Read Angami Naga Mathi 6 Bible Online

Mathi 6 - Angami Naga bible

Mathi 6

¹“Nie mhatho kevi chükecü ki mia bu ngutuoü di mia kengu kinu chü molieketuo nie kireilie; kekreilamonyü nie sükemhie chüta ro teigei keba nieko Puou kinu zhakhra puorei ngulie lho.

²“Süla nie mha khapie mia ketsü ki ketherakezhako mia bu u tshetuoü sinagogko nu mu chapfüko nu chüyakezha tuoi ketsü kekhou kemhie shie tuo zo hiecie. A nieko ki pu toushütuo, süko we u zhakhra nguliete.

³Derei nieko we mha khakeshü ki nie zatsa pie khakeshüu nie vitsa bu si hie,

⁴Sitse nie mha khakeshüu pekhre di chülietuo; kepekhre nu ngu keba nie Puou nie zhakhra chüpie nie tsütuo.

⁵“Siro nieko chakecü ki ketherakezhamia mhieta hie, süko we mia bu uko nguketuo la sinagogko nu mu cha tietshüko nu tha di chakecü u nei phiya. A nieko ki pu toushütuo, süko we u zhakhra nguliete.

⁶Derei nieko chakecü ki nie kinutshekou le di ki khalie, sidi kepekhre nu keba nie Puou ki chalie, siliro mha kepekhreko nguyakezha nie Puou thuo nie zhakhra chü nie tsütuo.

⁷“Siro nie chakecü ki Judakemoko tuoi kepusie pu hie; kekreilamonyü ukoe die kekra pukeshü la uko kecha rünyülietuo nhiekecü leya.

⁸Nieko we uko mhieta hie; kekreilamonyü nieko Puou nie puo ki chakecü mhodzü nie tsopfhüko si phre baya.

⁹“Süla nie hamhie di chalie: Teigei kebau hie Puo; N za bu kemesau chüliecie,

¹⁰N kedi chü vorliecie; kijü ha rei pie teigei kemhie, n neiu chüliecie.

¹¹Thiethie va kha hie tsücie.[10]

¹²Siro hie kejoko vashü hie tsücie, Hie rei mia kejoko vapie mia tsükewa tuoi.

¹³Siro hie khapie kedokecü nu shü hiecie, Sikecüumonyü kesuou dzie nunu hie kelaliecie.[11]

¹⁴Kekreilamonyü nie mia kekrükewa vashü mia tsüwa ro, teigei keba nie Puou rei nie kejo vashü nie tsütuo.

¹⁵Sirei nieko mia kejo vashü mia tsü mo liro, nieko Puou rei nie kejo vashü nie tsülie lho.

¹⁶“Siro nieko mevokecü ki ketherakezhako tuoi nie thesuosiei tuota hiecie, süko zowe mia bu uko mevokecü ngu nyü di uko zie suosiei tuoya. A nieko ki pu toushütuo, uko we u zhakhra nguliete.

¹⁷Derei nieko zowe mevokecü ki, tier pie nie tsü kenhelie, mu nie zie rei tshuwalie,

¹⁸sidi nie mevokecü mia bu ngu hieü kepekhre nu keba nie Puou bu ngulie; siliro kepekhre nu keba nie Puou thuo nie zhakhra chüpie nie tsütuo.

¹⁹“Shülhe mu mhouthie bu cü pejüwayakezha mu kerügumia bu rhie le rügulieyakezha kijü nu nie kinyiko nie la kengu hiecie;

²⁰sikecüumonyü shülhe morei mhouthie bu cüwalie kelho, siro kerügumia rei rhie le rügulie kelho nie thuo nie la teigei kinyiko kenguliecie.

²¹Nie kinyi kebara nie nou rei sünu ba zotuokecü la.

²²“Umo mitu sü umhi zo. Süla nie mhi vi ba ro nie mo pete ziepoui batuo.

²³Derei nie mhi suo ro, nie mo pete zei bouitatuo. Süla nie nou keba kezieu zei ro kedithede zeita!

²⁴“Miapuorei niepumia kenie kituo chü keduolie kenjü; siliro puo mia puo ngumecüta mu kekreiu ngu puo neitatuo; puo mia puo kitsa bata di kekreiu thitatuo. Nie Ukepenuopfü mu kishükinyi kituo chü keduolie lho.

²⁵“Süla a nie ki puya, nie kelhou hau la kecükekrie dze morei nie mo la pfhemenei seketuoko le nie nou kemezhie hie. Nie kelhou nie ca ki zhakuo, tsiu nieko mo-u pfhemenei ki zhakuo moü me?

²⁶Teirako rüli leshücie; süko tsia se tsu vaya mo, re reiya mo, morei chü nu kengu reiya mo, derei teigei nieko Puou süko va thuo rei chüya ze! Nie süko ki zhakuo moü me?

²⁷Siro nieko supuonie puo noukemezhie di süu la puo kelhouzha thu puo chie rei chü pechalie vi ga?

²⁸Nieko kiüdi pfhemenei la nie noukemezhieya ga? Lie nu terhuobiepouko rüli le phicie; süko mhachümhalie morei terhiterhie rei chüya mo.

²⁹Sirei a pushütuo, Solomon puo rütsonyie vi phi zorei süko mhie kerütso mo.

³⁰Derei lie nu nha thie lhou ba rei sodu chüpie miphu nu shüwaketuoko, Ukepenuopfü süko rütso thuo rei chüshüya liro, harie nie kepele ketsako, puo süko kirei nie rütso chükuoshü motuo me?

³¹Süla nieko we, ‘Kedipuo cü mu krie’ morei ‘Kedipuo dziemeneituo shikecü’ le nie noukemezhie hie.

³²Judamiakemoko mha hako pete pfhü baya; derei nie mha süko pete ngulie morokesuo teigei keba nie Puoue si phre ba;

³³sirei nieko Ukepenuopfü kedi mu puo kemiatho pfhü perielie; silie ro mha süko pete pie nie tsü sashütuo.

³⁴“Süla sodu dze le nie nou kemezhie hie, kekreilamonyü sodu thuo sodu rüli medolietuo. Teisonhie puo thuo puo mezhie ba phre.