Read Angami Naga Mark 5 Bible Online

Mark 5 - Angami Naga bible

Mark 5

¹Süsie uko tuo dzükezha lutsakhie vo di Gerasin[2] kijü nu vorlie.

²Sidi puo rou nunu tuo parlie tse mesakemo ruopfü bu puo kebi zetuoketamia puo mekhruko nunu tuo par puo ze keselie.

³Puo mekhruchü nu lhou baya; mu miapuorei puo kekhase balieyakemo puo, thegiro rei pie puo phase balieya mo;

⁴tsiekenuo mia thegiro pie puo phi puo dzie pha derei puo phakeshü metsei puoe thegiro zorei biethewaya; sidi miapuorei puo kekha ze balieketuo kekuo jüketa la.

⁵Teisoteizei pete nu puo mekhruko mu kijüthouko gei whi kho mu ke di shie kemeriechü mu ketsie pie puo thuo puo bie kerüza sei baya.

⁶Siro puo ratsanu Jisu ngu tse, ta vo puo mhodzünu khoutou zhülie;

⁷di shie kemerie chü di sie, “Jisu, Kerükrietho Kepenuopfü Nuou! no a gei kedipuo chütieya ga? A Kepenuopfü za se putuo, a pechüpenyü hie zocie!” sita.

⁸Kekreilamonyü Jisu puo ki, “Harie, mesakemo ruopfüu no themia hau geinu tuoprataliecie” isiketa la.

⁹Süsie Jisu puo ki “N za supuo ga?” ishü Puo sie, “A za Legion; hieko kekratuocü la” si.

¹⁰Mu puoe Jisu bu rüna süu nunu uko whuowa hienu cha beita.

¹¹Sükisü thevo krodi puo kijüthou phi nu mha nge cütuo.

¹²Ru mesakemo ruopfüko[3] puo ki cha bei di sie “Hieko bu thevo kro nu lelieketuo la no hie ketsepie süko kro nu shüwacie” sita.

¹³Süla puo uko whuoshü tse mesakemo ruopfüko ta pra di thevoko nu leta; mu thevo kro-u, nyie kenie mese ta tsiekhie gei vo di rüsou dzükezha nu leta, sidi dzükezha nunu uko pelheikhri phrewa.

¹⁴Süsie süko kepfheko nadi nu mu lieko nu vo di thedzeu pushü. Sitse themiako kedipuo chüte shikecü mehotuoü par.

¹⁵Süsie uko Jisu ki vo di terhuokesuo bu puo kebi zeketuo legion bu puo geikebau, puo melou mecielie di puo pfhe dzie baketa ngulie di michie phita.

¹⁶Süsie mha süko kenguko terhuokesuo bu puo kebi zeketuou gei chüketa mu thevoko dze rei pie mia ki pushü.

¹⁷Sitse uko Jisu bu u sonuokinu tuotanu u mezhiemelo beita.

¹⁸Süsie Jisu rou nu letazhü tse hadzü terhuokesuo bu puo kebi zeketuou puo ze tuotatuoü puo ki cha beita.

¹⁹Derei Jisu mvüta, di puo ki, “No tuo se n kinu n khriethomiako ki vo di uko ki Niepuu n gei chükeshüko mu kidepuo n ngumezhieshü shicü pie pushücie” sishü.

²⁰Sitse puo tuota di vo Dekapoli nu Jisue puo gei mhachükeshü pete pie mia ki pushü; mu mia pete rei u ngo phita.

²¹Süsie Jisu rou nunu tuo la se lutsakhie pfülie tse, themia krodi puo vor puo houpfülie; mu puoe dzükezha khie ki ba.

²²Sitse sinagog nu kezhamia puo puo zae Jaira ükecüu vor di puo ngulie di tsu puo phi nu zhüta.

²³Sidi puo mezhiemelo bei di, “A nuopfü siatatuoü zhüte. Vor di n dzie yhapie puo gei shücie, sitse puo vilie di rheilietuo” sita.

²⁴Süla puoe puo ze vota. Siro themia krodi puo siemedzi di puo ge toutou tuota.

²⁵Siro thenumia cie kerekenie thezie kru di kemezhie tuoketapfü puo rei tuo.

²⁶Hapfü va kekra darukesimia bu puo theke, sidi puo vie ketuokoyo peka phrewa; sirei vikelieu monyü suo kechü miemieta.

²⁷Hapfü Jisu dze sishü di themia krodiu medzi Jisu ki vor di puo pfhephrie bieshü;

²⁸Puoe, “Mhanuü a puo pfhephrie bielie zorei, a shürholie zotuo” ikecü le tuoketa la.

²⁹Sitse vapuochü thezie kru mo mhata; mu puo kechü vilieketa puo thuo puo geinu silieta.

³⁰Sitsemetha kekuo puo geinu praketa silie di Jisu rürei vo themia kroko meho di sie, “Supuo a pfhe bie ga?” ishü.

³¹Sitse puoe pethakelieko sie puo üse, “Themia krodi n ge toutouketuo nu kimhie di, ‘Supuo a bie ga?’ ilietuo mu?” sita

³²Derei puoe supuonie süu chüshü shicü pfhü di lutsahatsa mehota.

³³Sitse thenupfü puo gei kedipuo chüte shikecü silieta, süla puo michie pe zo di vor puo mhodzünu zhülie, sidi puo ki mha pete pu phreshü

³⁴Sitse puo hapfü ki, “A nuopfü, n kepele thuo n chü keshürhoshüte ho. N nou mene di votalie mu n kechüu bu vilietacie” sishü.

³⁵Siro puo die süko pu ketha nu kezhau ki nunu mia huo vor di sie, “N nuopfü siate. Kiüdi kepethau bu kemezhie satuo ga?” sita.

³⁶Derei Jisu uko pu ketha sikemopfü chü di sie sinagog nu kezhau üse, “Michie hie, peleu pele zolie!” sita.

³⁷Siro puo Pitor mu Jakob mu Jakob siezeu Johan sie miapuorei bu puo siemedzi vo mvüta.

³⁸Siro uko vor sinagog nu kezhau ki tsolie tse, themia kra mu thekrü chü bouübi keba ngulie.

³⁹Siro puo kinu lelie di uko ki, “Nieko kiüdi kra bouübita ga? Unuoyo siata mo derei zekezhü zo” sita.

⁴⁰Sitse uko puo kreta, süla puo uko pete bu kitie prata, sidi unuoyonuo puo mu puo zuo tsiu puo zeketuoko rübei zelie di u nuoyo kezhü bou nu leta.

⁴¹Puo unuoyo dzie teshülie di puo ki, “Talitha kum,” puoca, “Rüüpfü, sierliecie!” sishü.

⁴²Sitse puo ta mhai sier di chatuo tuota (hapfü cie kerekeniete). Mha hau la uko bu u ngo phita.

⁴³Siro puo uko bu süu dze pie mia puo kirei pu hienu beiwa, sidi puo uko bu mhapie süpfü vachüshünu pu.