Read Angami Naga Mark 14 Bible Online

Mark 14 - Angami Naga bible

Mark 14

¹Siro zha kenie sie Ciekevonyi mu khreiüshükemo Niekhrüda nyi nyitatuoü bata. Süki phichükezhako mu thezhokepethako pekhre di Jisu tepie dukhriwaketuo rhü bata.

²Kekreilamonyü uko sie, “Süu thenyi kilie lho, themia mha kebvüketa keprei la” si bata.

³Jisue Bethani nu Simon mpa kechüu kinu ba, mu puo mhacü keba nu miapfü puo nardpfü tier puoma kere alabaster bou puo pie vor, sidi süpfüe tier bou phalie di lapie puo tsü geishü.

⁴Derei süki ketha mia huo u nei mo di sie huoniehuo üse, “Kiüdi tier haidi pekawate shi?

⁵Kekreilamonyü hau denari krie se kezie nunu zelie vi, sidi raka khapie mhakejümia tsüshülie vi” itha. Sidi uko puo kerhieta.

⁶Derei Jisu sie, “Puo kha hiecie; kiüdi nieko puo keyhuya ga? Puo mha kevi chüpie a geishüwate.

⁷Kekreilamonyü kejümia nie ze sei batuo mu kehoukipuorei nieko süko khruohishü nyü ro khruohilie vi; derei nieko a ze sei zo balie lho.

⁸Puo chüliekeviu chüshüwate, puo a kekhrunyie keseshüketuo la pedzüperie tier pie a kenheshüwata zo.

⁹A nieko ki pu toushütuo, kijü pete nu dieliekeviu pupie mia kiekecü kheko nu thenu hapfü rükra tuolieketuo la puo dze pu tuo zotuo” sita.

¹⁰Süsie Iskariot Judas, kerekenieko donu mia puo, Jisu tepie uko tsükeshü le di phichükezhako ki vo.

¹¹Siro süu sikeshü ki uko nei phi di raka pie puo tsütuoüshüwa. Süla puoe puo tepie uko tsüshüketuo la puotei kevi puo rütuota.

¹²Siro Khreiüshükemo Niekhrüda nyi zha therie nhie Ciekevonyiu tekuonuo kedukhri nhie puoe pethakelieko puo ki, “Hieko bu kirapuonu n la Ciekevonyiu cüketuo kesekecü n medo ga?” sita.

¹³Süla puoe pethakelie kenie ketseshü di unie ki, “Nadi nu lelie, sitse nnie mia puo dzü lipfhü puo pie tuo di ze kesetuo ho; puo siemedzi volie,

¹⁴sidi nnie puo kinu nu le di niepuu ki, ‘Kepethaue, a bu a siedziko ze Ciekevonyiu cüketuo rüsobouu kirapuo ba ga?’ idi ketsoyalie sicie.

¹⁵Sitse puoe pesogei kibou kezha mha pete kesepie keba puo thashütuo ho, nnie sünu nu úko la mha keseliecie” sishü.

¹⁶Süla pethakelie nie nadiu nu le tse mha pete puo unie ki pukeshü kemhie tou ba di ngulie; mu unie sünu nu Ciekevonyiu la mha keselie.

¹⁷Süsie thevatieta tse, puoe kerekenieko ze vorlie.

¹⁸Siro uko keze mhacü keba nu Jisu sie, “A nieko ki pu toushütuo, nieko a ze mhacü kebako donu mia puoe a teshütuo” sita.

¹⁹Sitse uko die süu sipie u noukemezhie di mia puopuo sie puo ki, “Süu a me a me?” idi ketso phreta.

²⁰Sitse puo uko ki, “Süu kerekenieko donu mia puo, puo a ze di niekhrüda se mekhou nunu se cü kebamia puo zo.

²¹Themia Nuou zowe thiedzü puo dze thupiekezhü tuoi tuotatuo; derei Themia Nuou teshüketuou we ce chülietie! Themia süu penuo vor mocü we puo dze vikuotuo mu ru.”

²²Siro uko mhacü keba nu, puo niekhrüda yopuo chüpielie, süsie puo jashü di süu bietshielie di süu pie uko tsüshü, sidi sie, “Lieliecie, hauha a mo zo” ishü.

²³Süsie puo tehieu rei chü pielie, sidi kethezie khakeshü sie süu pie uko tsüshü, mu uko peteko süu krie phrelie.

²⁴Siro puo uko ki, “Hauha themia kekra la pekrukeshü dietseidiekhokelie a zieu zo.

²⁵A nieko ki putoushütuo, a Ukepenuopfü kedi nunu khubedzü kesa krie kemochie mhakipuorei khubedzü krie salie lhote” sita.

²⁶Süsie uko tsali puo chülie di Oliv kijüthou gei vota.

²⁷Mu Jisu uko ki, “Nieko a khawatatuo; kekreilamonyü, ‘A tekuo kepfheu vüshütuo, sitse tekuoko ta cüretatuo’ idi thupiekezhü la.

²⁸Derei a rheilasiekelie sie, a nieko mhodzü rie Galil nu votatuo” sishü.

²⁹Sitse Pitor sie puo ki, “Themia pete n khawa zorei a we n khawalie lho” sita.

³⁰Jisu sie puo ki, “A n ki pu toushütuo, thie ha, tsiezhü thevü khou keniekecü mhodzü, no va se a si mo ücü putatuo” sita.

³¹Sirei puo puo rhiechü sa di sie, “A bu n ze siatatuoü rei, a n phra mvüta lho zo!” sita. Mu kekreiko pete rei sükemhie pu phre.

³²Süsie uko Gethsemane ükecü thechü puo nu vorlie; mu puo sie puoe pethakelieko ki, “A kechachü keba ki nieko haki baliecie” sishü.

³³Sidi puo Pitor, Jakob, mu Johan uko ze tuota, süsie puo puo nou kemezhiepie meyhumezhie zota.

³⁴Sidi puo uko ki, “A nou kemezhiepie siata kemoyo chüte; haki ba di pfhe bacie” sishü.

³⁵Süsie puo tuo petse za phi di tsu kijü zerepfü zhülie di chülie vi ücü sie we kemezhiekecü bavüdo süu bu puo therhietanu chata.

³⁶Puo sie, “Abba[19], a Puo, No we mha pete chülie vi zocü la, a ki nu tehie hau chüwacie; siürei a medo-u monyü n thuo n medo chüliecie” sishü.

³⁷Sidi puo la phir tse pethakelieko zezhü di ngulie; sitse puo Pitor ki, “Simon, no zezhüte me? No bavüdo puorei co balie kenjüte me?

³⁸Medokephi nu leta molieketuo la cha mu nie terüchü baliecie; ruopfütsa we chü nyü bei ba zo derei u chü u phou tsatie zowe thachü ba zo” isita.

³⁹Sidi puo tuo phi kinyhü kemhie pu cha lashü

⁴⁰Süsie puo la phir ru uko zezhü di ngulie; uko mhirho reilie kenjü zoketa la, tsiu uko puo ki mha kepu tetuo rei si mota.

⁴¹Süsie puo va seu la phir di uko ki, “Nieko tsierei ze mu rüleizhü zo me? Cüsie ci zote! Puoteiu sü vorte ho; mu Themia Nuou tepie kephoumamia dzienu shüwatuoü bate.

⁴²Sieliecie, úko tuota khe. Harie a teshüketuo vor haki thate,” sita.

⁴³Siro puo diepu thaluocü nu kerekenieko donu mia puo, Judas mhai vorta, siro phichükezhako, thezhokepethako mu pehüko kinu ketsekeshü themia krodiu u zhiecha mu seide pie di puo ze vorta.

⁴⁴Siro puo tepie mia dzienushüketuou pedzü zasi puo pie uko ki pu di sie, “A meboshüketuou, süu puo zo; puo telie di puo pfhe menuo ze votacie” sishü.

⁴⁵Sidi puo vor tsolie tse, mhai phi puo ki, “Kepethau” idi puo meboshü.

⁴⁶Sitse uko vo puo telieta.

⁴⁷Derei süki ketha mia puo puo zhiecha zoulie di pie phichükezhau kituou du sie ru puo nyieto metakreiwa.

⁴⁸Süsie Jisu uko ki, “Nieko zhiecha mu seideko pie di a ü mia viesekecümia puo tuoi a tetuoü vorzhü me?

⁴⁹A teisonhie rüsuokiu nu nieko ze ba di mia petha baya ze, mu nieko süki we a te mo. Derei ketholeshüu bu tsei morosuo” ishü.

⁵⁰Süki uko pete puo khawa di tata.

⁵¹Siro khriesanuomia puo linen pfhe rübei dzie di puo siemedzituo. Sitse mia puo merhashülie,

⁵²derei puo puo linen pfheu khawa di methuo tata.

⁵³Siro uko Jisu ze phichükezhatho-u kinu vota, mu sünu phichükezhau, pehüko mu thezhokepethako vo kengu ba.

⁵⁴Pitor rei petse za di puo siemedzi vor phichükezhatho-u kitiezha tsolie; mu puo süki balie di rükhouko ze mi peguo ba.

⁵⁵Süki phichükezhako mu mechü kehouu pete rei Jisu pejopie dukhriwatuoü zhapu huo pfhü sie, sirei uko mhapuorei ngulie mota.

⁵⁶Kekreilamonyü mia kekra tijü di puo kepejo zhapu khashü, derei uko zhapu dieko kerhelie mota.

⁵⁷Mia huo ketijü zhapu se puo pejo di sie,

⁵⁸“Hie puo kepu die sikecü, ‘A themia dzie thuo chükelie rüsuoki hau bierhuowatuo, sidi zha se sie themia dzie üse chükemo kekrei puo chü lalietuo’ isiwe” sita.

⁵⁹Derei die hau nu zorei uko zhapu dieko kerhelie mota.

⁶⁰Süsie phichükezhatho-u uko mhodzü sie thalie di Jisu ki, “No mhapuorei pu lashü lho me? Uko n pejoketha die hako kedipuota ga?” sita.

⁶¹Derei puo kemekrieta di mhapuorei pu mota. Sitse phichü kezhatho-u la sie puo ki, “No Khristau, Thejakepfütho-u Nuou zo me?” sita.

⁶²Sitse Jisu sie, “A süu zo; ‘mu nieko Themia Nuou Kekuotho-u zatsa keba,’ mu ‘teigei kimhouko geinu ketsur ngutuo’ ” sishü.

⁶³Sitse phichü kezhatho-u puo pfhenei cierha di sie, “Kiüdi nieko zhapu kekrei puo se sa nyüya ga?

⁶⁴Nieko puo Ukepenuopfü ketha die kepu sishüte! Nieko keleu kedipuo ga?” idi ketsota. Sitse uko pete puo pejo di puo bu siata rei vi üta.

⁶⁵Siro mia huomia mhitsiepie puo tshe, puo mhi dzewa mu puo vü di puo ki, “Siedzekesidie pushücie!” ishü. Süsie rükhouko puo ze vo puo vüta.

⁶⁶Siro Pitor kitiezha pekhrotsa ketha ki phichükezhatho-u kituomiapfü puo vor.

⁶⁷Süpfü Pitor mi peguo ketha ngushü tse, puo mehoterü di puo ki, “No rei Nazaret Jisu ze ketuomia puo zo” sita.

⁶⁸Derei puo mo üdi sie, “A puo si mo morei no kedipuo pu tha shi a süu rei si mo” sita. Sidi puo kitie cha ze prata. Süsie thevü khouta.

⁶⁹Süsie rei kituopfü puo puo ngu di süki kethako üse, “Themia hau rei uko mia puolie” sita.

⁷⁰Derei puo süu va rei moüta. Süsie chaba kemonu süki kethako la sie Pitor ki, “No rei uko mia puo zo kethowe; no Galilmia zocü la” sita.

⁷¹Derei puo rüse khu zo di, “No puo dze pukethau a si mo zo” sita.

⁷²Süki va kenieu va thevü khouta. Sitse Pitor pedzü Jisu puo ki, “No thevü khou kenie mhodzü va se a si mo üdi putatuo” ikeshü die rükralie; süsie puo puo nou kesuo pfü krata.