Read Angami Naga Mark 12 Bible Online

Mark 12 - Angami Naga bible

Mark 12

¹Siro puo dievi nunu uko ki mha pu di sie, “Thiedzü mia puo khube lietsa puo cielie di cakhapie süu houlie, khubedzü theketuo la zutse chülie, mu rükhouba puo chülie; sidi khapie lieciemia kro puo pelewa di rüna kekreira vota.

²Siro rieketuo teiu vor tse, khubesi puo ya meseko pfhükenguketuo la kituomia puo ketsepie lie nyiekebako ki shü.

³Derei uko puo telie di puo vüwa, mu dziethuo di puo ketsewa.

⁴Siro puo kituo kekrei puo ketse lashü, siru uko puo tsü vükerüzashü di puo pie kezhasewa.

⁵Süsie puo kekrei puo ketse lashü, sitse uko süu dukhriwa. Siro uko sükemhie di theke kekrei kekra rei vüshü mu dukhriwata.

⁶Puo tsierei mia puo baluo, süu puo nuo puo khrieu zo. Süla puo sie, ‘Uko a nuou sü rhulietuo nhie’ idi thela nu puo nuou ketsepie uko ki shü.

⁷Derei lieu nyiesekebako sie huoniehuo ki, ‘Hauha kayieute; khe, uko puo dukhriwatuo, sitse puo kayieu sü u vie chütatuo’ sita.

⁸Süla uko puo telie mu dukhriwa di kelhoupie khube lieu nhaphie shüwa.

⁹Siliro khube lie niepuu kedipuo chütuoü sie ta? Puo vor di lie nyiesekebako pekawa di khubelieu khapie kekreimia tsüwatuo.

¹⁰Nieko ketholeshü hau phrü mo zo me: ‘Kikechüko khawaketa tsieu mia süu pie puo ke nu tsie kemeyietho-u chüte;

¹¹Süu Niepuu thuo chüshü zo, mu süu u mhiki we u ngo zo’ ” sita.

¹²Siro ukoe puo uko pehe di dievi hau puketa silie tse, uko puo telie nyüsie, derei uko themia krodiu preita. Süla uko puo khawa di tuota.

¹³Süsie uko puo die nunu puo tekelie le di Farisiko huo mu Herod kro-u nu huomia ketsepie puo ki shü.

¹⁴Siro uko vor di sie puo ki, “Kepethau, no dietho mu mia puo gei rei n nei si kreiya mokecü hie si ba; kekreilamonyü no miapuorei rhu pekreiya mocü la, derei ketho-u se di Ukepenuopfü zho-u pie pethashüya. Khezhanuo khruo khruopie Kaisar tsü ro thezho-u petsoute me?

¹⁵Hie bu süu khashütuo mo lho ga?” sita Derei uko kethera ketuo ngu di puo sie, “Kiüdi nieko a kedo nyüya ga? Denari puo se vor di a bu mehoshücie” si.

¹⁶Sitse uko puo se vorshü. Süla puo uko ki, “Hau supuo tsü mu supuo za tuo ga?” ishü sitse uko sie, “Kaisar zo” sita.

¹⁷Süla Jisu sie uko ki, “Kaisar vieko pie Kaisar tsüwalie mu Ukepenuopfü vieko pie Ukepenuopfü tsüwalie” sita. Sitse uko puo la uko ngo phita.

¹⁸Süsie Sadukiko, kesiamia rheilasielie lho üdi puyakezhako puo ki vor di sie,

¹⁹“Kepethau, Mosa hie la thukeshü mhanuü mia puoe puo nuo jü di siata ro puo siezeu bu puo kimiapfü lie di puo dzürieu yie pelhounu di pu.

²⁰Siro thiedzü mia thenie keze siezedzürie chü, uko donu phichütho-u kiyalie, derei puo nuonuo jü di siata;

²¹sidi kenieu bu sami süpfü lie ru süu rei puo nuo jü di siata; sükemhie di mia seu rei siata.

²²Sidi thenieko pete u nuonuo jü di siata. Süsie thela nu thenupfü rei siata.

²³Siro rheilakesie[17] ki süpfü uko supuo kimia chü ta? kekreilamonyü thenieko puo lie phre ze ru” idi ketsota.

²⁴Siro Jisu uko ki, “Nieko ketholeshü mu Ukepenuopfü kekuou sikemo haha la, kekrütuoya mo me?

²⁵Themia kesiako donu nu rheilakesie ki uko thenu lie morei nyhü reiya mo, derei teigeidielieko mhietatuo.

²⁶Mu siro kesiamiako rheilakesie dze la zo we, nieko Mosa leshüdau nunu seinyho-u dze phrü mo zo me? Sünu Ukepenuopfü puo ki, ‘Abraham Kepenuopfü, Isak Kepenuopfü mu Jakob Kepenuopfü’ isi.

²⁷Puo kesiako monyü kerheiko Kepenuopfü zo; nieko kekrü phite” sishü.

²⁸Süki thezhokepethamia puo vor uko keprüli ketha silie, mu puo uko die kela toushüwaketa silie tse, puo sie puo ki, “Diekhakeshü kiu kerietho-u ga?” si.

²⁹Sitse Jisu rei sie, “Kerietho-u sü, ‘Harie Israel rünyüliecie. Niepuu úko Kepenuopfü, Niepuu puo rübei zo;

³⁰no n melou pete se, n kerheiro pete se, n nou pete se, mu n kekuo pete se Niepuu n Kepenuopfü khrietuo’ si.

³¹Kenieu ro, ‘No n siezanuomia khriepie n thuo n kekhrie mhietuo’ ikecüu zo. Diekhakeshü kekrei puorei hanie ki kezha jü” sita.

³²Sitse thezhokepethau sie puo ki, “No puotou zo, kepethau; ‘Puo rübei sie kekrei jü ükecü no pu toushü zo’;

³³mu ‘U melou pete mu u kesikele pete mu u kekuo pete se puo khrie morosuo’ ikecü, siro ‘u siezanuomia khriepie u thuo u kekhrie mhie tuoükecüe,’ kethe ruosuo mu ruothoruori kirei meyiekuo zo” sishü.

³⁴Siro Jisue puo mhale menuo di pu lakeshü silie tse, puo sie puo ki, “No Ukepenuopfü kedi ze kepecie zotuo mo” sishü. Puo hau pukeshü sie miapuorei puo ki mhapuorei ketso sa michieta.

³⁵Siro Jisu rüsuokiu nunu mia petha ketha ki, puo sie, “Kiüdi thezhokepethako Khrista üse David nuou ücü pulietuo ga?

³⁶David thuo thiedzü Kemesa Ruopfü nunu sie, ‘Niepuue a Niepuu ki, “A n ngumvüko khapie n phikhroshüwa kemochie, No a zatsa ba zocie” isi zo.’

³⁷David thuo rei puo üse Niepuu üya ro, kimhie di puoe puo nuo ülietuo ga?” Süki themia krodiu u neisiei di puo die rünyü ba.

³⁸Siro puo uko petha di sie, “Thezhokepethako la nie kireiliecie, uko pfhenei kerütshu se di phere tuoya, lhithochüko nu rei mia bu u rhu di uko kelucü u neiya,

³⁹siro sinagogko nu rei theba keviko nu ba nyüya mu thehethehie nu rei therhubako nu ba nyüya!

⁴⁰Sükoe samipfüko ki peka cü tuoya mu kemelha di cha pecha phishüya, süko we mia kirei u siazha rekuotuo!” sishü.

⁴¹Süsie puoe rakabouu mhodzü tou nu ba, di mia krodi rakabouu nu mha khakeshü meho ba. Siro mhakenyimia kekra raka kha phishü ba.

⁴²Süki sami mhakejümiapfü puo rei vor di dapra kenie, puoca priesa puo mese kelhoushü.

⁴³Sitse puo puoe pethakelieko kielie di uko ki, “A nieko ki pu toushütuo, mhakejü sami hapfüe mha khapie rakabou nu shüketha kekreiko pete kirei khashü kekrathowe.

⁴⁴Kekreilamonyü mia we u ketshukelhuo chükeba nunu khashü hu, derei puo we mhakejü donu rei puo kinyi se lhoukeba pete khashüwate” sita.