Read Angami Naga Mathi 26 Bible Online

Mathi 26 - Angami Naga bible

Mathi 26

¹Siro Jisu mha hako pete pie mia pethashükewa sie, puoe sie pethakelieko ki,

²“Zha kenie sie Ciekevo nyitaketuo nieko rei si ba, mu mia bu puo gouwaketuo la Themia Nuou tepie mia dzienu shüwatuo” sishü.

³Süki zievoko mu pehüko keze vo Kaifa ükecü phichükezhatho-u kitiezha nu kengulie;

⁴sidi uko pekhre di Jisu tepie dukhriwaketuo thedo rhü.

⁵Derei uko sie, “Thenyi ki suo, themiako mha kebvü sierta rei silie lho mu” si bata.

⁶Siro Jisu vo Bethani nu mpa kechüu Simon kinu ba,

⁷süki puo mhacütuoü ba ru thenumiapfü puo tier puoma kerethopfü, alabaster bou puo ketshu se vor, di süu rupie puo tsügei shü.

⁸Sitse pethakelieko süu ngu di uko nou kekrüta, di sie, “Kiüdi mha haicü pekaya ga?

⁹Kekreilamonyü tier hau puoma vi phicü nu zelie di raka süko pie kejükesuomia tsülie vi ze!” si bata.

¹⁰Derei Jisu süu silie di sie uko ki, “Nieko kiüdi thenu hapfü kebvüya ga? Puo a gei mha kevi phi puo chüshü zo.

¹¹Kejümia nie ze sei batuo, derei nieko a ze sei balie lho.

¹²Puo tier hau rupie a mo-u gei shükecü ha a kekhru nyieu keseshüwata zo.

¹³A nieko ki pu toushütuo, kijü pete nu dieliekevi hau pu mia kiekecü kheko nu thenu hapfü rükra tuoketuo la puo chükeshü dze rei sa pu tuo zotuo” sita.

¹⁴Siro kerekenieko donu mia puo üse Judas Iskariot üyakezhau, zievo kezhako ki vo,

¹⁵Sidi sie, “A puo tepie nieko dzienu shü ro nieko kedipuo pie a tsütuo ga?” ishü. Sitse uko raka ser phrüpie puo tsüwa.

¹⁶Siro süyawinu puoe puo tepie uko dzie nu shütuoükecü rüterü tuota.

¹⁷Siro Khreiüshükemo Niekhrüda nyiu zha therie nhie pethakelieko Jisu ki vor di sie, “No hieko bu n la kirapuonu Ciekevonyiu cüketuo la mha kese nyüya ga?” ita.

¹⁸Sitse puo sie, “Nieko bu nadiu nu mia puo ki votuo, mu puo ki, ‘Kepethau puya, A teiu penuo bate; a a siedziko ze di n ki nu Ciekevo nyituolie’ isicie” sishü.

¹⁹Sitse pethakelieko Jisu uko ki pukeshü tuoi di Ciekevonyiu la mha keselie.

²⁰Siro thevatieta tse, puoe kerekenieko ze balie;

²¹sidi uko mhacü keba ki, puo sie, “A nieko ki pu toushütuo, nieko mia puo a teshütuo” sita.

²²Sitse uko nou suo phi di sie, “Niepu-u, süu a me? a me?” si phreta.

²³Sitse puo la sie, “Mia puo a ze puo dzie pie mekhou nu keshüu thuo a teshütuo.

²⁴Themia Nuou sü puo dze thupiekezhü tuoi tuotatuoüzhie, derei Themia Nuou tepie mia dzienu shüketuou we ce, chülietie! Themia süu la we penuo vor kemo puo dze vikuotuo” sita.

²⁵Sitse puo teshütuoü kebau Judas sie puo ki, “Rabi, süu a me?” si. Sitse puo sie, “No pushüwata zo” sishü.

²⁶Siro uko mhacü keba nu Jisu niekhrüda chülie di jashü mu bietshielie, di khapie pethakelieko tsü di sie, “Liepie cücie; hauha a mo zo” sishü.

²⁷Süsie puo tehieu rei pielie, di jashü di khapie uko tsü di sie, “Nieko hau krie phrecie;

²⁸kekreilamonyü hauha themia kekra kephouma valieketuo la kru kepar dietseidiekhokelie a zie[43] zo.

²⁹A nieko ki pu toushütuo, a a Puou kedi nu nieko ze di khubedzü kesa krieketuo zhau tsolie kemochie mhakipuorei a khubedzü hau krie salie lhote” sita.

³⁰Süsie uko keze tsali puo chülie di tuo Oliv kijüthou gei vota.

³¹Siro Jisu uko ki, “Tsiezhü nieko pete a khawa di tatatuo; kekreilamonyü süu dze, ‘A kuopfheu vüshütuo, sitse tekuo kro-u ta cüretatuo’ isikecü thupiekezhü la.

³²Derei a rheilasiekelie sie, a nieko mhodzü rie Galil nu votatuo” sishü.

³³Sitse Pitor sie puo ki, “Mia pete n khawa di tata zorei, a we silie lho zo!” sita.

³⁴Sitse Jisu sie puo ki, “A n ki pu toushütuo, tsiezhü thevü kekhou mhodzü no va se a melietatuo” sita.

³⁵Sitse Pitor sie, “A bu n ze siatuo ürei a n melietalie lho zo” sita. Siro pethakelie kekreiko rei sükemhie pu phreta.

³⁶Süsie Jisu uko ze Gethsemane ükecü thechü puo nu vo di puoe pethakelieko ki, “A luki phi kecha chü keba ki nieko haki balie” sishü.

³⁷Sidi puo Pitor mu Zebedi nuonie ze vota, di puo nou kemezhie mu puo nou kehoukeruo chüta.

³⁸Sitse puo sie uko ki, “A nou kemezhie pie siatuoü bate mu, nieko haki ba di a ze pfhe baliecie” sishü.

³⁹Sidi puo tuo za phi di zere tsu kecha chü di, “A Puo, chülie vituo liro, tehie hau bu a thertacie; derei a medo kemhie monyü n medo-u chüliecie” sishü.

⁴⁰Süsie puo tuo la pethakelieko ki phir ru uko ze ba di ngulie, sitse puo sie Pitor ki, “Nieko bavüdo puo la rei a ze pfhe balie lhote me?

⁴¹Nieko dophi nu leta molieketuo la cha mu pfheüla ba zoliecie; ruopfü kitsa we chü nyü tuo zo derei chüüphou we thachü” sishü.

⁴²Siro puo süsieu va rei tuo la phi kecha chü di, “A Puo, mhanuü a bu hau krie molie lho üro, n medo-u chüliecie” sishü.

⁴³Sidi puo tuo la phir ru uko ze ba di ngulie; uko mhirholie lho ba zoketa la.

⁴⁴Süsie puo uko khawa di va seu chatuoü la phi di khinyhü die kemhieko se cha lashü.

⁴⁵Sitse puo tuo la pethakelieko ki phir di sie, “Nieko tsierei ze mu rülei ba zo me? Harie, puotei tsote, mu Themia Nuou tepie kephoumako dzie nu shüwatuoü bate.

⁴⁶Sielie di úko tuota khe. Harie a teshüketuou vor haki thate!” sishü.

⁴⁷Siro puo die pu ketha nu, kerekenieko donu mia puo Judas-e zievo kezhathoko mu pehükoe ketsekeshü zhiecha mu seide piekecü mia krodi puo ze vorta.

⁴⁸Siro puo teshüketuou zasi puo pie uko tsü di sie, “A puo meboshüketuou süu puo zo ho; puo teliecie” sishü.

⁴⁹Sitse puo mha zo Jisu ki phi di sie, “Keviu chüliecie, Rabi!” sishü di puo meboshü.

⁵⁰Sitse Jisu sie puo ki, “A zeu, no chütuoü kevor-u chüliecie” sishü. Süsie uko vor Jisu merhashülie di puo telie.

⁵¹Süki Jisu zeketuoko mia puo puo zhiecha zou mhai sie zievo kezhatho-u kituou du di puo nyieto metakreiwa.

⁵²Sitse Jisu sie puo ki, “N zhiecha pie puo kou nu shüwalie! Kekreilamonyü zhiecha pieyakezhamia zhiecha geinu ka phretatuo.

⁵³A a Puou ki cha ro puo dieliemia legion kerekenie kezie rei ketseshülieketuo no si mo me?

⁵⁴Derei süu sita ro, kikidi Ketholeshü nu hau chü morosuo üdi pupiekezhüu chü tseilietuo di mu?” sita.

⁵⁵Sümeseki Jisu themia kroko üse, “Nieko aü mia vie sekecümia puo tuoi zhiecha mu seideko pie di a tetuoü vorzhü te le? A teisonhie rüsuoki nu ba di mia petha baya zo, nieko süki a te mo ze.

⁵⁶Derei mha hako pete chüketa thiedzü siedzekesiko bu Ketholeshüko nu thupiekezhü chü tseilieketuo la zo” sishü. Sitse pethakelieko pete puo khawa di ta phreta.

⁵⁷Süsie Jisu tekelieko puo ze thezho kepethako mu pehüko vo kengu keba zievo kezhatho-u Kaifa kinu vota.

⁵⁸Siro Pitor puo tso penuo mo di puo siemedzi zo zievo kezhatho-u kifükhro ketso vota, tsiu puo thela nu kedipuo chütatuo shicüko mehotuoü le kepfhemiako ze balie.

⁵⁹Süki zievo kezhako mu pehüko kehou pete rei Jisu dukhriwaketuo la puo gei ketijü zhapu pfhü sie,

⁶⁰derei ketijü zhapu kekra vor zorei die puotou puorei ngulie mota. Si ba di kenuotsa mia kenie vor,

⁶¹sidi sie, “Themia hau pukecü, ‘A Ukepenuopfü rüsuokiu bierhuowa di zha se nu chü lalie vi’ isiwe” sita.

⁶²Sitse zievo kezhatho-u siethalie di sie, “No mhapuorei pu lho me? Hako kedipuo puo pu n pejo tha ga?” sita.

⁶³Derei Jisu kemekrieta. Sitse phichü kezhatho-u sie puo ki, “A tsie rheituoyakezha Ukepenuopfü za nu n bu rüse di putuo, no Khristau, Ukepenuopfü Nuou zo me?” sishü.

⁶⁴Sitse Jisu sie puo ki, “No pushüwata zo. Derei a nieko ki puya, Nieko tsieyawinu Themia Nuou vo kekuotho-u zatsa baketa, mu teigei kimhou geinu tsurkezhü ngulietuo” sita.

⁶⁵Sitse phichükezhatho-u puo pfhenei cierha di sie, “Puo Ukepenuopfü ketha die pute! Kiüdi úko zhapu kekrei pfhü sa ta? Nieko puo tsie nu Ukepenuopfü ketha die kepu siliete.

⁶⁶Nieko kedipuo le ga?” sita. Sitse uko sie, “Puo siata sü zo” sita.

⁶⁷Sitse uko puo mho metsie mu puo vü, mu huomia dziezhü shüpie puo vü.

⁶⁸Sidi sie, “No Khrista sü, hie ki siedzekesi die pushü thie! supuonie n vü ga?” sita.

⁶⁹Süki Pitor chazou kitiezha nu ba. Sitse rüümiapfü puo puo ki phir di sie, “No rei Jisu Galil-u ze tuo die!” sita.

⁷⁰Derei puo süko pete mhodzünu nu mo üdi sie, “No kedipuo pu tha shi a si mo” sita.

⁷¹Siro puo tuo kifükhro pra ru, rüümia kekreipfü puo puo ngu di sie, süki kethako ki, “Themia hau rei Nazaret Jisu ze tuo zo” sita.

⁷²Sitse Pitor moü rüse di sie, “A themia hau si mo zo!” sita.

⁷³Süsie rei süki ketha kro puo Pitor ki phir di sie, “No rei uko mia puo touta zo; n diepu nunu n telieta ze ru!” sita.

⁷⁴Sitse Pitor rüse khubou zo di sie, “A themiau si mo zo!” sita. Siro sümese touki thevü khou parta.

⁷⁵Sitse Pitor-e Jisu puo ki, “No thevü kekhou mhodzü va se a melietatuo” isikeshüu rükralie. Sidi puo tuo pra di kra kemerie chüta.