Read Angami Naga Mathi 24 Bible Online

Mathi 24 - Angami Naga bible

Mathi 24

¹Siro Jisu rüsuokiu nunu par di tuotazhü tse, puoe pethakelieko puo ki vor di rüsuokiu nu kiko thashü puo kie.

²Sitse puo uko ki “Nieko mha hako pete ngu tha zo mo? A nieko ki pu toushütuo, hako pete vawa di ketsie puo bu rei kemhosepfü ba motatuo” sita.

³Süsie puo vo Oliv kijüthou gei ba ru pethakelieko pekhre puo ki vor di sie, “Mha hako kedikechükipuo chü ta? mu kedipuo pie n kevor mu puotei thelaketa zasiu chüshütuo shi se hie ki pucie” sita.

⁴Sitse Jisu sie uko ki, “Mia bu nieko sewa molieketuo la nie kireilie.

⁵Kekreilamonyü themia kekra a za se vor di, ‘A Khristau zowe!’ idi themia kekra se zetatuo.

⁶Süki nieko terhü kechü dze, tsiu terhü dze diekrie si phituo, derei süla nie nou kemezhieta hie. Mha süko chü molie lho, derei süu thelau mo.

⁷Siro seyie puo seyie kekrei puo ze kegei mu kediko huoniehuo perhie sietuo, mu lukihaki pekrie mu kiükishütuo:

⁸derei mha süko pete kemezhieketuo therieko zo.

⁹“Siro mia bu nie tepie mia dzie nu shü di nie pechü mu dukhrituo, mu themia pete rei a za la nieko ngumecü sietuo.

¹⁰Süki mia kekra kepele khawatuo[37], mu huohuo tepie mia tsütuo, mu huoniehuo mecütatuo.

¹¹Siro siedzekesi ketijü kekra sier di themia kekra se ketsi zetatuo.

¹²Siro thezhokemo kra phiketa la mia kekra kekhrie meku miemietatuo.

¹³Derei hie zo tha thela tsokelieu kelalietuo.

¹⁴Siro kijü pete nu zhapu puo chüshüketuo la kedi dze dieliekevi hau pu pie seyie neiüko petsoshütuo; sidi puotei thelau vortuo.

¹⁵“Süla niekoe Daniel siedzekesiu thiedzü pupiekezhü mha va perhu se zoketuo kemecü chü zokecüu vor kemesa chüu nu ketha ngukelie ki (kephrümiako bu leliecie),

¹⁶süki Judia nu kebamia bu ta kijüthou gei votalie;

¹⁷mu ki tsüle gei kebamia bu kinu nu mha chülietuoü la ke hie;

¹⁸tsiu lie nu ketuou bu puo pfhenei chülietuoü la vo hie.

¹⁹Süki nuonipfüketuoko mu u nuonuo nuyakecüko we kemezhie pie kedipfü chütie shi!

²⁰Nieko ketau bu teisei ki morei sabat nhie molieketuo la chaliecie.

²¹Kekreilamonyü kemezhiekecü süu re phi zotuo, kijü chülie tse nunu vor tsie ketso sükemhie chü mo mu sükemhie chü lalie lho.

²²Siro teisozha süko chü pedzüshü kemosie we miapuorei kelakelie ngulie lheciü; derei kedakelieko la teisozha süko chü pedzüwatuo.

²³Sükisü mia nieko ki, ‘Harie, Khrista haki ba!’ morei ‘Puo luki ba!’ isi shierei pele hie.

²⁴Kekreilamonyü Khrista ketijü mu siedzekesi ketijü sier ungomhatho kezhako mu zasiko chüpie mia pekie di chülie kevisie kedalieketako rei se ketsi zetatuokecü la.

²⁵Harie, a pedzüperie nieko ki pushüwate ho.

²⁶Süla uko sie nieko ki, ‘Lerie, puo luki rayha nu tuo ho,’ idi pu rei vo hie; morei, ‘Harie, puo kinutshekou ba ho,’ isi rei pele hie.

²⁷Kekreilamonyü niathutsa nu teimelashü ro, kisietsa rei ngu voyakezha tuoi, Themia Nuou kevor rei sümhie zotuokecü la.

²⁸Kehourapuorei kesia mo kezhüra chürhaüko rei vo sünu kengutuo.

²⁹“Siro kemezhiekecü teisozha süko tseita mumetha niaki zeitatuo, mu khrü zieshü motatuo; themvüko teigeinu rürietatuo, mu teigei kekuoko shükenie phrewatuo.

³⁰Süsie Themia Nuou zasi teigei nu ngu partuo, sitse kijü nu seyie pete kratatuo, mu ukoe ‘Themia Nuou teigei kimhou geinu’ kekuo mu zapuzayie chü di tsurkezhü ngutuo.

³¹Süki ketsü khou kemerie chü di puo dielieko ketseshütuo, sidi uko teigei tietsa puo nu vo kekreitsa ketso ke diako nunu puoe kedakelieko pfhü kengulietuo.

³²“Siro nieko chiedebo-u geinu kepetha dieu siliecie: puo co kemedzü puo nyü kesa the kepar ki teiletieta ükecü nieko rei si batuo.

³³Süsütuoi nieko mha hako pete ngukeshü ki, puo penuo vor kikha ki thata ükecü siliecie.

³⁴A nieko ki pu toushütuo, mha süko pete chü tseiwa kemochie thephou hau jütalie lho.

³⁵Tei mu kijü jütatuo, derei a dieko we jütalie lho zo.

³⁶“Derei teisozha süu mu bavüdo süu dze we a Puou rübei sie, miapuorei teigeidielieko rei morei Nuou rei siya mo.

³⁷Siro Noah kelhou ki tuoi Themia Nuou kevor ki rei sümhie zotuo.

³⁸Dzüdi sierketa mhodzü themiako mhacümhakrie, mu nyhü thenu lie zo ba Noah rou-u nu leketa nhie tso.

³⁹Sidi dzüdi vor uko pete vupfülie kemochie si ba mo, sütuoi Themia Nuou kevor kirei sümhie tou zotuo.

⁴⁰Sükisü mia kenie keze lie nu tuotuo, mia puo chü setatuo, mu mia puo khawatuo.

⁴¹Thenumia kenie keze kecü ge batuo; miapfü puo chü setatuo mu kekreipfü khawatuo.

⁴²Süla pfheüla ba zolie, kekreilamonyü nieko nie Niepu-u vorketuo teisozhau sikemo la.[38]

⁴³Derei mha hau siliecie: mhanuü ki niepuu kicükipuo kerügumia vortuo shicü si ba ro, puo pfhe balie di kerügumia bu ler puo ki rhie molietuo.

⁴⁴Süla nieko rei dojü balie, kekreilamonyü nieko le mo keba bavüdo puo nunu Themia Nuou vor zotuokecü la.

⁴⁵“Siro supuo kedietho mu mhakesi kituou chü di, puo niepu-u bu puo chüpie puo kinu kezha chü di puotei touki mha khapie kituo kekreiko[39] tsünutuo ga?

⁴⁶Puo niepu-u kevor ki mhachü ba di ngulieketuo kituo süu thejakepfütho zo.

⁴⁷A nieko ki pu toushütuo, puo themia süu bu puo vienya pete kemeho-u chü zotuo.

⁴⁸Derei kerüzhü kituo süu puo nounu, “A niepuu vor menuotuo”

⁴⁹idi puo dziese kituoko vü, sidi kemezemia ze mhacümhakrie bata ro,

⁵⁰kituo süu niepuu puo le mokeba puo nu vor di,

⁵¹puo da phawa[40] di puo khapie ketherakezhako kro nu shüwatuo; sünu nu kra mu puo hu thegeipie batuo.