Read Angami Naga Mark 6 Bible Online

Mark 6 - Angami Naga bible

Mark 6

¹Süsie puo sünu nu pra di tuo puo thuo puo ra vorta, mu puoe pethakelieko rei puo siemedzi vo.

²Mu sabat nhie puo sinagog nunu mia petha mu puo die kesi kheko u ngo phita. Sidi uko sie, “Kirapuonu themia hau mha hako pete nguliete mu? Siro kha puo ketsü mha ha rei kikecüpuo ga? Kikidi puo dzie nunu mha kezha hikecü chülieya mu!

³Hauha sei mistiri-u mo me? Puo zuo Maria[4], siro Josef mu Juda mu Simon uko dzürieu zo mo me? mu puo üpfünuoko rei u ze haki lhou ba moü me?” isita. Sidi uko puo gei u nei mota.[5]

⁴Sitse Jisu sie uko ki, “Siedzekesimia puo thuo puo rakhe nu, puo se puo yiemia mu puo kicükinumia donu zo kemosie puo rhukemo jü” sita.

⁵Sidi puo kechümia kro puo bieshü di süko chü keshürhokeshü sie sünu mha kezha chülie lhota.

⁶Mu themiako la puo bu puo ngo phita. Süsie puo rühou rünako nu vo di mia petha.

⁷Siro puo kerekenieko kielie di mia kenienie ketseshü, mu uko bu mesakemo ruopfüko whuolie kevi kekuo pie uko tsü.

⁸Siro uko bu rüve ki kethe puo rübei sie niekhrüda, likhuo, shükeiraka puo rei se hienushü,

⁹derei uko bu phikou puo nyülie derei boulie thuli we pfü hienushü.

¹⁰Puo uko ki, “Nieko kehourapuorei ki puo nu lelie ro, tuota kemochie sünu ba zolie.

¹¹Mhanuü thechü huonu nieko ze mvüta mu nieko die rünyü mvüta ro nie sünu nu lataketuo ki uko kepetsou zhapu la nie phi nu nyophe rei kepfhüwaliecie” sishü.

¹²Süla uko tuo pra di themia pete bu thenoukedilienukecü pupie mia petha.

¹³Mu uko terhuokesuoko kekra whuowa, mu tier pie kechümia kekra kenheshü di süko chü keshürhoshü.

¹⁴Süki Jisu za meyie tuoketa kediu Herod rei silie. Sitse huomia sie, “Johan mia baptaiz chükezhau kesia nunu rheilasierte; süla puo geinu kekuo mhatho hako chüyakezha zo” sita.

¹⁵Derei kekreiko sie, “Puoe Elija zo” sita. Mu huomia sie “Puoe thiedzü siedzekesiko mia puo tuoi puo rei siedzekesimia puota zo” sita.

¹⁶Derei Herod rei süu silie di sie, “Johan, hadzü a puo tsü ziekewau rheilasiete” sita.

¹⁷Kekreilamonyü Herod thuo puo siezeu Filip kimiapfü Herodia la mia ketseshü di Johan tepie kedieki nu shüwa; Herod-e thenu süpfü lielietacü la.

¹⁸Kekreilamonyü Johan Herod ki, “No n thuo n siezeu kimia liekecü thezho mo zowe” ikeshü la.

¹⁹Süla Herodiapfü rei Johan gei puo nei mo di puo dukhriwa nyü sie. Derei puo silie kenjüta,

²⁰Herod-e Johan miathomia puo mu kemesamia puoücü prei di puo rüguo se bacü la. Siro puo puo die rünyükeshü ki puo nou kemezhie phitaya;[6] sirei puo puo die rünyü nyü phiya.

²¹Derei puotei puo vor, Herod puo kepenuozha nhie puo khro kezhako mu chüpahi mhokezhako mu Galil nu pehüko ze hie.

²²Sidi Herodia nuopfü ler nashüshü di Herod mu vor hiekebako nei chülie; sitse kediu sie rüüpfü ki, “No a ki mha n kenei kehoupuorei chacie, a süu pie n tsütuo” sishü.

²³Sidi puo süpfü mhodzünu rüse zo di sie, “No a ki mha kehoupuo cha rei, puo thuo a kedi tietsa zoshierei a khapie n tsütuo” sita.

²⁴Sitse süpfü tuo prata di vo puo zuo üse, “A bu kedipuo cha ta?” ishü. Sitse puo sie, “Johan mia baptaiz chükezhau tsü” sita.

²⁵Sitse puo rükri kediu ki le di sie, “A n bu Johan mia baptaiz chükezhau tsü pie mekhou puo nu shülie di se vor a tsü nyüyalie” sidi chashü.

²⁶Sitse kediu puo nou kemezhie phita, derei puo thuo puo rüse mu puo phreimiako la süpfü die melieshülie lhota.

²⁷Süla puo rükri rükhoumia puo ketseshü di puo bu Johan tsüu pie mhai vornushü. Sitse puo vo kedieki nunu Johan tsü zielie,

²⁸sidi mekhou puo nunu pie vor rüüpfü tsüshü, mu süpfü süu pie vo puo zuo tsüwa.

²⁹Siro puo siedziko süu sishü tse, uko vor di puo rüngetsa pie vo mekhru puo nu piezhüwata.

³⁰Süsie apostelko vor Jisu khieki kengulie di puo ki uko mha chükelieko mu pethakeshü pete pushü.

³¹Sitse puo uko ki, “Nieko tuo krei vo mia kejüra nu rüleiliecie” sishü, kekreilamonyü themia kekra puo ki vor mu lacü te mo, süla uko mha kecü tei rei jüta.

³²Süla uko thuo rou puo nunu tuo rüdi se themia kejüra puo vota.

³³Siürei themia kekra uko tuotakezhü ngushü mu uko zoükecü silie di rüna neiü nunu par di tuo uko mhodzü rie vo bata.

³⁴Siro puo dzükezha khie vozhü ru, puo themia krodi ngulie; sitse puo uko ngumezhieta, kekreilamonyü uko tekuo puo kepfhe kejü mhie tuokecü la; sidi puo mha kekra pupie uko pethashü.

³⁵Siro teizeitazhü tse, puoe pethakelieko puo ki vor di sie, “Haha terha zo, mu menuo phitazhie;

³⁶Süla uko ketsewa di uko bu vo sonuoki nu u thuo mhakhrü cülietacie” sita.

³⁷Derei puo uko ki, “Nieko uko va chüshücie” sita. Sitse uko puo ki, “No hieko bu vo niekhrüda denari krie kenie[7] ma khrüpie uko vachünuya me?” ita.

³⁸Jisu sie uko üse, “Nieko niekhrüda kitsuo tuo ga? Vo mehoshücie” sishü. Sitse uko vo mehoshü di puo ki, “Niekhrüda pengou mu khuo kenie” ishü

³⁹Sitse puo uko bu themiako pete kie kengupie nha kepejo nu balienushü.

⁴⁰Süla uko puo houhou chülie di huo nu krie puo mu huo nu hiepengou idi balie.

⁴¹Süsie puo niekhrüdako mu khuonie chüpielie mu teigei meho di kethezie pie Ukepenuopfü tsüshü di niekhrüdako bietshielie, sidi pie themiako tsüshünu di pethakelieko tsüshü; siro puo khuonie rei kezapie themia süko pete tsü phreshü.

⁴²Siro uko pete cü di pevü phrelie.

⁴³Süsie uko khuoko rei sa puoseko pfhü kengupie merha kerekenie tshulie.

⁴⁴Siro themia keze mhacükelieko phrükeshü thepfumia nyie pengou.

⁴⁵Süsie puo siedziko bu rükri rou nu lelie di puo mhodzü sie dzükezha khie Bethsaida nu volienushü, sidi puo themiako ketsewa.

⁴⁶Siro puo uko bu vi volienu di pukewa sie kecha chütuoü kijüthou gei vota.

⁴⁷Siro thevatieta tse, rouu dzükezha metsuo nu vota, mu puo rübei kijü keso nu ba.

⁴⁸Siro puoe uko teikhrie u mhodzütsanu u hetakecü la uko rou thou kemezhie phikezhü ngu, sidi khiserüna dzükezha mhonu chatuo uko ki vor. Sidi puo uko therhietatuoüzhü.

⁴⁹Derei uko puoe dzükezha mho chatuo ketuo ngulie tse, ukoe puo üse temi üdi shiekhouita;

⁵⁰Kekreilamonyü uko pete puo ngu di michie phiketa la. Derei puo kenourhei uko rüchü di sie, “Nieko dzüzielie, a zo mu; michie hiecie” sishü.

⁵¹Sidi puo rouu nu le balie tse tei rei rükhrie mota. Süla uko u ngo phita;

⁵²Kekreilamonyü uko niekhrüdako dze rei lelie mo, mu sümho rei uko nou retakecü la.

⁵³Süsie uko süu cie Genesaret kijü nu vorlie, mu uko rou khepie bawa.

⁵⁴Siro uko rou nunu parlie tse mia uko silieta,

⁵⁵sidi sükhiesümhou rüna peteko nu vo di kechükenyümia u zhü gei kezhüko toupie kehourapuorei puo kebara vorür ta.

⁵⁶Siro puo rünako morei nadiko morei lieko nu rei kevo kheko nu uko kechümia pie vo lhithochüko nu piezhü di süko bu puo pfhephrie zorei biekelie le di puo ki cha beitata; sidi puo biekelie kheko shürho phrelielie tuota.