Read Angami Naga Mathi 23 Bible Online

Mathi 23 - Angami Naga bible

Mathi 23

¹Süsie Jisu themia krodiko mu puoe pethakelieko ki

²“Thezho kepethako mu Farisiko Mosa ba gei baya;

³süla uko mha kehoupuorei se nieko pethashü ro medziliecie; derei uko mhatho kemhie we chü hie; kekreilamonyü uko pethaya derei chüüzeya mo.

⁴Uko thepie kemesi dapie mia tsü geishüya, derei uko thuo zo we u dziekinuo rei se phi nyükenie reiya mo.

⁵Uko mhachüyakezha pete mia bu nguketuo la chüya; kekreilamonyü uko Ketho dieko thupie u gei phapfü meyiemeluo mu uko pfhephrie rei chü kerütshuse-i tuoya.

⁶Siro uko thehethehieko nu mu sinagogko nu therhubako gei bakecü u neiya,

⁷mu lhithochüko nu mia bu u kelu mu u üse Rabi idi kiekecü u neiya.

⁸Derei nieko we mia bu nie üse rabi üdi kie hie, kekreilamonyü nieko kepethau puo rübei zo, mu nieko pete siezedzürie zo.

⁹Siro nieko kijü hau gei miapuorei üse nieko puo üdi kie hie, kekreilamonyü teigei kebau rübei nie puo zo.

¹⁰Morei mia bu nie üse kepethau üdi kie hie, kekreilamonyü Khristae nie kepethau zo.

¹¹Nieko donu kezhatho-u bu nie thekeu chütuo.

¹²U thuo u chü pezhakezha khe chü pecüwatuo, mu u thuo u chü pecükelie khe chü pezhashütuo.

¹³“Derei nieko ketherakezha, Farisiko mu thezho kepethako we ce chülietie! Nieko mia bu teigei kedi nu leketuo khawayacü la. Mu nie thuo rei leya mo, mu sünu letuo ükezhümia rei khawaya.

¹⁴Nieko thezho kepethako mu Farisiko la we ce chülietie! Nieko ketherakezhako! Nieko samipfüko se ketsilie di uko kiko peka cü tuoya, tsiu kethera di kechachü pecha phishüya! Hau la nieko siazha rekuotuo.

¹⁵Nie ketherakezha Farisiko mu thezho kepethako we ce chülietie! Nieko mia puo nou chü kedilietuoü di dzükezha mu kijüko cie vo di pfhü tuoya; sidi mia puo nou chü kedilie ütse, nie puo bu nie de kenie zie mizie nuonuo chüwaya.

¹⁶“Nie mhicie di mia chathayakezhako we ce chülietie, nie sie, “Nieko kehoupuorei rüsuoki pu rüse zo ürei mhapuorei ca jü, derei puo rüsuoki nu sunau pu rüseta ro rüse süu puo phapfüliete” iya.

¹⁷Nieko kemelo mhicieko! Ki-a, sunau mo, sunau chü kemesalieketa rüsuokiu zhakuo ga?

¹⁸Sidi nieko sie, “Themia kehoupuorei rüsuobau pu rüse ro, süu la mhapuo mo, derei puo mha khapie ruosuoba geikeshüu pu rüse ro, süu puo phapfüliete” siya.

¹⁹Nieko mhicie kide chü ga? Kekreilamonyü sunau mo, sunau chü kemesalieketa rüsuokiu zhakuo ga?

²⁰Süla kehoupuorei ruosuobau pu rüse ro, süu mu sügei kezhüko pete pu rüseta zo;

²¹mu kehoupuorei rüsuokiu pu rüseta ro, süu mu sünu kebako pu rüseta zo;

²²mu kehoupuorei tei pu rüse ro, Ukepenuopfü kedibau mu sügei bayakezhau rei sa pu rüseta zo.

²³“Siro ketherakezha Farisiko mu thezho kepethako we ce, chülietie! kekreilamonyü nieko nietso, niepfhü, duniya ker zau khashüya, derei süko ki thezho-u nu zhakuokecü; kethoca mu ngukemezhie tsiu kepele hako khawate. Nieko mha hako rei chü zhü zo mu kekreiko rei khawa zhü mo.

²⁴Nie mhicie di mia chathayakezhako! Nie mimhienuo we chawaya, derei ut mezulieya!

²⁵“Nieko ketherakezha Farisiko mu thezho kepethako we ce, chülietie! Kekreilamonyü nieko tehiemekhou chazoutsa we khrü kemesawaya, derei puo noutsa we nie mha kemehou mu nie nei nie nyü kechü thuo tshupfü tuo zo.

²⁶Nie mhikecie Farisiko! Chazoutsa bu mesalieketuo la tehieu puo noutsa chü kemesawa periecie!

²⁷“Nie ketherakezha Farisiko mu thezho kepethako we ce chülietie! Nie mekhru nyhü pekrapiekeba kemhie zo, süko chazoutsa we ngu zivi phiya, derei puo noutsa we kesiamia ru mu kerhu peteko thuo tshuzhüya.

²⁸Süsütuoi chazoutsa we mia bu nie ngu kemiatho, derei nie noutsa we ketherakecü mu kejokemou thuo tshupfü tuoya.

²⁹“Nie ketherakezha Farisiko mu thezho kepethako we ce, chülietie! Nieko siedzekesiko mekhru pfhe mu kemiathoko mekhru kenhe kezivi phishüya,

³⁰sidi nie sie, “Hie bu hie puonuoko teiki lhouücü we, uko chükewa tuoi siedzekesiko zie kepekru-u nu hie sa phrülie lhoweü” isiya.

³¹Sidi nie thuo zorei thiedzü siedzekesiko kedukhrimia yieükecü puta zo.

³²Süla nie puonuoko sedekeshüu chü tseiwaliecie.

³³Nieko tinyhü mu prielepfü seyieko! Nie kimhie di nie pejopie mizie[36] nu shüwaketau therhielieta ga?

³⁴Süla a siedzekesiko, mhakesimiako, mu thezho pethayakezhako ketsepie nie ki shüya, mu nieko süko huomia dukhrituo mu gouwatuo, tsiu kekreiko sinagogko nunu vütuo, mu whuopie rünaüko nu shütuo.

³⁵Sidi Abel kemiatho-u zie nunu vo rüsuoki nu mu rüsuobanie donu nie puo dukhrikewa Barakia nuo Zakaria zie ketso kijü hau nu kemiathoko pete zie bu nie tsü gei vortuo.

³⁶A nieko ki pu toushütuo, mha süko pete tsie kelhou themia hako gei vortuo.

³⁷“Jerusalem, Jerusalem, siedzekesiko dukhri mu ketsie pie n ki kevor dieliemiako vawayakezha nadiu! Vükrüe puo nuonuo kekopie puo shü khro shülieyakezha tuoi a va kitsuokide n nuonuoko kie kengulie nyüsie ga? Sirei no mvüte!

³⁸Süla n kiu bu ruota di khapie n tsütuo.

³⁹Kekreilamonyü a nieko ki pushütuo, nieko sie, ‘Niepu-u za se kevor-u thejakepfüthowe’ idi pu kemochie mhakipuorei nieko a ngulie lhote” sita.