo yopuo geinu, gadanuo yopuo, gadanuopfü geinu,” ikecü dieu tseilieketuo la.

⁶Süla pethakelienie vo di Jisu unie ki pukeshü kemhie chülie;

⁷sidi unie gada krüpfü mu puo nuoyo ze vorlie, sidi pfhe pie sünie gei khrashü, sitse puo sie sügei balie.

⁸Süki krodiu mu themia pete khre u pfhe rhuopie cha nu khrashü mu kekreiko seico rhopie chakhrata.

⁹Siro themia krodiu puo mhodzütsa mu puo sietsa ketuoko shie di sie, “David Nuou, Hosana! Niepu u za se vorkezhüu thejakepfütho! Tei pesotho gei rei, Hosana!” isi tuota.

¹⁰Siro Jisu Jerusalem nu lerlie tse, nadiu pete bouübita di sie, “Hau supuo ga?” idi ketsota.

¹¹Sitse themia krodiko sie, “Hauha Galil kijü nu Nazaretmia siedzekesiu Jisu zo” sita.

¹²Süsie Jisu tuo Ukepenuopfü rüsuokiu nu vo di mia mha khrü mha ze kebako pete whuowa, tsiu shükeiraka keli kebako mizhü mu paruonuo ze kebako ba pete phou pelawa;

¹³Sidi puo sie uko ki, “A ki üse kechaki ütuo, idi thupiezhü zo, derei nieko hau üse mia vie sekecüko ki chü bate;” sita.

¹⁴Süki mhicieko mu kerünyieko rüsuoki nu zo puo ki vor ru puo süko chü keshürhoshü.

¹⁵Derei phichükezhako mu thezho kepethako puoe chükeshü ungomhathoko mu rüsuoki nu nhicunuoko shiekhoui di, “David nuou, Hosana!” isi keba sishü di uko nei mota,

¹⁶Sidi sie puo ki, “Uko kedipuo pu tha shi no si mo?” sita. Sitse Jisu sie uko ki, “U; nieko ‘Nhicunuoko mu nuoranuoko tie nunu rei n ketshe chü tseiliete’ ikecü thupiekezhü phrü mo zo me?” sita.

¹⁷Sidi puo uko khawa di rüna nadi sünunu tuo Bethani nu vota, di süzhü sünu zhüta.

¹⁸Siro khise puo nadi sünu la vorzhü ru, puo va merüta.

¹⁹Sitse cha khieki chiedebo puo keba ngulie di puo tuo süu penuo phi, mu süu puonyü sie mhapuorei keba ngulie mo. Sitse puo sie süu ki, “N geinu n si puorei vü sa hietacie!”. Sishü mumetha chiedebo-u rüwita.

²⁰Siro pethakelieko hau ngushü di uko ngo di sie, “Kimhie di chiedebo-u rüwi mhata ga?” sita.

²¹Sitse Jisu sie, “A nieko ki pu toushütuo, nieko pelelie mu kenoudota mo ro, chiedebo-u gei rübei monyü nieko kijüthou hau ki, ‘No hanu nu rülou dzükezha nu letacie,’ ishü rei süu chülietuo.

²²Nieko pelekhru di mha kehoupuorei cha ro ngulie zotuo” sita.

²³Siro Jisu rüsuoki nu le di mia petha ketha ki phichükezhako mu pehüko puo ki vor di sie, “Kedipuo kekuo se no mha hako chüya, mu supuonie kekuo hau pie n tsü ga?” idi ketso.

²⁴Sitse puo uko die kela di sie, “A rei nieko ki mha puo ketsotuo, mu nieko süu kelashü ro, a rei nieko ki a kedipuo kekuo se mha hako chüya shikecü pushütuo.

²⁵Johan mia baptaiz chükezhau kirapuo nu vor ga? teigei nu mo themia kinu vor ga?” sidi ketso. Sitse uko thuo uko donu kepu di sie, “Mhanuü we ‘Teigei nu zo’ ishü ro, puoe sie, ‘Siüro nieko kiüdi puo pelelie mo ga?’ itatie.

²⁶Siro úkoe, ‘Themia kinu zo,’ ishütuoü mu we themiako prei; kekreilamonyü mia pete rei Johan üse siedzekesimia puo ükecü pele tuoketa la” sita.

²⁷Süla uko Jisu die kela di, “Hieko si mowe” sishü. Sitse Jisu uko ki, “A rei kedipuo kekuo se mha hako chü tuo shikecü pie nieko ki pulie lho” sita.

²⁸“Siro nie kedipuo le ga? mia puo puo nuo kenie nyi; puo nuorieu ki vo di, ‘A nuo, no thie tsu a khubelie nu mhachücie’ sishü.

²⁹Sitse puo sie, ‘A tsu lho’ sita, derei süsienu puo nou rüdi lalie di tsuta.

³⁰Süsie puo puo nuo nhicu-u ki vo di sükemhie pu lashü. Sitse puo sie, ‘A tsutuo, apuo’ ishü, derei puo tsu mota.

³¹Ki-a, sünie kiu puo puo nei chülie ga?” Sitse uko sie “Phichüu zo” sita. Süla Jisu sie uko ki, “A nieko ki pu toushütuo, khezhanuo kekhruoko mu thethenuko nieko mhodzü rie Ukepenuopfü kedi nu letazhie.

³²Kekreilamonyü Johan kemiatho cha ze nieko ki vor, derei nieko puo pele mvüte; sirei khezhanuo kekhruoko mu thethenuko we puo pelelie mu nieko we süsü ngukewa sie zorei, nie nou rüdilie di puo pelelie moketa la.

³³“Dievi kekrei puo rünyüshücie. Thiedzü lie niepumia puo puo khube lietsa puo cielie, sidi ca khapie houlie, siro khube zutse chülie mu lieu pfheketuo la shadze chülie. Süsie puo khube lietsau pie lieciemia kro puo penyiewa di rüve rüna kekrei puo nu vota.

³⁴Siro lieyie tei vor tse, puo mhatho siko pfhü kenguketuo la puo kituomia kro puo ketsepie liecie süko ki shü.

³⁵Derei lie nyie kebako puo kituoko telie di mia puo vüwa, kekrei puo dukhriwa mu ketsiepie mia puo vawa.

³⁶Süsie puo kituo kerieko kirei krakuokecü ketse lashü tse, süko gei rei sükemhie chü lata.

³⁷Thelatho-u va puo sie, ‘Uko a nuou we rhulietuo’ idi puo ketsepie uko kishü.

³⁸Derei lie nyie kebako nuo süu ngushü tse, uko thuo kerüchü di sie, ‘Hau kayieute, uko puo telie mu puo dukhriwa di puo kayieko kezalietuo khe’ sita.

³⁹Süla uko puo te ze khubelieu nhaphie pra di puo dukhriwa.

⁴⁰Siro khubelie niepu-u vor tse, puo lie nyiekezhako gei kedipuo chütuo ga?” sita.

⁴¹Sitse uko puo ki, “Puo themia kerüzhü süko pekaperuowatuo, sidi khubelie süu pie lieciemia kekrei lieyie teiki puo mhatho si bu rüchüshü puo tsülie kevi kro puo tsüwatuo” sita.

⁴²Sitse Jisu sie uko ki, “Nieko thiedzü Ketholeshü nu: ‘Kikechükoe khawaketa tsieu puo ke nu tsieu[33] chüte, süusü Niepu-u thuo chüshü zo, tsiu süu kengu ki u ngo zo’ isi pie ketuoko phrüya mo zo me?

⁴³Süla a nieko ki pushütuo, nieko kinu Ukepenuopfü kedi chü setatuo, sidi pie u si rüchüshüketuo seyie puo tsüwatuo[34] sita.

⁴⁴Siro themia kehoupuorei ketsie süu gei teketsu-u kesetshie phawatuo; tsiu süu te kehoupuo gei rei tsu ro, süu kese tshiepie nyophe chüwatuo.”

⁴⁵Siro phichükezhako mu Farisiko puo dieviko sishü di puo uko dze pu keba silieta.

⁴⁶Süla uko puo telie nyüta, derei uko themia krodiu preita, süko puo üse siedzekesimia puo üdi le tuoketa la.