Read Angami Naga Mathi 7 Bible Online

Mathi 7 - Angami Naga bible

Mathi 7

¹“Nieko mia kejo pfhü hie, siliro mia rei nie pejo molietuo.

²Kekreilamonyü nie mia pejo ro sümhie nie pejoketuo la, tsiu nie mia gei chükeshü tuoi mia rei nie gei chü lashü zotuokecü la.

³Kiüdi n thuo n mhi nu seipe kebau le mo di n zanuou[12] mhi nu kerhu mehoya ga?

⁴Morei n mhi nu seipe kebau biewa mo di n zanuou ki, ‘A bu n mhi nu puo chuyo kawacie’ iya ga?

⁵No ketherakezhau, n thuo n mhi nu seipeu chüwa periecie, silie liro n zanuou mhi nu kerhu kebayo ngu meyiemeluo di kawatuo.

⁶“Mha mesakecüu khapie tefü tsü hiecie mu cümenyie puoma kerepfü kelhoupie thevo mhodzünu shü hie, süko u phi khronu kedewa mu reipar di nie mekhawa rei silie lhomu.

⁷“Chacie, siro pie nie tsütuo; pfhücie, siro nie ngulietuo; kikha ketouya zocie, siro khrüshü nie tsütuo.

⁸Kekreilamonyü kehoupuorei chayakezhamia khapie tsüya, mu kehoupuorei pfhüyakezhamia ngulieya, tsiu kikha khrüpie ketouyakezhamia tsüya.

⁹Siro nie donu supuonie puo nuoe niekhrüda cha ro, ketsie pie puo tsüya ga?

¹⁰Morei khuo puo cha ro tinyhü chüpie puo tsüya ga?

¹¹Nieko themia kesuomia zorei mha kevi pie nie nuonuo ketsü do siya ro teigei keba nie Puou we mha kevi pie mia puo ki chayakezhako tsü sa phi motuo me?

¹²“Süla mia nie gei kedipuo chüshü ro nie nei shiü nie rei mia gei sükemhie chüliecie; kekreilamonyü thezho-u mu siedzekesiko diebo-u hauha zocü la.

¹³“Nieko kharu kemereu ze lelie; kekreilamonyü keka nu voyakezha kharu-u meya mu cha süu rüü, tsiu themia kekra süu ze voya.

¹⁴Derei kerhei nu kevo kharu-u mere tsiu sünu voketuo chau re, mu mia huoyo rübei süu ngulieyakezha zo.

¹⁵“Ketijü siedzekesiko la nie kireiliecie, süko tekuo pfhenei se di nie ki vorzhie, derei uko nou we mia tekecü socie kro puo zo.

¹⁶Nieko uko si geinu uko silietuo. Zohu bo geinu khubesi rielie, morei kikhahu bo geinu chiedesi rielieya me?

¹⁷Süsütuoi sei kevi kheko puo si kevi vülieya, derei seibo kesuo khe puo si kesuo vütaya.

¹⁸Seibo kevi puorei puosi kesuo vütalie kenjü, mu sei kesuo puorei puosi kevi vülie kenjü.

¹⁹Siro seibo kehoupuorei puosi kevi vülieyakemo-u wiwa di kelhoupie mi nu shüwaya.

²⁰Sükemhie uko si geinu nie uko silietuo.

²¹“A üse, ‘Niepu-u, Niepu-u’ idi kieyakezha pete teigei kedi nu le phrelie lho, derei teigei keba a Puou medoko chüyakezhamia zotuo.

²²Teisozha sünhie mia kekra a ki, ‘Niepu-u, Niepu-u hie n za se siedzekesi die pu mo me? Mu hie n za se terhuokesuoko whuo mo me? Mu hie n za se kekuo kezha chü phi mo me?’ isi sietuo.

²³Sitse a uko ki, ‘A mhakipuorei nie si mowe; nieko mhakesuo kechüko, tuo a therhietacie’ sitatuo.

²⁴“Süla kehoupuorei a dieko rünyülie di süko chüüzeyakezhamia sü mhakesikelemia puo tsiekrie geinu puo ki chükelie mhie zo.

²⁵Süsie teirü tsur, dzü rei di sier, mu tei rei rükhrie vor ki süu va, derei puo vatsholie mota, kekreilamonyü ki süu tsiekrie geinu chükelie la.

²⁶Derei kehoupuorei a die hako rünyülie di süko chüüzeyakemomia sü mhalekemomia puo huocanyo geinu puo ki chükelieu mhie zo.

²⁷Teirü tsur, mu dzü rei di sier, tsiu tei rei rükhrie vor ki süu va; sidi süu vatshopie kerhepha zopie zhüwata” si.

²⁸Siro Jisu süko pu theshü tse themia krokoe puo kepetha die sishü di u ngota,

²⁹kekreilamonyü puo u donu thezho kepethamia mhie monyü u kekuo kenyimia mhie uko pethatakecü la.