Read Angami Naga Mathi 9 Bible Online

Mathi 9 - Angami Naga bible

Mathi 9

¹Süsie Jisu rou nu lelie di dzükezhau cie puo thuo puo ra vota.

²Sitse mia thezhü geinu kerünyiemia puo toupie vor. Süki Jisu uko kepele ngushü di kerünyieu ki, “A nuo, n dzüzieliecie; n kephoumako vapie n tsüwate ho” sishü.

³Sitse thezho kepethako huoniehuo nupu di sie, “Themia hau Ukepenuopfü kethadie pute!” isita.

⁴Derei Jisu uko nouleko silie di sie, “Nieko kiüdi nie nou mha kesuo leya ga?

⁵‘N kephouma vapie n tsüwate ho,’ idi kepu-u rüükuotuo mo, ‘No sielie di chatuoliecie,’ isi di kepu-u rüükuotuo ga?

⁶Derei nieko bu Themia Nuou kijüu nu kephoumako valie kevi kekuo ba ükecü silieketuo la.” sishü di puo kerünyieu ki, “Sielie di n zhü chüpielie di tuo n kinu voliecie!” sishü.

⁷Sitse themia süu sielie di tuo puo kinu vota.

⁸Süki themiako süu ngu di michieta, tsiu kekuo sükemhie khapie themia nuo tsüshüketa la Ukepenuopfü tsheta.

⁹Siro Jisu tuo vozhü ru, puo za Mathi ükecü puo khezhanuo kekhruoba nu ba di ngulie; sitse puo sie puo ki, “A siemedziliecie” sishü. Ru puo sielie di puo siemedzita.

¹⁰Süsie puo mhacütuoü di le kinu balie[14] tse, khezhanuo kekhruomia mu kephoumamia kekra vor Jisu mu puoe pethakelieko ze balie.

¹¹Siro Farisiko hau ngushü di sie puoe pethakelieko ki, “Kiüdi nieko kepethau khezhanuo kekhruomia mu kephoumako ze mhacüya mu?” idi ketsota.

¹²Derei puo süu sikeshü ki sie, “Keshürhomia darukesimia se morei vi, derei kechümiako la zo.

¹³Nieko vo di ‘Ae ruosuou monyü ngukemezhie a neiya’ isi pieketuo dieu ca siliecie. Kekreilamonyü a miathoko monyü kephoumako kietuoü vor zokecü la” sita.

¹⁴Sitse Johan siedziko Jisu ki vor di sie, “Hieko mu Farisiko tsiemelie mevoya, sirei kiüdi noe pethakelieko mevoya mo ga?” sidi ketso.

¹⁵Sitse Jisu sie, “Nuyiehe nu yasau uko ze kebachie puo khriethoko thenousuo balie vi me? Derei uko kinu yasau zetaketuo teisozhako vortuo, süsie uko mevotuo.

¹⁶Siro miapuorei pfhe rütatakemo pie vo pfhekra pekhuoya mo; kekreilamonyü pie vo pekhuoshü ro u pfheyo pfhe lu-u shürhapfütaya, mu rürha kechütayacü la.

¹⁷Siro miapuorei khubezu kerünyie üse chüzhüsü kewe nu shüya mo; sishü ümharo chüzhüsü pfü phawatuo, sidi khubezu bu krutatuo, mu chüzhüsü rei suotatuo; derei mia khubezu kerünyie pie chüzhüsü kesa nu shüya; sitse kenienie rei krulieya” sita.

¹⁸Siro puo die hako pu ketha nu, sinagog nu pehümia puo puo ki vor di tsu puo mhodzünu khoutoupfülie di, “A nuopfü tsieki nu siate; derei no vor n dzie yhapie puo gei shü ro, puo rheilietuo” si.

¹⁹Süla Jisu sielie di tuo puo siemedzi vota, mu puoe pethakelieko rei puo ze vo.

²⁰Siro süki cie kerekenie thezie kru di kemezhie tuoketamiapfü puo Jisu sietsa vor di puo pfhe phrie bie,

²¹kekreilamonyü süpfü puo thuo puo nounu, “A puo pfhe bielie zorei shürholietuo” isi tuo.

²²Süki Jisu reipra süpfü ngulie di, “A nuopfü, n dzüzieliecie! N kepele thuo n chü keshürhoshüwate ho” ishü. Ru thenupfü shürho mhalieta.

²³Siro Jisu tuo vor pehüu ki tsokelie ki luoü kekhouko mu thekrü kechü kro-u ngushü tse,

²⁴puo sie, “Nieko tuo rüditacie! Unuopfü siata mo derei zekezhü zo” sishü. Sitse uko puo kreta.

²⁵Derei themiako bu kitie prata tse, puo le puo dzie teshüshü ru rüüpfü sierlieta.

²⁶Sitse thedze hau kijü sütsatie thechü pete nu pu keza vota.

²⁷Süsie Jisu thechü sünu nu tuo vozhü tse, mhiciemia kenie puo siemedzi vor shiekhoui di sie, “David nuou, no hienie ngumezhieshücie!” isi tuota.

²⁸Siro puo tuo kinu le tse, mhicienie puo ki vor, süla Jisu sie unie ki, “A hau chülie viükecü nnie peleya me?” si. Sitse unie sie puo ki, “Uwe, Niepu-u” sita.

²⁹Sitse Jisu unie mhi bie di sie, “Nnie gei nnie kepele kemhie chüliecie” sishü.

³⁰Sitse unie mhi mha ngu parta. Ru Jisu unie kha bei di sie, “Mia puo bu rei hau si hiecie” ishü.

³¹Derei unie pra di kijü sütsatie thechü pete nu puo dze puwata.

³²Siro uko tuotazhü tse mia terhuokesuo bu puo zetuoketa keliehuo puo ze puo ki vor.

³³Siro terhuokesuou whuowa tse keliehuou diepu lalieta; süla themia kroko u ngo di sie, “Thiedzü mhakipuorei Israel nu hakemhie ngu chie mo” si.

³⁴Derei Farisiko sie, “Puo terhuokesuoko kediu ze di terhuokesuo whuoketuo zo” sita.

³⁵Süsie Jisue nadiko mu socüsonuo peteko nu vo, sidi uko sinagogko nu le mia petha, mu kedi dieliekeviu pu mia kie, tsiu kechükenyü mu kesuokemezie neiüko chü keshürhoshü.

³⁶Siro puo themia kroko ngu tse, puo süko ngumezhie phita, kekreilamonyü sükoe tekuo u kepfhe kejü tuoi kemezhie mu cüre tuoketa la.

³⁷Süla puo sie puoe pethakelieko ki, “Lieyie kra phizhü, derei mhathomia we tsa,

³⁸süla lieyie Niepu-u bu mhathomia ketsepie puo lie nu shülieketuo la chaliecie” sishü.