Read Angami Naga Mathi 28 Bible Online

Mathi 28 - Angami Naga bible

Mathi 28

¹Siro sabat tseita di zhadoudo zha therie nhie teisotie ki Magdalapfü Maria mu Maria kekreipfü unie mekhru mehotuoü vo.

²Sitse süki kiükishü kemerie chü mha vorta; siro Niepu-u dieliemia puo teigei nu tsur di ketsieu phou ketouwa di sügei bata.

³Puo ngupie tei kemela tuoi mu puo pfhenei krapie pekrie tuoi.

⁴Siro rükhouko u michie pfü pe zo di kesiamia mhiepfü zhüta.

⁵Derei teigeidielieu thenunie ki, “Michie hiecie; a nnie-e mia puo gouwaketau Jisu pfhü tuokecü si ba.

⁶Puo haki zhü mote; kekreilamonyü puo pukeshü tuoi rheilasiete. Vor di puo kezhü chüu mehocie.

⁷Sidi tsie rükri vo puoe pethakelieko ki, ‘Puo kesia nunu rheilasiete, mu puo nieko mhodzü rie tuo Galil nu votazhü; mu nieko sünu nu puo ngulietuo ho’ sishücie. Harie, a nnie ki pushüte ho” sita.

⁸Süla unie michie mu unie neipie mhapuochü di tuo kenourhei mekhru ciepra di süko pie puo pethakelieko ki putuoü ta vota.

⁹Sitse Jisu unie ze keselie di sie, “Keviu chüliecie!” sishü. Sitse unie puo ki phir puo phi bie di puo rüsuota.

¹⁰Siro Jisu sie unie ki, “Nnie michie hiecie; vo a siezeko bu Galil nu volienushücie, uko sünu nu a ngulietuo ho” sita.

¹¹Siro unie cha nu tuoluocü nu, rükhouko huomia rünau nu vo di zievo kezhako ki mha chüketa pete puwata.

¹²Süki zievoko vo pehüko ze kepfhülie, sidi raka kekra pie chüpahiko tsüwaketuo kerüchülie,

¹³sidi sie uko ki, “Nieko sie, ‘Puoe pethakelieko thuo theva ze vor di hie ze kezhü nu puo rügupietewe’ iliecie.

¹⁴Siro die hau kezhau nyie nu volie liro, hie thuo puo rüchülietuo; sidi nie bu nie nou kemezhie molietuo” sishü.

¹⁵Süla uko rakako lielie di uko ki pukeshü kemhie chüta; siro thedze hau thie ketso rei Judamia donu kepu vorzhü zo.

¹⁶Sirei pethakelie kerepuokrüko Galil nu vo, sidi Jisue uko ki kepu tuoi kijüthou gei vota.

¹⁷Siro uko puo ngulie tse uko puo rüsuota, derei huomia kenoudota.

¹⁸Süki Jisu uko ki vo di sie, “Teigei rei mu kijü rei kekuo pete pie a tsüwate.

¹⁹Süla tuo vo di seyie neiüko pete chüpie a siedzimia chüliecie, Puou mu Nuou, mu Kemesa Ruopfü za nunu süko baptaiz chüshülie,

²⁰di uko bu a nieko ki pukeshüko pete chüüzelieketuo la uko pethashüliecie. Siro harie, a puotei thela ketso rei nieko ze seituo zotuowe!”[49] sishüwata.