Read Angami Naga Mark 3 Bible Online

Mark 3 - Angami Naga bible

Mark 3

¹Süsie puo la sinagog nu le, mu sünu dziesiamia puo ba di ngulie.

²Süki uko puo pejokecü le di sabat nhie puo themia süu chü keshürhoshütuo mo lho shicü meho ter ba.

³Sitse puo dziesiau ki, “Phirliecie” ishü

⁴Sitse puo uko üse, “Sabat nhie mia gei mha kevi chükecüu tuo mo, mia gei mha kesuo chükecü thezho ga? Mia chü perheituo mo mia dukhrituo ga?” sita. Derei uko kemekrieta.

⁵Sitse puo puo nei mo di reipra lutsahatsa mia mehoshü; siro uko nou kere la puo nousuo di sie, themiau ki, “N dzie yhashücie” sishü. Ru puo puo dzieyhashü, mu puo dzie vilieta.

⁶Süsie Farisiko tuo prata di kenourhei Herodmiako ze puo dukhriwaketuo do rhüta.

⁷Süsie Jisue pethakelieko ze dzükezhatsa vota, mu Galil nunu themia krodi puo siemedzita;

⁸puo mhatho dzeko sishü di, uko themia kekra Judia, Jerusalem, Idumi-a, Jordan rükhie lutsa nu, mu Tur mu Sidon merhieko nunu puo ki vor.

⁹Siro themiako krathorketa la, themia kro-u bu puo ge motuo üdi pethakelieko bu rou yopuo dojüpie balienushü;

¹⁰kekreilamonyü puo themia kekra chü keshürhokeshü la, u kechü nyiketa khe puo bietuo üdi puo getoutou tuota.

¹¹Siro mesakemo ruopfüko kehoukipuorei puo ngu tse tsu puo mhodzünu zhülie di shiekhoui di sie, “No Kepenuopfü Nuou zo” ita.

¹²Sirei puo uko bu puo dze pie mia pesi hienu di uko kha beiwa.

¹³Süsie puo kijüthou gei kho di vor kenyümia bu puo ki vornu kieshü; sitse uko puo ki vor.

¹⁴Sitse puo mia kerekenie kedalie di süko üse apostelko ülie, süko bu puo ze tuo nu mu uko ketsepie mia pethatuo üdi,

¹⁵mu terhuokesuoko whuolie kevi kekuo kha uko tsüketuo la.

¹⁶süla puo mia kerekenie kedalie; süko Simon (puo puo za thopie Pitor chükeshüu),

¹⁷Zebedi nuou Jakob mu puo siezeu Johan, (puoe unie za thopie Boanerges, puoca “Teikese nuonie” chüshü,)

¹⁸mu Andria, Filip, Bartholoma, Mathi, Thoma, Alfia nuou Jakob, Thadia, Simon (Kanan-u)

¹⁹Judas Iskariot, Jisu tekeshüu. Süsie Jisu kinu la vota;

²⁰mu themia krodi vor kengu lalie, süla uko mhacü reilie kenjüta.

²¹Siro puo kikruko sü sishü di puo kekhawatuoü vo, kekreilamonyü themiakoe “Puo nyata zo” idi puketa la.

²²Siro thezhokepethako Jerusalem nu kevorko sie, “Puo Belzebul ze tuote, mu terhuokesuoko kezhau kekuo kha puo tsü di puo bu terhuokesuoko whuo tuote” idi puta.

²³Süla puo süko kielie di dievi nunu uko ki, “Kimhie di satan thuo satan whuolie vituo ga?

²⁴Mhanuü kedi puoe kepfüphro di puo thuo puo petsouta ro kedi süu thalie motaya.

²⁵Mhanuü kikru puoe puo thuo puo pfüphrota ro, kikru süu balie kenjü.

²⁶Süla satan rei puo thuo puo pfüphrota ro puo thalie kenjü di katatuo.

²⁷Siro mia puoe kekuomia puo kinu le puo vienyako vatuo üro süu phalie rie kemosie chülie kenjü, derei phakelie sie puo kinu le puo vie valie vi.

²⁸“A nieko ki pu toushütuo, themia kephouma doneiü mu Ukepenuopfü ketha neiü puya shierei vapie tsüwalie vi;

²⁹derei kehoupuorei Kemesa Ruopfü thayakezha sie mhakipuorei vapie tsülie lho, mu kechachie kephouma nunu jotatuo” ita.

³⁰Kekreilamonyü ukoe sie, “Puo mesakemo ruopfü ze tuote” idi puketa la zo.

³¹Sitse puo zuo mu puo siezeko vor kitie thalie, sidi uko mia ketsepie puo kie.

³²Siro themia krodi puo puo houpfü ba; sitse uko sie puo ki, “N zuo mu n siezeko mu n üpfünuoko n ze kese nyü di n pfhü vor kitie thalie” sishü.

³³Sitse puo sie, “Suomia a zuo mu a siezedzüriemia ga?” sita.

³⁴Sidi rei lutsahatsa puo houpfü kebako meho di sie, “A zuo mu a siezenuoko sü hako zowe.

³⁵Kehoupuorei Ukepenuopfü medo-u chüyakezhamia a siezemia, a üpfünuo mu a zuonuo zo” sita.