Read Angami Naga Mark 10 Bible Online

Mark 10 - Angami Naga bible

Mark 10

¹Puo sünu nu tuo Judia kijü merhieko nu mu Jordan khie kekreitsa vota. Sitse mia krodi puo la vor puo houpfülie. Mu puo chü seiyakezha tuoi uko petha lashü.

²Süki Farisiko huo vor puo kedo di sie, “Mia puo puo kimia vakewa thezho me?” idi ketsota.

³Sitse puo uko ki, “Mosa nieko ki kedipuo pu ga?” si.

⁴Uko sie, “Mosae puo bu vakewa leshü puo thulie di puo kimia ketsewanulie” sita.

⁵Derei Jisu uko ki, “Nie nou kere la Mosa die hau thukeshü zo.

⁶Derei sietsenu chükeshüu we ‘Ukepenuopfü thenumia mu thepfumia chükeshü zo.’

⁷‘Süla mia puoe puo puo zuo khawa di puo kimia penoutatuo,

⁸di unie chü puo chütatuo.’ Sidi unie-e kenie monyü chü puota zo.

⁹Süla Ukepenuopfüe chü kesakeshüu themia bu chükhowa hiecie” ita.

¹⁰Süsie pethakeliekoe kinu nu puo ki hau dze ketso la.

¹¹Sitse puo uko ki, “Themia kehoupuorei puo kimia khawa di thenu kekrei lieta ro, puo kimia mhodzünu pieü chüta zo;

¹²mu thenupfü rei puo nupfu khawa di thepfu kekrei ki nyi lata ro, süpfü rei pieü chüta zo” sita.

¹³Süsie mia Jisu bu nhicuko bieshünu di nhicunuomia kro puo ze puo ki vor; derei pethakelieko süko kerhieta.

¹⁴Derei Jisu süu ngu di puo nei mota, sidi uko ki, “Nhicuko bu a ki vorliecie; uko kha hie, Ukepenuopfü kedi-e hamhiecüko vie zocü la.

¹⁵A nieko ki pu toushütuo, kehoupuorei nhicunuomia yopuo tuoi Ukepenuopfü kedi lielie kemosie puo sünu lelie kenjü zo” sita.

¹⁶Süsie puo nhicuko toupielie, tsiu puo dzie yhapie uko geishü di japie uko tsüshü.

¹⁷Siro puo tuo vozhü tse, mia puo ta vor di puo mhodzünu khoutoupfülie, di puo ki, “Kepetha keviu, a kechachie kerhei ngulieketuo la kedipuo chülie morosuo ga?” idi ketso.

¹⁸Sitse Jisu puo ki, “No kiüdi a ü keviu üya ga? Ukepenuopfü rübei sie miapuorei vi mo.

¹⁹No diekhakeshüko si ba: ‘No mia dukhri lho; no pieü chü lho; no mha rügu lho; no ketijü zhapu chü lho; no mia sekeda lho; N puo n zuo rhulie’ icüko” sishü.

²⁰Sitse puoe puo ki, “Kepethau, a a nhicu nunu mha hako pete ze tuote,” sita.

²¹Sitse Jisu puo meho terü chü mu puo khriecü la puo ki, “No mha puo tso mo baluo, no vo n vie kebako zelie di pie mhakejüko tsüwalie, siliro teigei n kinyi nyilietuo; sidi vor a siemedzilie!” sishü.

²²Siro puo süu sishü tse puo kedewata sidi puo thesuosiei di tuota, kekreilamonyü puo mhanyi phicü la.

²³Süsie Jisu rürei lutsahatsa meho di sie puo pethakelieko ki, “Kidepuorei mhakenyimia Ukepenuopfü kedi nu le retie shi ha!” si.

²⁴Sitse pethakelieko die hako la u ngo phita. Derei Jisu uko ki, “Nhicuko, u kinyi pelekezhako Ukepenuopfü kedi nu leketuo kide retie shi!

²⁵Kenyimia puo Ukepenuopfü kedi nu kele kirei ut puo bu thepremei nu kepra we rüükuotuo” sita.

²⁶Sitse uko u ngo phi di sie huoniehuo ki, “Di siro supuonie kelalie vituo ga?” ibata.

²⁷Süla Jisu uko meho di sie, “Themia zowe süu chülie kenjü, derei Ukepenuopfü la we si mo zo; Ukepenuopfüe mhakehoupuorei chülie vi,” sita.

²⁸Sitse Pitor sie puo ki, “Harie, hie we mha pete khawa di n siemedzi tuote” si

²⁹Süki Jisu sie, “A nieko ki pu toushütuo, kehoupuorei a la mu dieliekeviu la puo ki morei puo siezedzürie morei puo üpfünuo morei puo zuo morei puo puo morei puo nuonuo morei puo kiülie vakewamia,

³⁰puoe tsie kelhouu nu mia bu u pechüpenyükecü sa di, puo kiko, puo siezedzürie, puo üpfünuo, puo zuonuo, mu puo nuonuo tsiu puo kiülie de thekrie kezie ngulie kelho ba mo, tsiu hasie kelhou nu kechachie kerhei sa ngutuo.

³¹Derei kerieko kekra nuotatuo mu kenuoko kekra rietatuo” sita.

³²Siro uko Jerusalem nu khotuoü cha nu vozhü, mu Jisu uko mhodzü rietuo, ukoe u ngopfü tuo, mu puo siemedziketuoko rei michietuo. Sitse puo kerekenieko ze krei lalie di puo gei mhachü vorketuo dzeko pu uko kie,

³³sidi sie, “Harie, úko Jerusalem nu khotuoüzhie, mu mia Themia Nuou tepie phichükezhako mu Thezhokepethako dzienu shüwatuo, sidi uko puo pejo di dukhriwatuo; süsie uko puo khapie Judakemoko dzienu shütuo;

³⁴tsiu uko puo se kethekre puo mho mhitsie, puo vü mu puo dukhrituo; derei zha se sie puo rheilasielietuo” sita.

³⁵Süsie Zebedi nuonie Jakob mu Johan unie puo ki vor di sie, “Kepethau, hienie n ki mhakehoupuo cha rei n bu süu pie hienie tsü nyüyalie” sishü.

³⁶Mu puo unie ki, “A bu nnie la kedipuo chüshü nyüya ga?” si.

³⁷Sitse unie sie puo ki, “No zayie kechü ki hienie mia puo bu n zatsa mu mia puo bu n vitsa banu chaya” sita.

³⁸Derei Jisu sie unie ki, “Nnie chaketuou si di chatha mo. Nnie a krietuoü keba hieu krielie vi me? morei a dzülupfü morokesuo dzüluu pfülie vi me?” sishü.

³⁹Süki unie sie, “Hienie chülie vi” sita. Ru Jisu sie unie ki, “Nnie a krietuoü keba hieu krielie vi mu a dzülupfütuoü keba dzüluu pfülie vi zotuo,

⁴⁰derei a zatsa morei a vitsa baketuo we a thuo khashülie kenjü; derei khapie tsütuoü di kesepie ketuomia tsü zotuo” sishü.

⁴¹Siro mia kerko süu sishü tse, sie Jakob mu Johan unie gei uko nei mota.

⁴²Süla Jisu uko kielie di uko ki, “Judakemoko u mhokezhamia üyakezhako mia mhokekuo seya, mu kezhakoe u zhosuo se di uko kekha tseise bayakezha nieko si ba.

⁴³Derei nieko donu we silie lho; sirei nie kehoupuorei zha kenyüu bu nie theke chütuo;

⁴⁴mu kehoupuorei rie kenyüu bu nieko peteko theke chütuo.

⁴⁵Kekreilamonyü Themia Nuou rei mia bu puo theketuoü monyü mia theketuoü mu puo phou khashü themia kekra rhalietuoü vor zokecü la” sita.

⁴⁶Uko Jeriko nu vorlie. Siro puo mu puoe pethakelieko themia krodiu ze Jeriko nunu latazhü tse, Bartima ükecü Tima nuou puo mhicie di khruocüyakezhau cha khieki ba di ngulie.

⁴⁷Süu Nazaret Jisu süki tuoücü silie tse, puo shiekhoui di sie, “David Nuou, Jisu, a ngumezhieshücie!” isi bata.

⁴⁸Sitse themia kekra puo bu kemekrie batanu di puo kechüta, derei puo shie kechü sa di, “David Nuou, a ngumezhieshücie” ita.

⁴⁹Sitse Jisu thalie di sie, “Puo kieshücie” ita. Sitse uko mhicieu kielie di puo ki, “N dzüzielie, sieliecie, puo n kiezhie” sishü.

⁵⁰Sitse puo puo pfheu rhuo kelhouwa di prou zo Jisu ki vor.

⁵¹Sitse Jisu puo ki, “A bu n gei kedipuo chüshü nyüya ga?” idi ketso. Mhicieu sie puo ki, “Rabi[15], a bu mha ngulieyi” sishü.

⁵²Sitse Jisu puo ki, “Tuo volie, n kepele thuo n chü pevishüwate ho!” si. Sitse puo mhi mhangulieta, sidi puo cha ze puo siemedzi tuota.