Read Angami Naga Mathi 27 Bible Online

Mathi 27 - Angami Naga bible

Mathi 27

¹Siro teisolie tse zievo kezhathoko mu pehüko Jisu ngumvü di puo dukhriwaketuo doko rhüta.

²Siro uko puo phalie di puo ze vo kezhau Pilat dzie nu shüwata.

³Siro Judas, puo tekeshüu, mia Jisu pejowaketa ngu di puo nou rüdita sidi raka serko toupie zievo kezhako mu pehüko ki la vor.

⁴Sidi sie, “Kejo kejümia puo zie ma pielieketa ha a phoumawate!” sita. Derei uko sie, “Süu hieko la kedipuo mu! N thuo leliecie” sita.

⁵Sitse puo rakako kelhoupie rüsuoki nu shüwa, sidi tuota; sidi puo thuo vo kerüchakhrita.

⁶Siro zievo kezhathoko rakako chülie di sie, “Hako thezie ma zokecü la khapie kinyibou-u nu shüketuo puotou mote” sita.

⁷Sidi uko kerüchü di süko pie litho-u kijü khrülie di sünu nu chazoumia kekhruchü chüwa.

⁸Süla thie ketso rei lie süu üse Thezie Lieu ütuota.

⁹Sidi thiedzü siedzekesiu Jeremia[44] pukeshü, “Israelmiako mia puoma mejükeshü tuoi,

¹⁰sidi Niepu-u pukeshü tuoi, uko raka serko se vo litho-u lie khrülie” ikeshüu chü tseilie.

¹¹Siro Jisu ze vo kezhau mhodzünu thalie tse, süu puo ki, “No Judako kediu me?” ishü. Sitse Jisu sie “No pushüwata zo” sishü.

¹²Derei puo zievo kezhako mu pehüko puo kepejotsa la mhapuorei pu mo.

¹³Sitse Pilat sie, “Mia mha hathede se n pejo ketha no si mo me?” idi ketso.

¹⁴Derei puo dieca puorei pu süu kelashü mota, süla kezhau bu puo ngo seta.

¹⁵Siro thenyi süu nu kezhau bu mechüue kediemia puo chaketau khakeshü zho puo nyiya.

¹⁶Süki Barabas ükecü kediemia mechü si puo ba.

¹⁷Süla uko vo kengulie tse, Pilat sie uko üse, “A bu supuo khashü nieko tsü nyüya ga? Barabas tuo mo, Khrista ükezha Jisu tuo ga?” idi ketsota.

¹⁸Kekreilamonyü uko puo ngu u rokecü la puo khapie puo dzie nu shü zokecü puo si keba la.

¹⁹Siro puo ketsokecü bau gei bakelie ki, puo kimia dielie ketsepie puo ki shü di, “No themia kemezhü hau gei mhapuorei chü hiecie, kekreilamonyü a puo pema di thie kemezhie phi baketa la” sishü.

²⁰Siro zievo kezhathoko mu pehüko themia krodi-u ketshüpie uko bu Barabas chalie mu Jisu dukhriwanushü.

²¹Derei kezhau sie uko ki, “A bu hanie kiu khashü nieko ketsü nie medo ga?” si lashü. Sitse uko sie, “Barabas tuo” sita.

²²Sitse Pilat sie, uko ki, “Siüro a bu Khrista üyakezha Jisu pie kedipuo chü ta?” ishü. Sitse uko pete sie, “Puo gouwalie!” sita.

²³Siro Pilat la sie, “Puo mha kesuo kikecüpuo chüwata ga?” sita. Derei uko shie u rhie chükuo di sie, “Puo gouwalie!” iba zota.

²⁴Siro Pilat mhapuorei chü salie kenjüketa ngulie, tsiu mha kebvü kra miemie sierketa la krodiu mhodzünu nu dzü pie puo dzie metei di sie, “A themia hau zie tsatie[45] la we jo mo zo ho; hau nie thuo leliecie” siwata.

²⁵Sitse themia peteko puo die kela di sie, “Puo zie bu hie gei mu hie nuonuoko gei rei pfürtacie!” sita.

²⁶Süla puo Barabas khapie uko tsüwa; mu Jisu vüwa di gouwaketuo la khashü uko tsüwa.

²⁷Sitse kezhau chüpahiko Jisu ze mechübou-u nu leta, sidi uko kro-u pete vor puo houpfülie.

²⁸Sidi uko puo pfheneiu lhewa di puo bu pfhenei kemerie puo selie,

²⁹siro zohu kechiepie tsüre chülie di süu pie puotsü gei shü. Siro uko tekhriethe pie puo dzie puo zatsa shü, sidi puo mhodzünu khoutou tsu, puo kre di sie, “Judako kediu bu keviu chüliecie!” sita.

³⁰Siro uko puo mho mhitsie, tsiu tekhriethe pie puo tsü vü.

³¹Sidi uko puo pie kethekre lotsowa tse pfheu lhewa di puo pfheneiu pie puo whe lashü. Süsie uko puo gouwatuo üdi puo ze tuota.

³²Sidi uko tuo prazhü tse, Kurinmia puo za Simon ükecü puo ngulie, sitse uko puo kemvü chüpie puo bu krus-u pielie.

³³Süsie uko Golgatha (puoca mia Tsütsoru) ükecü thechü puo nu vorlie,

³⁴Siro uko puo bu krienu di mha kepfhü sapie zu reilie di pie puo tsü; derei puo süu methakeshü sie krie mvüta.

³⁵Siro uko krus geinu puo gouwa di dape di puo pfheneiko kezalieta;

³⁶süsie uko süki ba di puo pfhe bata.

³⁷Siro uko puo tsü ki puo kepejo die puo thu sakeshü, “Hauha Judako kediu Jisu” isi.

³⁸Siro mia vie sekecümia kenie, mia puo puo vitsa mu mia puo puo zatsa idi gou.

³⁹Siro tuo kekhokekeko tsüge puo kenga[46],

⁴⁰di sie, “No rüsuokiu bierhuowa di zha se donu chü lashüketuou, n thuo n kelaliecie; no Ukepenuopfü Nuou üro, krus geinu kerlie!” sita.

⁴¹Sükemhie zievo kezhathoko mu thezho kepethako, tsiu pehüko rei puo pie kethekre di sie,

⁴²“Puo kekreimia we kelalie, derei puo thuo puo kelalie kenjüte ha! Puo Israelko kediu mo üme? puo bu krus geinu kerlie ro, hie rei puo pelelietuo.

⁴³Puo Ukepenuopfü pele vor; süla tsie Ukepenuopfü bu puo kelaliecie; puo medotuo üro, kekreilamonyü puoe sie, ‘A Kepenuopfü Nuou’ iya.”

⁴⁴Siro puo sa goukewa mia vie sekecünie rei süsütuoi puo kenga.

⁴⁵Siro sünhiesü khinhieluo keba kerekenie nunu vo thehesie keba se ketso kijü pete zeiboui bata.

⁴⁶Siro bavüdo seu mese ki Jisu shiekhoui di, “Eloi, Eloi, lema sabakthani?” sita, süu ca, “A Kepenuopfü, a Kepenuopfü no kiüdi a khawata ga?” si.

⁴⁷Sitse süki ketha huomia süu si di sie, “Puo Elija kiezhie!” sita.

⁴⁸Sitse uko mia puo ta mha vo sponge puo nu kekhrodzü petselie, di süu pie tekhrie pou puo nu shülie di puo bu krienu pie puo tsü.

⁴⁹Derei kekreiko sie, “Hieluo, Elija vor di puo kelashütuo mo lhe shiü meho ba khe” sita.

⁵⁰Sirei Jisu melie shiekhoui lashü di puo ruopfü khashüwa.

⁵¹Süsie rüsuoki nu pfhe lhapiekezhau puo tsügei nu rürha tsu puo thotsü tso di rürha kenie chüta. Tsiu kiükishüta mu ketsie rei prokrakrata.

⁵²Siro mekhruko cie parta; mu siakezhü kemesako mo kekra rheilasieta.

⁵³Siro puo rhei la sieketa sie süko mekhru nunu par di tuo se kemesa nadi nu le di mia kekra bu uko ngu.

⁵⁴Siro süki kriemhokezhau mu puo ze Jisu pfhe ketha chüpahiko kiükishüketa mu mha chüketako pete ngu di michie phita, di sie, “Hau Ukepenuopfü Nuou ketho zo!” sita.

⁵⁵Siro sükisü Galil nunu Jisu siemedzi di puo khruohi tuoketa thenumia kekra rei kepecie nu mha süko meho tha.

⁵⁶Süko donu Magdalapfü Maria, Jakob mu Josef unie zuo Maria mu Zebedi kimia rei sa tha.

⁵⁷Siro thevatie, Arimathia nunu kevor puo za Josef ükecü kenyimia puo vor, puo rei Jisu siedzimia puo.

⁵⁸Puo Pilat ki vo di Jisu mo-u cha; sitse Pilat mia bu themo-u pie puo tsünushü.

⁵⁹Süsie Josef themo-u pielie, di linenpfhe kemesa puo pie süu kezülie.

⁶⁰Sidi puoe süu pie mekhru kesa puo ketsie ho di chüpie kezhüu nu shüwa. Sidi puo ketsie kezha puo ketoupie mekhru süu kikha nu mekawa di tuota.

⁶¹Siro Magdalapfü Maria, mu Maria kekreipfü rei vo mekhru süu mhodzütsa ba.

⁶²Siro süsie nhie, puoca Mhakesekezhau sienhie zievo kezhathoko mu Farisiko keze vo Pilat ze kese,

⁶³di sie, “Kezhau, mha setuoyakezha hau puo kerhei ki pukecü ‘A zha se sie rheilasielietuo’ icü dieu hie rükraliete.

⁶⁴Süla, zha se ketso puo mekhru-u pfhe menuo balieketuo la, no die khashüwacie, sidi puoe pethakelieko bu themo-u rügupieta di themiako ki, ‘Puo kesia nunu rheilasiete’ ita molieketuo la, moro kemeda thela hau therieu kirei suokuotatie ru” sita.

⁶⁵Sitse Pilat sie, “Nieko thuo rükhoumia khapie bawalie[47] di pfhe menuolie kevichie pfhe menuoliecie,”[48] sita.

⁶⁶Süla uko vo di ketsieu gei zasi vüwa mu rükhoumia khapie mekhru-u pfhe bata.