Read Angami Naga Mathi 22 Bible Online

Mathi 22 - Angami Naga bible

Mathi 22

¹Süsie Jisu dieviko pie themiako ki pu la di sie,

²“Teigei kedi-e kedimia puo puo nuou la nuyie he puo kesekelie mhie zo.

³Siro puoe puo kituoko ketsepie theheu nu vornu di kiepie kebako kie, derei süko vor nyü mota.

⁴Süsie puo kituo kekreiko ketse la di sie, ‘Kiepie kebako ki hakemhie pushülie; a theheu kesepie bate, a thudo mu a ri puo phou kevithoko bieliete; mha peteko kesepie bate; nuyie heu nu vorcie’ sishü.

⁵Derei uko die süu le kemedza di u mhathoko nu vo phreta, mia puo puo lie nu tsuta, kekrei puo lhithotsa vota.

⁶siro kekreiko kituoko telie di süko vü, mu süko dukhriwa.

⁷Sitse kediu puo nou meyie phita. Süla puo puo rüpfhünuoko ketsepie mia kedukhri süko dukhriwa mu uko nadiu thewa.

⁸Süsie puo kituoko ki, ‘Nuyie he kesepie bate, derei kiepie kebako vorlie sü mote.

⁹Süla nieko chapfüchaüko nu vo di themia ngukelie khe kiepie thehe nu vorliecie’ sishü.

¹⁰Süla kituoko chapfüchaüko nu vo themia ngukelie khe, kevi rei kesuo rei, ze vor kengulie; sidi u phreimia bu vor nuyie kiu ketshu chülie.

¹¹“Derei kediu puo phreiko mehotuoü le ru, mia puo nuyie nu kehie pfhenei se mo di vor keba ngulie.

¹²Sitse puo süu ki, ‘Kezeu, no kidi nuyie pfhenei se mo di hanu ler ba ga?’ sishü. Sitse themiau die pulie kenjüta.

¹³Süki kediue chalieko ki, ‘Nieko puo phi puo dzie phalie di kelhoupie chazou kezei nu shüwacie. Sünu kra mu u hu thegeipie batuo’ siwata.

¹⁴Süsütuoi kiepie keba we kra, derei kedakelie we tsa” sita.

¹⁵Süsie Farisiko keze vo di puo die nunu puo tekelie rhü di kerüchü.

¹⁶Sidi süko uko siedziko ketsepie Herodko salie di sie, “Kepethau, no ketho nunu Ukepenuopfü zho thapie mia kieya, mu no miapuorei rhu pekreiya mokecü hie si; kekreilamonyü no mia puo gei rei n nei si kreiya mokecü la.

¹⁷Süla no kedipuo le shi, se hieko ki puthie. Khezhanuo khruopie Kaisar tsükecü puotou mo mo ga?” sita.

¹⁸Sirei Jisu uko noudo kesuo silie di sie, “Ketherakezhako, nieko kiüdi a kedoya ga?

¹⁹Khezhanuo priesa puo pie a pekiecie!” sita. Sitse uko denari puo se vorshü.

²⁰Sitse puo sie uko ki, “Hau supuo miarhi mu supuo za ga?” idi ketso.

²¹Sitse uko sie, “Kaisar zo” sita. Sitse puo uko ki, “Kaisar vieko pie Kaisar tsüwalie, mu Ukepenuopfü vieko pie Ukepenuopfü tsüwalie” sita.

²²Uko die hau sikeshü ki uko ngota; mu uko puo khawa di tuota.

²³Sünhie Sadukiko mia huo kesiamia rheilasielie [35] pu di vor puo ketso di sie,

²⁴“Kepethau, Mosa hie ki, ‘Mia puo puo nuo jü di siata ro, puo siezeu bu puo kimia lie di puo dzürieu yie pelhoucie’ isi.

²⁵Siro hie donu siezedzürie kechü thenie tuoya ru; therieu thenu lie, mu puonuo jü di siata, sidi puo kimia bu puo siezeu ze lhou.

²⁶Siro mia kenieu mu seu rei sükemhie chüta, si zo vo thenieu tso.

²⁷Sidi thela nu thenupfü rei siata.

²⁸Siüro, kesiamia rheilakesie nhie, süpfü mia thenieko supuo kimia chü ta? Uko pete puo lie phre zeru” sita.

²⁹Sitse Jisu sie, “Nieko kekrü, kekreilamonyü nieko ketholeshü mu Ukepenuopfü kekuou rei si kemo la.

³⁰Kekreilamonyü rheilakesie ki thenu lie morei nyhü reiya mo, derei teigeidieliemia mhie phretaya.

³¹Siro kesiamia rheilakesietsatie zowe, thiedzü Ukepenuopfü nie ki,

³²‘A Abraham Kepenuopfü, Isak Kepenuopfü, mu Jakob Kepenuopfü’ isipie kezhü nie phrü mo zo me? Puo kesiako monyü kerheiko Kepenuopfü zo.”

³³Themia krodiko hau sishü tse, puo kepetha die la u ngota.

³⁴Siro Farisiko puoe Sadukiko die va pejükewa silie di vo kengulie,

³⁵sidi süko donu thezhokesimia puo puo kedotuoü mha ketso di sie;

³⁶“Kepethau, thezho-u nu khakeshü die kiu kezhatho ga?” sita.

³⁷Sitse Jisu sie puo ki, “No n melou pete se, mu n kerheiro pete se, mu n nou pete se Niepu-u n Kepenuopfü khrie mu rhuliecie” si.

³⁸Hauha khakeshü die kezhatho-u mu kerietho-u zo.

³⁹Siro kenieu ro: ‘N siezanuomia khriepie n thuo n kekhrie mhielie’ isikecüu zo.

⁴⁰Thezho-u pete mu siedzekesiko rei khakeshü die hanie geinu u diebo chü phre zo” sita.

⁴¹Siro Farisiko vor kengu ketha nu, Jisu sie,

⁴²“Nieko Khrista dze kedipuo le ga? Puo supuo nuo ga?” idi uko ketso. Sitse uko sie, “David nuou zo” ishü.

⁴³Sitse puo la sie, “Siüro, kimhie di David-e Ruopfüu nunu puo üse, Niepu-u üdi kie di sie,

⁴⁴‘Niepu-u sie a Niepu-u ki, “A n ngumvümiako khapie n phi khroshüwa kemochie no a zatsa ba zocie” ’ isi ga?

⁴⁵David süki puo üse Niepuu üdi kie liro, siro kimhie di puo nuoü lalie vituo ga?” sita.

⁴⁶Sitse miapuorei puo die kelalie kenjüta, mu sünhie yawinu miapuorei mhapuorei pie puo ketso sa michieta.