Read Angami Naga Mathi 5 Bible Online

Mathi 5 - Angami Naga bible

Mathi 5

¹Siro Jisu themia kroko ngushü di kijüthou gei khota; sidi puo kho balie tse, pethakelieko puo ki vor.

²Sitse puo uko pethavü, di sie:

³“Ruopfü kitsa ketsopfhüko thejakepfütho, kekreilamonyü teigei kedi süko vie zokecü la.

⁴“Krayakezhako thejakepfütho, kekreilamonyü süko u nouluolie zotuokecü la.

⁵“Kemiako kemoko thejakepfütho, kekreilamonyü süko kijüu pie u vie chü zotuokecü la.

⁶“Kemiatho dze pfhü keterhükemerü chüyakezhako thejakepfütho, kekreilamonyü süko pevülie zotuokecü la.

⁷“Mia ngumezhieyakezhako thejakepfütho, kekreilamonyü süko rei ngukemezhie ngulie zotuokecü la.

⁸“U nou kemesako thejakepfütho, kekreilamonyü süko Ukepenuopfü ngu zotuokecü la.

⁹“Vitho la mhachüyakezhako thejakepfütho, kekreilamonyü süko üse Ukepenuopfü nuonuo üdi kie zotuokecü la.

¹⁰“Kemiatho la mia bu u peseyakezhako thejakepfütho, kekreilamonyü teigei kedi süko vie zokecü la.

¹¹“A la mia nieko tha mu nie pese mu tijü di nie gei die kesuo neiüko pu ro nieko thejakepfütho.

¹²Nie neilie mu nie neithor zolie, kekreilamonyü teigei nie zhakhra vi se zotuokecü la, sütuoi mia thiedzü nie mhodzü ketuo siedzekesiko rei pese phi zo.

¹³“Nieko kijüu tsie zo, derei metsie puo kelhe jüta ro, kedipuo pie chü pelhelie ta? Süu kemethuo chütaya, sidi kelhouwa di mia bu kedewaya.

¹⁴“Nieko kijü kezie zo, kijüthou gei keba nadiu mia puo ngu motalie lho.

¹⁵Miapuorei mibou petulie di pie bie khro baya mo, derei pie mituba gei baya; siliro süu kinu kebako pete va pezielieya.

¹⁶Süsütuoi mia bu nie mhatho kevi ngu di teigei keba nieko Puou tshelieketuo la nie kezie pie mia va pezieliecie.”

¹⁷Nieko a ü Mosa zho-u mu siedzekesiko dieko bie pejüwatuoü vorkecü le hiecie, a süko bie pejüwatuoü monyü süko chü tseishütuoü kevor zo.

¹⁸Siro a nieko ki pu toushütuo, tei mu kijü jüta kemochie, mha hako peteko chü tseiwa kemochie thezho-u nunu leshükhu puo, “i” yo[8] rei jütalie lho zo.

¹⁹Süla kehoupuorei u bu chülienukeshü zho kecütho yopuo zorei chüüze mo, tsiu kekreimia bu rei chü hienu pethaya ro, teigei kedi nu puo üse kecütho chütuo, derei kehoupuorei süko chüüze mu pie mia pethaya ro, teigei kedi nu puo üse kezha chütuo.

²⁰Kekreilamonyü a nieko ki pu toushütuo, nie leshükesithoko mu Farisiko ki miathokuo mo liro, nie mhakipuorei teigei kedi nu lelie kenjü zo.

²¹“Nieko thiedzü, ‘No mia dukhri suo’; mu ‘Kehoupuorei mia dukhrikezhamia siazha ngu zotuo’ idi kepu silieta die.

²²Derei a nieko ki pushütuo, nie kehoupuorei puo siezedzürie ngu puo noumeyie ro puo siazha ngulie sü zo, tsiu kehoupuorei puo siezedzüriemia kengashü ro, pehüko kehou nu siazha ngu sü zo; mu mhanuü kehoupuorei mia ki, ‘No kenyamia zo’ iliro, mizie[9] nu siazha ngulie sü zo.

²³Süla no mha se ruosuoba nu kevo ki n siezedzüriemia n gei kenyakecü die huo keba n sie lelie ro,

²⁴mha se kevoko khapie ruosuobau mhodzünu zhüwa di vo n siezedzüriemia ze kezevilie perie di süze vor mha süko khashüliecie.

²⁵No dienyaki nu kevo cha nu tuoluocü nu n ze kenyakezhau ze kezevi mhaiwalie; mo liro n gei kenyakezhau n tepie capiu tsüwatuo, mu capiu n tepie kezhau dzie nu shüwa di n khapie kedieki nu shüwatuo.

²⁶A n ki pu toushütuo, no vo priesa yopuo ketso rei su tseiwa kemochie n bu sünunu parlie kenjütatuo.

²⁷“ ‘No pieü chü lho’ idi pupiekezhü no silieta die.

²⁸Derei a tsie nieko ki pushütuo, kehoupuorei thenumia mengu di puo meho ro, puo puo nou nu süpfü ze pieü chüwata zo.

²⁹Süla n mhi n zatsa n chü kephouma ro; n geinu kerülapie kelhouwacie, n mo peteu kelhoupie Gehena nu shükewau kirei n mo gei za puo jüketau we vikuo.

³⁰Mhanuü n dzie n zatsa n chü kephouma ro, süu da kelhouwacie; n mo peteu kelhoupie Gehena nu shükewau kirei n mo za puo jüketau we vikuotuo.

³¹“ ‘Siro themia kehoupuorei puo kimia khawatuo liro, puo khakewa leshü thupie puo kimia tsüwa morosuo’ ikecü rei pu die.

³²Derei a nieko ki pushütuo, kehoupuorei pierüü la zo kemosie puo kimia khawa ro, puo pie pieü kechümiapfü chüwata zo; mu kehoupuorei mia puo khakewapfü lie ro, puo rei pieü chüta zo.

³³“Süsie rei, ‘No tijü di rüse hie, derei no mhapuo chütuoü di Niepu-u ki phrashüwaketau chülie’ idi thiedzü pukeshüu nieko silieta die.

³⁴Derei a nieko ki pushütuo, mhapuorei pu rüse hie; teigei rei pu rüse hie, süue Ukepenuopfü kediba zocü la,

³⁵morei kijü rei pu hie, süusü puo phi bau zokecü la, morei Jerusalem rei pu hie, süue kedi kezhau nadi zokecü la.

³⁶Tsiu nie tsü rei pu rüse hie, no thaprü puorei chü pekra morei peteilie kelho la.

³⁷Derei n die bu ‘U’ ro ‘U’ ülie ‘Mo’ ro ‘Mo’ ülie, mo di süu zieta ro kesuou kinu nu zo.

³⁸“Nieko ‘Mhi puo khe mhi puo, mu hu puo khe hu puo’ idi pukeshü silieta die.

³⁹Derei a nie ki pushütuo, kesuokechümia mese chü hie, sikecüumonyü miapuonie n dzo n zatsa vü ro, kekreitsa rei kerei lapie puo tsücie;

⁴⁰mu mhanuü miapuonie n boulie lielie nyü di n ze kenyatuoüta ro n pfhe rei khashüwacie.

⁴¹mu miapuonie n kemvü chü di n ze maildo puo votuoü ro, puo ze kenie rei vocie,

⁴²kehoupuorei n ki mhacha ro kha puo tsücie, mu no mia n ki mha thepu nyü ro, puo melie hie.

⁴³“Siro thiedzü ‘N siezanuomia khrielie mu n ngumvümia ngumecülie’ idi kepu nie silieta die.

⁴⁴Derei a nieko ki pushütuo, Nie ngumvümia khrielie, mu nie peseyakezhako la chalie,

⁴⁵silie ro nieko teigei keba nie Puou nuonuoko chülietuo; kekreilamonyü puoe puo niaki pethupie kesuomia rei mu kevimia rei vashüya, mu tei perüpie kemiathomia rei mu miathokemomia rei vashüyakezha la.

⁴⁶Kekreilamonyü mhanuü nie mia nie khriekezhako khrieyakezha zo liro, nieko kedipuo zhakhra ngulie ta? Khezhanuo khruoyakezhako rei sükemhie chüya moü me?

⁴⁷Siro nieko nie siezedzüriemia rübei kelukezha zo liro, Judakemomia zorei sükemhie chüya zo moü me?

⁴⁸Süla teigei keba nieko Puou vi tseikecü tuoi nieko rei vi tseiliecie.