Read Angami Naga Mark 1 Bible Online

Mark 1 - Angami Naga bible

Mark 1

¹Ukepenuopfü Nuou Jisu Khrista, dieliekevi die therieu:

²Süu Isaya siedzekesiu thupiekezhü mhie di, “Harie, n mhodzü a chalieu ketseshütuo, puo n cha keseshütuo;

³Mia puo rayha nunu shiekhoui di; ‘Niepuu cha keseliecie, puo chako chükemezhüliecie!’ isipie kezhü mhie!” sita.

⁴Siro Johan mia baptaiz kechüu rayha nu vor di kephoumako valieketuo la thenou kedikelie dzülukepfü se mia petha.

⁵Süki Judia kijü pete nu mu Jerusalemmia pete puo ki pra di u thuo u kephoumako phra phre di Jordan rü nunu dzülupfülie.

⁶Siro Johan-e ut mie pie kechü pfhenei se mu chüzhü chiepha se puo chie phapfü, ku mu mepfhidzü se puo ca chü.

⁷Siro puo pucü, “Mia puo a sie vorkezhüu a ki zhakuo; a nuketsu puo phikou pha rei phreilie sü mo.

⁸A we dzü nunu nieko baptaiz chükeshü zo, derei puo we Kemesa Ruopfü nu nieko baptaiz chütuo” isi.

⁹Siro sükisü Jisu Galil kijü Nazaret nunu vor di Jordan rü nunu Johan bu puo baptaiz chü.

¹⁰Siro Jisu dzü nunu parlie mumetha puoe tei kokeshü mu Ruopfüu mekhru rhi kemhie puo gei tsurkecü ngu.

¹¹Süsie teigeinu mhapfhe puo; “No a Nuo a khrieu; a n ngu a neithor zo” isi ker.

¹²Süsie Ruopfüu puo hüze mhai rayha nu vota.

¹³Siro zha hiedia rayha nu ba di Satan bu puo kedo; sidi puo nhachüko ze ba mu teigeidielieko puo vaphi tuo zo.

¹⁴Siro mia Johan telieketa sie, Jisu Galil nu vor di Ukepenuopfü dieliekeviu pie mia petha,

¹⁵di sie, “Puotei sü tso bate, Ukepenuopfü kedi vor penuo bate, thenoukedilie di dieliekeviu peleliecie” si tuota.

¹⁶Siro Jisu Galil dzükezha khie tuo vokezhü ki, khuoketemia kenie, Simon mu puo siezeu Andria unie jal se khuote tuo di ngulie.

¹⁷Sitse Jisu unie ki, “Nnie a siemedziliecie, siro a nnie bu themia ketemia chütatuo” sishü.

¹⁸Sitse unie unie jal kha mhawa di puo siemedzita.

¹⁹Süsie puo tuo za phizhü ru, Zebedi nuo Jakob mu puo siezeu Johan unie rou nunu unie jal pekhuo ba di ngulie.

²⁰Si mumetha puo unie kieshü; sitse unie unie puo Zebedi mu zhakhrü zeketuoko khapie rou nu bawa di puo siemedzita.

²¹Siro uko Kapernaum nu vorlie; sidi sabat vorlie tse, puoe sinagog nu le di mia petha.

²²Sitse uko puo kepetha dieko sishü di u ngota, kekreilamonyü puo thezhokepethako mhie monyü puo kekuo nyi se di mia pethakecü la.

²³Sütei touki mesakemo ruopfü bu puo kebi setuoketamia puo sinagog nu ba,

²⁴ru puo ruorüi di sie, “Nazaret Jisu, no hieko ze kedipuo chü nyüya ga? No hieko pekawatuoü hanu vor me? A n si, no Ukepenuopfü Kemesau zo” sita.

²⁵Derei Jisu puo kerhie di sie, “Kemekrietalie, sidi puo geinu partacie!”

²⁶Sitse mesakemo ruopfüu themiau pfükelhou ruorüishü di puo geinu prata.

²⁷Themia pete u ngopie mhapuochü di sie huoniehuo üse, “Hau kedipuotemu? Puo kekuo kenyi kepetha die kesa puote! Puo mesakemo ruopfüko kirei mha pushü ru süko puo diezete” sita.

²⁸Süsie puo dze süu Galil kijü pete nu keza mhamha vota.

²⁹Süsie uko sinagog nunu tuota, sidi uko Jakob mu Johan ze salie di Simon mu Andria unie kinu leta.

³⁰Süki Simon kimianuo zuo ruki zhü, mu uko hapfü dze pie puo ki pu mhashü.

³¹Sitse puo süpfü ki phi di puo dzie teshülie di puo phoushü. Ru puo rukiu lata mu puo sie uko lie chü merei bata.

³²Süsie niaki leta mu thevatieta tse, mia kechükenyü mu terhuokesuo bu u kebi zeketuo kekra ze Jisu ki vor.

³³Siro nadiu nu themia pete vor kitie nu kengu phrelie.

³⁴Sidi puo kechükenyü neiüko kekra rei chükeshürhoshü mu terhuo kesuo kekra rei whuowa; mu puo terhuo kesuoko bu mhapuorei pu mota, kekreilamonyü süko puo supuo shicü siketa la.

³⁵Süsieduü, teiso pi parkemo nu puo sielie di tuo mia kejüra puo vo di kechachü ba.

³⁶Sitse Simon mu puo zeko puo pfhü vor.

³⁷Sidi uko puo ngulie tse, puo ki, “Mia pete n pfhü tuotelie” sishü.

³⁸Siru puo sie, “Úko tuose sonuoki rünako nu vo khe, a bu süko nu rei mia pethashüketuo la; kekreilamonyü a süu chüketuo la kevor zo” sita.

³⁹Sidi puo Galil kijü pete nu vo di mia petha mu terhuokesuoko rei whuo tuota.

⁴⁰Siro mpa kechümia puo vor di puo mhodzünu khoutoulie di sie, “N medo üro, no a chü kemesalie vi zo” idi puo mezhie melota.

⁴¹Ru Jisu puo noumezhie di puo dzie yhapie süu nyüshü di sie “A medowe, no mesaliecie” sishü.

⁴²Sitse mpa kechüu puo geinu vi mhata, sidi puo mesata.

⁴³Süsie puo süu kha bei di kenourhei puo ketsewa,

⁴⁴di sie, “No hau dze mia puo kirei pu hiecie, derei no zievo-u ki vo di n mo pie puo pekieshücie, sidi mia bu silieketuo la, n chü kemesalieketa ruotho Mosa pupiekezhüko chüwaliecie” sishü.

⁴⁵Derei puo vo süu dze pu phi di, dieu pu keza tuota, süla Jisu bu rüna puo nu rei lelie suo di vo rüna khie tuota; mu mia lukihaki nu puo ki vorta.