Read Angami Naga Mark 11 Bible Online

Mark 11 - Angami Naga bible

Mark 11

¹Siro uko tuo Jerusalem kepenuo ki Betfage mu Bethani rünanie khie Oliv kijüthou gei vorlie, sitse puoe pethakelie kenie ketseshü,

²di sie unie ki, “Tuo se n nie mhodzütsa keba rünau nu vocie, mu nnie sünu volie mumetha, nnie miapuorei puo gei siekemo gada yopuo khepie tha di ngulietuo ho; süyo phreilie di ze vorlie.

³mia huo nnie ki, ‘N nie kidi hiya ga?’ idi ketso ro, ‘Niepuu hau se morosuoyalie, mu puo ketse lapie hanu mhai shüwatuo?’ isiliecie” sishü.

⁴Süla unie tuo vo tse cha khie kikha kepenuoki puo nu mia gada yopuo khepie ketha ngulie. Süla unie süyo phrei tha tse,

⁵Süki kethako huomia sie, “Nnie kiüdi gadayo phrei tha ga?” sita.

⁶Süla unie rei Jisu unie ki kepu mhie pushü; sitse süko unie bu süyo phreilieta.

⁷Süsie unie gadayo ze Jisu ki vorlie tse, uko pfheko pie süyo gei khrashülie; sidi puo bu süu gei balie.

⁸Siro themia kekra u pfhepie cha khrashü, mu kekreiko lie nunu seico zapie chau khrashü.

⁹Siro themia puo mhodzütsa ketuoko mu puo sietsa ketuoko shiekhoui di sie, “Hosana! Niepuu za se vorkezhüu thejakepfütho zo!

¹⁰U puou David kedi vorkezhüu thejakepfütho zo! Teipesotho gei rei Hosana!” isi tuota.

¹¹Süsie puo Jerusalem nu lelie di rüsuoki nu vorlie; siro puo reipra lutsahatsa mha pete mehoshü, mu menuotazhükecü la, puoe kerekenieko zelie di tuo Bethani nu vota.

¹²Süsie nhie uko Bethani nunu parkezhü ki puo va merüta.

¹³Sidi puoe kepecie nunu chiedebo puo puo nyü thekeba ngushü mu sügeinu mha huo ngulietuo nhie idi vo. Derei puo süki vor tse, puo nyü sie mhapuorei ngulie mo, kekreilamonyü süki chiedesi kevü tei mocü la.

¹⁴Sitse puo süu üse, “Mhakipuorei miapuorei bu n geinu n si cü lalie lhote” sita. Sükisü puoe pethakelieko die süu si.

¹⁵Süsie uko Jerusalem nu vorlie. Sidi puo rüsuoki nu le di sünu mha khrü mu zekebako pete whuota, siro puo priesa kelikebako mizhü mu paruonuo kezebako phou pela phrewa;

¹⁶sidi puo mia puo bu rei mha pie di tuo rüsuoki nu vo mvüta.

¹⁷Siro puo uko petha di sie, “ ‘A kiü üse themia neiüko pete la kechaki puo chütuo ikecü thupiezhü mo me?’ Derei nieko hau pie kerügumia ki puo chü bate” sita.

¹⁸Sitse phichükezhako mu thezhokepethako süu sishü di, uko puo dukhrikewa cha pfhüvüta; ukoe puo preicü la, kekreilamonyü themia krodiu pete puo kepetha die la u ngo phretacü la.

¹⁹Süsie thevatieta tse, Jisu mu puoe pethakelieko nadiu nunu tuota.

²⁰Siro süsieduü uko tuo vokezhü ki, chiedebo-u sia zotsu puo mie tsokeba ngulie.

²¹Sitse Pitor puo sielelie di sie puo ki, “Rabi, mehoshücie! No rüsekewa chiedebo-u sü siate” sishü.

²²Sitse Jisu uko ki, “Ukepenuopfü gei nie kepele nyiliecie,[16]

²³A nieko ki pu toushütuo, nieko kijüthou hau ki, ‘No rülou dzükezha nu letacie,’ idi kenoudo moto di puoe pukeshüu chülieketuo pele tou liro süu chülie zotuo.

²⁴Süla a nieko ki puya, nieko nie mezhiemelo di mhakehoupuorei chashü ro, süu ngulieta ükecü pelelie, sitse süu ngulie zotuo.

²⁵“Siro nie kehoukipuorei chatuo üdi siethakelie ki, huomia gei nie nei kemo ba ro vashü tsüwaliecie, sitse nieko Puou rei nie kejokemouko vashü nie tsütuo” sishü.

²⁶“Derei nie kekreimiako kejo vashü mo ro teigei nieko Puo rei nie kejoko vashülie lho” sita.

²⁷Süsie uko Jerusalem nu la vorlie. Siro puo kerüsuokiu nu tuo vokezhü ki, zievo kezhako, thezhokepethako mu phichüko puo ki vor,

²⁸di puo üse, “No kedipuo kekuo se mha hako chütuoya ga? Supuo n bu mha hako chülie kevi kekuo kha n tsü ga?” sita.

²⁹Sitse Jisu uko ki, “A nieko ki mha puo ketsotuo, nieko a die kelashücie, siliro a rei kedipuo kekuo se mha hako chütuo shicü pie nieko ki pushütuo

³⁰Johan mia baptaiz chükezhau teigeinu vor mo themia ki nu vor ga? A die kelashücie” sita.

³¹Sitse uko thuo kemeü di sie, “We, ‘Teigeinuwe’ ishü ro puoe sie, ‘Di siro nieko kiüdi puo pele mo ga’ isituo.

³²Derei we sie, ‘Themia ki nu vorwe’ ishütuoü rei” uko themia kro-u prei, kekreilamonyü themia pete puo üse siedzekesi kethomia puo üdi peleyacü la.

³³Süla uko Jisu ki, “Hie si mo” ishü. Sitse Jisu uko ki, “Siro a rei kedipuo kekuo se mha hako chüya shicü nieko ki pulie lho” siwata.