Read Angami Naga Mark 13 Bible Online

Mark 13 - Angami Naga bible

Mark 13

¹Süsie puo rüsuoki nunu parzhü tse, puoe pethakelieko mia puo sie puo ki, “Harie, kepethau, ketsieko mu kiko kide zha shi!” si.

²Sitse Jisu sie puo ki, “No ki kezha hako ngu tha mo? Ketsie hako biemewa di ketsie puo bu rei kesepfü zhülie lho” sita.

³Süsie puo vo rüsuokiu kepetsoutsa Oliv kijüthou gei balie tse Pitor, Jakob, Johan mu Andria uko pekhre vor puo ki,

⁴“Kedikechükipuo mha hako chütatuo shi, mu mha hako pete chütaketuo la zasi kedipuo pekieshütuo shi, hie ki pucie” ita.

⁵Sitse Jisu uko ki, “Miapuorei bu nie se zeta molieketuo la nie kirei terlie.

⁶Mia kekra a za se vor di, ‘A süu zowe!’ idi mia kekra se zetatuo.

⁷Siro nieko terhükechü mu terhükechü dze diekrie sishü ro, nie nou kehoukeruo chüta hiecie, hako chü molie lho, derei süu puotei thelau moluo.

⁸Kekreilamonyü seyie puoe seyie kekrei puo ze kegeituo, mu kedi puo kedi puo ze keperhietuo; süki lukihaki kiükishütuo; pekrie vortuo. Hako nuonuo vachü therieko zo.

⁹“Siro nieko rei nie kireiliecie; kekreilamonyü mia nieko tepie mechü kehou nu shütuo; mu sinagogko nunu nie vütuo; siro kezhako mu kediko mhodzünu zhapu chüshüketuo la nieko a la süko mhodzünu rei thatuo.

¹⁰Derei dieliekeviu se seyie pete ki pushüwa rietuo.

¹¹Siro nieko merhashü ze dienyaki nu kevo ki nie kedipuo putuo shicü lepie nie nou kemezhie hiecie, derei puo teiu vor tse nie bu die punukeshüko pie pu zoliecie, kekreilamonyü nie puketuo dieko nie die monyü Kemesa Ruopfü kinu vortuo.

¹²Siezedzürie thuo huoniehuo teshüpie kesia nu shütuo, mu miapuonuoko rei u nuonuo gei sükemhie shütuo, tsiu mianuonuoko rei u krünuoko ngumvü di mia bu süko dukhrituo;

¹³siro a la themia pete bu nie ngumecütuo. Derei hie zo tha thela tsokelieu kelalietuo.

¹⁴“Sirei nieko mha va perhu sekecü kemecü chü zokecüu tha zhükemo nu ketha ngukelie ki (kephrümia bu süu lelie) süki Judia nu kebako bu ta kijüthouko gei votalie;

¹⁵mu ki mhogei kebamia bu la ke hie, morei puo ki nunu mhapuorei chülietuoü la le hie;

¹⁶siro lienu ketuomia bu puo pfhe chütuoü la vo hie.

¹⁷Süki thenumia nuonipfüketuoko mu u nuonuo nuyakezhako we kemezhie phituo!

¹⁸Mha hako bu teisei ki chüta molieketuo la chaliecie.

¹⁹Kekreilamonyü süki kemezhiekecükoe Ukepenuopfü kijüu chülie tse nunu vor tsie ketso kemezhiekecü süthede chükemo mu thiesie mhakipuorei silie kelho chü vor zotuo.

²⁰Siro Niepuu thuo teisozha süko chü pedzüshü motuoücüwe, miapuorei kelalie lho; derei puo puo thuo kedakelieko la, teisozha süko chü pedzüwate.

²¹Mu sükisü kehoupuorei nie ki, “Harie, Khrista haki ba” morei “Lere, puo luki ba!” isi rei pele hiecie.

²²Kekreilamonyü kethokemo Khrista mu ketijü siedzekesiko sier di zasiko mu ungomhathoko chüpie mia pekie di chülie kevi sie kedakelieko rei se zetatuo.

²³Derei nie pfheüla balie; a pedzü mha peteko pie nie ki pushüwate ho!

²⁴“Derei kemezhiekecü teisozha süko sie, Niaki zeitatuo, mu khrü zieshü motatuo,

²⁵mu teigeinu themvüko rürietatuo, tsiu teigeiketuo kekuoko shü keniewatuo.

²⁶Süsie ukoe ‘themia Nuou kimhou geinu’ kekuo kezha se zapuzayie chü di kevor ngutuo.

²⁷Süsie puo dielieko ketseshü di kijü kela nunu vo teigei kela ketso mu teikhrie diako nunu puo kedakelieko kie kengulietuo.

²⁸“Siro chiedebo-u geinu kepetha dieu siliecie: puo co kemedzü puo nyü kesa the kepar ki teiletietakecü nieko silieya.

²⁹Süsütuoi mha hako chüketa ki niekoe puoteiu penuo baketa, kikha ki thaketa siliecie.

³⁰A nieko ki pu toushütuo, mha hako pete chüwakemochie thephou hau jütalie lho.

³¹Tei mu kijü jütatuo, derei a dieko we jütalie lho.

³²“Sirei teisozha morei bavüdo süu Puou zo kemosie miapuorei, teigeidielieko morei Nuou rei si mo.

³³Nie kireilie, pfheüla balie;[18] kekreilamonyü kedikechükipuo puotei süu vortuo shicü sikemo la.

³⁴Süusü mia puo puo ki khapie puo kituoko tsüshü mu mhatho u thetse kha u tsüshü mu kikha kepfheu bu rei pfheüla balienushü di rüveketa mhie zo.

³⁵Süla nieko pfheüla ba zoliecie, kekreilamonyü nieko rei ki niepuu thevatie tuo mo khisoteiluo tuo mo, thevü kekhou ki tuo mo, khise tuo shi? puo kevor tei sikemo la,

³⁶moro puo mhai vor nie zezhü di ngulie rei silie kelho la.

³⁷Siro a nieko ki pu ketha hau themia pete ki putha zo: Pfheüla baliecie” sishü.