Read Angami Naga Mark 2 Bible Online

Mark 2 - Angami Naga bible

Mark 2

¹Siro zha huoyo sie Jisu Kapernaum nu la vor, mu süki puo kinu baükecü mia silieta.

²Süla themia kekra vor kengulie di kikha ketso rei themia tha jü zota, mu puo dieu pie uko petha ba.

³Sitse mia dia kerünyiemia puo pie puo ki vor.

⁴Mu uko themia krodiu la puo ki lelie kenjüta, süla uko puo ketha mede nu kikhru phalie, mu uko süu phakelie sie themia süu bu puo zhüu gei zhülie di puo pie kerünuo tsurshü.

⁵Sitse Jisu uko kepele ngushü di kerünyieu üse, “A nuo n kephoumako vashü n tsüwate ho” sishü.

⁶Siro thezhokepetha huo sünu ba ru, uko u nou nu medo di sie,

⁷“Kiüdi themia hauha hakemhie puya shi? Puo Ukepenuopfü thate, Ukepenuopfü rübei zokemosie, supuonie mia kephouma vashü mia tsülie vi ta?” si bata.

⁸Sitse Jisu puo ruopfü nunu uko noudoko silie di sie uko üse, “Nieko kiüdi nieko nou haikecü leya ga?

⁹Kerünyie hau ki, ‘N kephouma vashüwate ho,’ idi pukecüu rüükuotuo mo, mo di sie, ‘Sielie di n zhü chüpielie di chatuolie’? ikeshüu rüükuotuo ga?

¹⁰Derei nieko bu Themia Nuou kijü hau nu mia kephoumako vashülie kevi kekuo bakecü silieketuo la” ishü, sidi puo kerünyieu üse,

¹¹“A n ki puya, sie n zhü chüpielie di tuo n kinu votalie” sishü.

¹²Sitse puo uko peteko mhodzünu nu puo zhü se tuo prata; sitse uko peteko u ngo mu Ukepenuopfü tshe di sie, “Hie mhakipuorei hakemhie ngu chie mo zo” sita.

¹³Süsie Jisu tuo dzükezha khieki vozhü; ru themia krodi puo ki vorlie; sitse puo uko pethashü.

¹⁴Siro puo tuo sa phizhü ru khezhanuo kekhruou Levi Alfia nuou khezhanuo kekhruoba nu ba di ngulie, di sie puo ki, “A siemedziliecie” sishü tse puo sielie di puo siemedzita.

¹⁵Siro puo Levi ki nu hietuo üdi ke balie, süki khezhanuo kekhruomia kekra mu kephoumamia kekra vor Jisu mu puoe pethakelieko ze ba.

¹⁶Siro Farisimia mu thezhokepethakoe puo kephoumamia mu khezhanuo kekhruomia ze mhacü keba ngushü, sitse uko sie puoe pethakelieko ki, “Kiüdi puo khezhanuo kekhruomia mu kephoumamia ze mhacüya ga?” sita.

¹⁷Siro Jisu hau sishü tse, uko ki, “Themia keshürhomia darukesimia se morei vi, derei süu kechükenyümia la zo; ae miathoko monyü kephoumako kietuoü vorcü zo” idi pushü.

¹⁸Siro Johan siedziko mu Farisiko mevo ba, süki mia vor puo ki, “Johan siedziko mu Farisiko siedziko mevoya, derei kiüdi n siedziko we mevoya mo ga?” idi ketsota.

¹⁹Sitse Jisu uko ki, “Yasau kebachie nuyie he nu kebako mevotuo me? Siya mo! Yasau uko ze kebachie uko mevolie kenjü.

²⁰Derei uko ki nu yasau zetaketuo teisozhako vortuo, mu sünhie uko mevotatuo.

²¹“Miapuorei pfhe rütatakemo puo se vo pfhe kewe pekhuoya mo, kekreilamonyü pfhe kesa süu rütakeshü ki pfhe keweu shürhakuowayakezha la.

²²Siro miapuorei zu kesa pie chüzhüsü kewe nu shüya mo; kekreilamonyü zu kesau chüzhüsü kewe pfüphawaketuo la. Sidi zu mu chüzhüsüu kenienie rei pekawaya; derei mia zu kesa se chüzhüsü kesa nu khashüyakezha zo.”

²³Süsie sabat puo nhie puo mia lievu puo pfüthe vozhü, siro uko tuo vokezhü ki puoe pethakelieko telhakre merhe tuo.

²⁴Sitse Farisiko puo üse, “Harie kiüdi sabat nhie thezho varhuo haiya ga?” ita.

²⁵Sitse puo uko üse, “Nieko thiedzü David mu puo kezeko merü di kecüca se morosuoketa ki kedipuo chüshü shiü phrü mo zo me?

²⁶Abiathar phichükezhau chükeba ki, puo Ukepenuopfü kinu le zievoko zokemosie kekreimia cükecü thezho mo zokecü Kepekie Niakhrüdau cülie, sidi huo khapie puo zeketuoko rei tsüshü” sita.

²⁷Sidi puo sie uko ki, “Sabat zhaue themia la chüshü, mu sabat la themia chüshü mo;

²⁸süla Themia Nuou sabat mho rei niepu zo” ishü.