Read Angami Naga Mathi 25 Bible Online

Mathi 25 - Angami Naga bible

Mathi 25

¹“Siro teigei kedi-e hakemhietuo. Rüümia[41] ker u mitubou pie yasau ze kesetuoü kevo mhie zo.

²Süko mia pengou mhale mo mu mia pengoue mhasi.

³Rüü mhale kemo pengouko u mitubou pie tuo, derei tier we se tuo mo;

⁴derei mhakesi pengouko mhabouko nu tier tsiu mitubou sa pie tuo.

⁵Siro yasau vor menuota, süla rüüko rüngu ba di zeta.

⁶Derei khisoteiluo mia shiekhoui di, “Harie, Yasau sü! Par puo zeliecie” isi vor.

⁷Sitse rüüko pete sielie di u mitubou lo meza phrelie.

⁸Sitse mhalekemoko sie, “Nie tier huoyo pie hie tsücie, kekreilamonyü hie mitubou mhetatuo üzhüketa la” sita.

⁹Derei mhakesiko sie “Chülie suote, siwa ro nieko la rei mu hie la rei tsatatuo. Nie thuo vo zeyakezhako kinu khrülietacie” siwata.

¹⁰Süla uko süu khrütuoü vota tse, yasau vorta, mu dojüpfü kebako sielie di yasau ze nuyie heu nu lelie, sitse kikhau khawata.

¹¹Süsienu rüü kekreiko rei vor tsolie di sie, “Niepu-u, niepu-u, kikha khrüshü hie tsücie!” sisie.

¹²Derei puo sie, “A nieko ki pu toushütuo, A nieko si mo we!” sita.

¹³Süla nieko pfheüla ba zolie, kekreilamonyü nieko puo teisozhau mu puo bavüdo-u sikemo la.

¹⁴“Sizomonyü mia puo rüna kekrei puo nu votatuo üdi puo kituoko kieshü di puo vie pie süko dzie nu keshü mhie zo.

¹⁵Süko mia puopuo chülie kevi le di talent[42] pengou pie mia puo tsüshü, siro kenie pie kekrei puo tsü mu puo pie mia puo tsüshü. Süsie puo tuota.

¹⁶Siro talent pengou ngukelieu kenourhei vo süko se mhachü di kekrei pengou pralie.

¹⁷Sütuoi kenie ngukelie kituou rei kekrei kenie pralie.

¹⁸Derei puo ngukelie kituou vo kijü thielie di puo niepu-u rakau keviepie zhüwata.

¹⁹Siro puotei kekra sie kituo süko niepu-u la vor di uko mhathoko le sie.

²⁰Sitse talent pengou ngukelieu kekrei pengou sa se vor puo tsü di ‘Niepu-u, no talent pengou pie a tsüshü, mu harie, a talent kekrei pengou pralietewe’ si.

²¹Sitse puo niepuu sie, ‘Siyazemu, no kituo kevi kedietho-u; no mha keduoyo gei rei dietho baliete, a n bu mha kekra mhokezha chütuo; vor n niepu-u ze n nei batalie’ sita.

²²Siro talent kenie ngukelieu rei vor di sie, ‘Niepu-u, no talent kenie pie a dzie nu shü, harie, a talent kekrei kenie praliete’ sishü.

²³Sitse puo niepuu puo ki, ‘Siyazemu, no kituo kevi kedietho puo; no mha keduoyo gei rei dietho baliete, a n bu mha kekra mhokezha chütuo; vor n niepu-u ze n nei batalie’ sita.

²⁴Süsie talent puo ngukelieu rei vor di sie, ‘Niepu-u, no themia n nou kere puocü a si ba; no tsia prushü kemora rei retuoya, mu nyürieshü kemora rei pa kengu tuoyacü a si,

²⁵süla a michiete di n talent-u pie khrupie zhüwate. N vie sü, harie’ sita.

²⁶Derei puo niepu-u la sie puo ki, ‘No kerüzhü mu kemecü kituou! No a prushü kemora re tuoyacü, mu a nyürieshü kemora rei pa tuoyakecü no siluo le!

²⁷Siüro no a raka pie vo rakaki nu rei piezhülie ro, a la kevor ki a raka mu puo pra sa ngulietieciü.

²⁸Süla tsie puo kinu talent-u pielie di khapie talent ker kebau tsüwalie.

²⁹Kekreilamonyü themia kehoupuorei mha kebau, khapie puo tsü sashütuo, sitse puo mhanyi philietuo; derei mhapuorei bakemo-u puo kinu kebau rei chü setatuo.

³⁰Siro ziezhükemo kituou kelhoupie chazou kezei nu shüwalie, sünu nu kra mu u hu thegeipie batuo’ sita.

³¹“Siro themia Nuou zayie chü di puo dielieko pete sa puo ze tsurkecü ki, puo zapuzayie kedibau gei batuo;

³²siro seyie peteko puo mhodzünu kengu phretuo, süki puoe kuopfhemia puo temvüko donunu tekuoko kela kreiwayakezha tuoi puo themiako kho kekreiwatuo.

³³Sidi puo tekuoko pie puo zatsashülie mu temvüko pie puo vitsashüwatuo.

³⁴Süki kediu puo zatsa kethako üse, ‘A puo japie nieko ketsüko, vorliecie, sidi kijüu chülie tsenu nie la kesepie baketa kedirüvieu weliecie;

³⁵kekreilamonyü a merü tuo ru, nieko mhapie a tsü, a terhü tuo ru, nieko mha pie a bu krie, a rüso chü tuo ru, nieko a pesolie;

³⁶a methuo tuo ru, nieko pfhemenei pie a wheshü, a mhachüzhü ru, nieko vor a thekeshü, a kedie chü ba ru, nieko a ki vor’ isisietuo.

³⁷Süki kemiathoko lasie puo ki, “Niepu-u hie kikecükipuo no merü ketuo ngu di mha pie n tsü ga? morei no terhü ketuo ngu di mhapie n bu krie ga?

³⁸Mu hie kikecükipuo no rüso chü ketuo ngu di n pesolie morei no methuo tuo di pfhemenei pie n wheshü ga?

³⁹Hie kikecükipuo no mhachüzhü morei kedieki nu ba di n ki vor ga? idi ketso sietuo.

⁴⁰Sitse kediu sie uko ki, ‘A nieko ki pu toushütuo, nieko a siezedzürie hako donu kecütho-u gei rei chüshü ro, süu a gei chüshüta zo’ isituo.

⁴¹Süsie puo puo vitsa kethako ki, ‘Nieko rüse pfüketako, a kinu tuose satan mu puo dielieko la kesepie keba kechachie miu nu votaliecie;

⁴²Kekreilamonyü a merü tuo derei nieko mhapie a tsü mo, a terhü tuo derei nieko mhapie a bu krie mo,

⁴³a rüso chü tuo derei nieko a peso mo, a methuo tuo ru nieko mhapie a wheshü mo, a mhachüzhü mu kedieki nu ba, derei nieko a meho mo’ itatuo.

⁴⁴Süki uko sie puo ki, ‘Niepu-u, hie kikecükipuo no merü ketuo, morei terhü ketuo, morei rüso chü ketuo, morei methuo ketuo, morei mhachü, morei kedieki nu keba ngu di hie n meho mota ga?’ idi ketsotuo.

⁴⁵Sitse puo lasie uko ki, ‘A nieko ki pu toushütuo, nieko kecütho hako mia puo gei rei chüshü mo ro, a gei chüshü mota zo’ isitatuo.

⁴⁶Süsie uko kechachie siazha kechü nu votatuo; derei kemiathoko we kechachie kerhei nu votatuo” sita.