Read Angami Naga Mathi 8 Bible Online

Mathi 8 - Angami Naga bible

Mathi 8

¹Siro Jisu kijüthou geinu kerlie tse themia krodi puo puo siemedzi tuota,

²süki mpa kechümia puo puo ki vor puo mhodzünu khoutoulie di sie, “Niepu-u, no n medo ro, a chü kemesa shülie vi zo” sita.

³Sitse puo puo dzie yhapie themia süu bie di sie, “A medowe, no mesaliecie” sishü. Mu sishü tse puo gei mpa kechüu vilieta.

⁴Sitse Jisu puo ki, “Harie, no mia puo kirei pu hiecie, derei mezhü zievo-u ki vo di puo bu n mehowacie; sidi mia bu no vilieketa silieketuo la Mosae chünukeshü ruosuo chüwacie” sishü.

⁵Süsie Jisu Kapernaum nu vorlie tse, krie mho kezhamia puo vor puo mezhiemelo di,

⁶“Niepu-u, a kituou rünyie di kemezhie se di kinu zhüya zolie” sita.

⁷Sitse Jisu puo ki, “A vor puo chü keshürhoshütuo” sishü.

⁸Sitse krie mhokezhau la sie, “Niepu-u a n bu a ki khrükhro ler sü mo, derei no dieca puo pushü zorei, a kituou shürholietuo.

⁹Kekreilamonyü a rei kezhamia khrükhro tuokezhamia zo; a khro rei chüpahimia ba. Siro a mia puo ki, ‘No tuo vocie,’ isi ro puo a die ze di voya; mu kekreimia puo bu ‘Vorcie,’ isi ro, puorei vorya; mu a kituou ki, ‘No mha hau chüshücie,’ isi ro, puo süu chüshüya” sita.

¹⁰Sitse Jisu die hau sikeshü ki puo ngota di puo siemedziketuoko ki, “A pu toushütuo, a Israelmia donu themia hau kepele decü mhakipuorei ngulie mo.

¹¹A nieko ki pu toushütuo, niathutsa mu niakratsa nu themia kekra vor teigei kedi nu Abraham mu Isak tsiu Jakob ze hietuo,

¹²derei kedi nuonuoko we kelhoupie chazou kezei nu shüwatuo, sünu kra mu u hu thegeipie batuo” sita.

¹³Sitse Jisu sie krie mhokezhau ki, “Tuo volie, mu n kepele kemhie chüpie n tsükelieu chücie” sishü. Siro sütei touki kituou shürholieta.

¹⁴Süsie Jisu tuo Pitor kinu le ru, Pitor kimianuo zuo rukizhü di ngulie.

¹⁵Sitse puo süpfü dzie bieshü ru puo ruki mota, di sie mha kesepie puo tsü bata.

¹⁶Mu sünhie thevatie mia terhuo kesuo bu u kebi ze tuoketa kekra ze Jisu ki vor, sitse puo die pushü di ruopfü süko whuowa, mu kechümiako pete chü keshürhoshü.

¹⁷Siro mha hau chükeshü geinu thiedzü siedzekesiu Isaya pukeshü “Puo u kesuo kemezieko mu kechükenyüko toupfüliete” isikeshüu chü tseilie.

¹⁸Süsie Jisue themia krodi puo vor puo houpfü ketha ngulie tse, dzükezha khie kekreitsa votanu di puo die khashü.

¹⁹Sitse thezho kepethamia puo vor di sie, “Kepethau, no kehourapuo vo rei a n siemedzituo” isi.

²⁰Ru Jisu sie puo ki, “Meseruko u ki nyi mu teirako rei u kru nyi, derei Themia Nuou we puo tsü se kezhü chü rei jü” sita.

²¹Siro pethakelie kekreimia puo rei, “Niepu-u a bu vo a puo khruwa periecie” isita.

²²Sitse Jisu sie, “A siemedzilie, mu kesiako bu kesiako khruwacie” isita.

²³Siro Jisu rou nu le balie tse, puoe pethakelieko puo siemedzi leta.

²⁴Sitse khriedi puo dzükezhau nu sierta, di rou-u bu rületatuoüta, derei Jisu we zezhü zo.

²⁵Süla pethakelieko puo kesou di sie, “Niepu-u, hieko kelashücie! hieko siatatuoüzhie!” sita.

²⁶Sitse puo uko üse, “Harie nie kepele ketsako nieko kiüdi michieya ga?” sita. Sidi puo sielie di teikhrie mu dzükezha kechüshü; sitse pete la zeita.

²⁷Süla uko ngo di sie, “Hau themia kikecü puota mu? Teikhrie mu dzükezha thuo rei puo die zeketa ha!” sita.

²⁸Süsie puo dzükezha khie kekreitsa Gadara[13] kijü nu vorlie tse, terhuokesuo bu u kebi zeketuo kenie mekhru nunu par puo ze keselie. Hanie u zho suo kemeriechü di mia pete bu cha sütsa vo michieya.

²⁹Süki unie shiekhoui di, “No Kepenuopfü Nuou, hienie pie kedipuo chütieya ga? No puoteiu tsokemo nu hienie pechütuoü vorya me?” sita.

³⁰Süki thevo krodi puo ratsa nu mha nge cütuo,

³¹Sitse terhuokesuoko puo ki cha di, “No hie whuowatuoü liro, hie ketsepie thevo kro-u nu shücie” sita.

³²Sitse Jisu sie uko ki, “Votalie” ishü, sitse süko ta thevoko gei leta; siro thevo kro-u ta tsiekhie geinu rüsou dzükezha nu tsu di sia phreta.

³³Süki thevo kepfheko ta rünau nu vo terhuokesuo bu u kebi ze ketuonie gei kedipuo chüte shikecü dze pete pie mia ki pushü.

³⁴Süla rünau pete Jisu ze kesetuoü par; mu uko puo ngulie tse, Puo bu uko kijü therhietanu di chata.