Read Angami Naga Mathi 4 Bible Online

Mathi 4 - Angami Naga bible

Mathi 4

¹Süsie Ruopfüue Jisu hü ze rayha nu vota, satan bu puo kedotuoü di.

²Siro puo teisozha hiedia mu teizeizha hiedia mevo tuota, süla puo va merüta.

³Sitse kedokecüu vor di sie puo ki, “No Ukepenuopfü Nuou üro, ketsie hako ki pushü di uko bu niekhrüda meviliecie” sita.

⁴Derei puo sie, “ ‘Themia niekhrüda rübei la zomonyü Kepenuopfü tie nunu kepar die kehoupuo la rei rheilie zotuo,’ ikecü thupiezhü” sita.

⁵Süsie satan puo ze Kemesa nadiu nu vo di puo bu rüsuokiu tsüle gei balie,

⁶di sie puo ki, “No Ukepenuopfü Nuou üro, n thuo hageinu tetsucie; kekreilamonyü, ‘N la puo dieliemia ketseshütuo;’ tsiu ‘Süko u dziepie n mezalietuo, sidi n bu tsu ketsie geinu n phi zorei kesewa molietuo,’ sikecü thupiekezhü la” sita.

⁷Sitse Jisu puo ki, “ ‘No Niepuu n Kepenuopfü kedo suo,’ sikecü rei thupiezhü zo” sita.

⁸Süsie satan puo ze kijüthou kerükrie se puo gei vo di kijü nu kedirüvie vithedze chü zokecü pete tha puo kie.

⁹Sidi sie, “No tsu a rüsuo ro, a mha hako pete pie n tsüwatuo” sita.

¹⁰Sitse Jisu puo ki, “No tuotaliecie, Satan! Kekreilamonyü, ‘No Niepuu n Kepenuopfü rüsuolie, mu puo lie rübei chü zolie morosuo’ sikecü thupiekezhü la” sita.

¹¹Sitse satan puo khawata, siro teigeidielieko mhai vor puo meholieta.

¹²Siro Jisue mia Johan telieketa sishü tse, puo tuo rüdi Galil nu vota.

¹³Puo Nazaret khawa di vo Zebulun mu Naftali kijütsa dzükezha khie keba Kapernaum nu lhouta.

¹⁴Mha hau chüketa thiedzü siedzekesiu Isaya geinu:

¹⁵“Zebulun kijü nu, Naftali kijü, dzükezha khie kezhü chau, Jordan rükhie lu tsatie kebanie, Galil, Judakemoko kijüu,

¹⁶Kezeiu nu ketuo themiako, kezie kezha puo nguliete, kesia kijü mu puo khrü nu kebako gei kezie puo zie vorte” si pie kezhüu tseilieketuo la.

¹⁷Siro süyawinu Jisu mia petha sede di, “Nieko nou kediliecie, teigei kedi vor penuotei[7] bate” si tuota.

¹⁸Siro puo Galil dzükezha khie tuo vozhü ru, siezedzürie kenie, Simon, Pitor üyakezhau, mu puo siezeu Andria unie jal pie dzükezha nu khuo va ba di ngulie, unie khuoketemia zocü la.

¹⁹Sitse puo unie ki, “A siemedziliecie, siro a nnie pie themia ketemia chülietuo” sita.

²⁰Sitse unie unie jal kha mhawa di puo siemedzita.

²¹Siro puo tuo sa phizhü ru, siezedzürie kekrei kenie, Zebedi nuo Jakob mu Johan, unie-e unie puo Zebedi ze di rou-u nu jal pekhuo ba di ngu lalie, mu puo unie kieshü,

²²sitse unie rou mu unie puo kha mhawa di puo siemedzita.

²³Süsie Jisu tuo Galil kijü pete nu vo di sinagogko nunu mia petha mu kedi dze Dieliekevi pupie mia kie, sidi kechükenyü neiüko pete chü keshürhoshü.

²⁴Süki mia puo dze pu Siria kijü pete nu keza vota, süla mia kechükenyü neiü chü di kemezhie ketuo pete, terhuokesuo bu u kebi zetuoketako, terhuovüzieko mu rünyie tuoketako ze puo ki vor ru puo süko pete chü keshürhoshü.

²⁵Sitse Galil, Dekapoli, Jerusalem, Juda mu Jordan rükhie lu tsatie keba pete nu themia krodi keze puo siemedzita.