Read Angami Naga Mark 15 Bible Online

Mark 15 - Angami Naga bible

Mark 15

¹Siro teisolie tse phichü kezhakoe pehüko, thezhokepethako mu mechü kehouu pete ze kerüchü. Sidi uko Jisu phalie di ze vo Pilat dzienu shüwa.

²Sitse Pilat sie puo ki, “No Judako kediu me?” idi ketsoshü. Sitse puo sie, “N kepuu zo” sita.

³Sitse phichükezhako mha kekra se puo pejota.

⁴Siro Pilat puo ketso la di, “No mhapuorei pu lho me? Harie mia kiderei n pejo tha mu?” sishü.

⁵Derei Jisu mhapuorei pu mota, süla Pilat bu puo ngota.

⁶Siro thenyiu metsei themiakoe puo ki kediemia puo khashünu cha ro puo süu khashüya.

⁷Süki Barabas ükecü puo mia ze sorkari petsou sie di mia dukhriwakecüu rei kedie chü ba.

⁸Süki themia kro-u vor di Pilat ki thiedzü zho tuoi puo ki cha.

⁹Sitse puo sie, “Nieko a bu Judako kediu khashüwa nyü mo me?” idi ketsoshü.

¹⁰Kekreilamonyü phichükezhathoko puo ngu urokecü la puo khapie puo dzie nu shüükecü puo silieta.

¹¹Derei phichükezhathoko themia kro-u pfü kerhüshüwata di Pilat bu Barabas khashü uko tsüwanu chata.

¹²Sitse Pilat uko ki, “Siro a bu nieko puo üse Judako kediu üyakezhau pie kedipuo chütuo ga?” idi ketsota.

¹³Sitse uko shiekhoui la di, “Puo pie krus geinu gouwalie” ita.

¹⁴Süla Pilat sie, “Puo kekrükecü mhatho kikecüpuo chüwata ga?” idi ketso. Derei uko shie u rhiechükuo di, “Puo pie krus geinu gouwacie!” iba zota.

¹⁵Süla Pilat themia kro-u nei chü nyüta, sidi Barabas khapie uko tsüwa; mu khrasei pie Jisu vüwa di puo gouwanu di khapie uko dzienu shüwata.

¹⁶Süsie Chüpahiko Jisu ze kedikiu kitiezha nu leta (süue kezhau kinu); sidi uko pete kie kengulie.

¹⁷Sidi uko puo bu pfhe meriemegekecü selie; mu zohu kechiepie keditsüre puo chülie di süu pie puo tsü gei shü.

¹⁸Süsie uko puo kelu di sie, “Judako kediu bu rhei kechau chücie!” sita.

¹⁹Siro uko kethe puo pie puo tsü vü, puo mho mhitsie, tsiu khoutoulie di puo rüsuo.

²⁰Siro puo pie kethekrekewa sie, puo geinu pfhe meriemegekecüu rhuowa di puo bu puo pfheneiko se lalie. Süsie uko puo gouwatuo üdi puo ze vota.

²¹Süki ukoe rüna nunu Kurinmia Alexander mu Rufu unie puou Simon, kemvü chüpie puo bu Jisu Krus pie voketuo la telie.

²²Sidi uko puo ze Golgatha (puoca mia Tsütsoru) ükecü thechüu nu vorlie.

²³Süsie uko zu mu mür kereikecü pie puo bu krienuta; derei puo süu krie mvüta.

²⁴Süsie uko puo gouwata, mu suomia puo pfhenei kiu ngulielietuo shi idi süko dape di kezalie.

²⁵Siro uko puo goukewa ki khise keba thepfüta.

²⁶Siro puo pejokecü die thupiekezha hamhie: “Puo Judamia Kediu” si.

²⁷Siro uko sekecümia kenie, mia puo puo zatsa mu mia puo puo vitsa idi pie puo sa gou.

²⁸Hakemhie di, “Puo phrüpie thezho kevarhuoko saliete” idi thupieketuo dieu bu tseilie.

²⁹Siro themia kekhokeke pete tsünge puo rhie di, “Yha, no rüsuoki bie pesuowa di zha se nu chü lashüketuou sü,

³⁰N thuo n kelalie di krus geinu kerliecie!” sita.

³¹Sümhie phichükezhako mu thezhokepethako rei puo krenyü di huoniehuo üse, “Puo kekreimia we kelalie, derei puo thuo puo kelalie kenjüte ha!

³²Khrista, Israelko kediu bu krus geinu kerliecie, siro hie rei pelelietuo” isita. Siro Jisu sa goupiekezhanie rei puo kengata.

³³Siro keba kerekenie nu vo keba se ketso kijü pete zei bouita.

³⁴Mu keba se ki Jisu melie shiekhoui di, “Eloi, Eloi, lema, sabakthani!” puoca “A Kepenuopfü, a Kepenuopfü, no kiüdi a khawata ga?” sishü.

³⁵Siro süki ketha mia huo puo pfhe si di, “Harie, puo Elija kiezhie” si.

³⁶Süki mia puo ta vo sponge puo pie kekhrodzü selie di kethe puo tie nunu pie kho puo bu krienu khapie puo tsü di sie, “Tsiehieluo, Elija vor krus geinu puo pie kershütuo mo lho shi meho tha khe” sita.

³⁷Süsie Jisu melie shiekhouishü di puo ruopfü khashüwata.

³⁸Mu süki rüsuokiu nu pfhe lhapiekezhau puo tsüle nunu rürha tsu puo phi tso di kenie chüta.

³⁹Siro chüpahi krie mhokezhau puo mhodzü ki tha di puo kimhie di siate shicü ngu tse, puo sie, “Themia hau Ukepenuopfü Nuou ketho zo!” sita.

⁴⁰Süki thenumia huorei kepecie nu meho tha; süko donu Maria Magdalin, Jakob nhicuu mu Joses unie zuopfü Maria, tsiu Salomi uko rei tha.

⁴¹Ukoe Jisu Galil nu baluocü nu puo siemedzi di puo khruohi tuota; siro thenumia kekrei kekra puo ze Jerusalem nu vorketako rei sa süki tha.

⁴²Süsie thevatie ki, mu sünhie mhakesekecü zhau, sabat mhodzü nhiekecü la,

⁴³siro Ukepenuopfü kedi pfhetuoyakezha Josef ükecü Arimathia mia puo vor; puo pehüko donu therhu kepfümia puo; puo thepfu se zo di Pilat ki vo Jisu mo-u cha.

⁴⁴Siro Pilat puo siata ücü si di puo ngota, süla kriemhokezhau kie ze vor di Jisu siaketa puotei chata mo ki shicü ketso.

⁴⁵Siro puo kriemhokezhau ki puo siaketa silie tse, themo-u pie Josef tsüwanushüwa.

⁴⁶Sitse Josef linen pfhe khrülie, mu themo-u lhouse kerlie, di linen pfheu pie kezülie, sidi pie vo tsiekrie nunu mekhru hopiekezhüu nu khruwa. Sidi puo ketsie kezha puo ketoupie mekhruu khawa.

⁴⁷Siro Maria Magdalapfü mu Josef nuo zuo Maria unie puo piekezhü chüu ngu.