Read Angami Naga Mark 7 Bible Online

Mark 7 - Angami Naga bible

Mark 7

¹Süsie Jerusalem nunu kevor Farisiko mu thezhokepethako huo sa vo puo houpfülie

²Sitse süko puoe pethakelie huomia mesa mo di, puoca u nanyü zho ze u dzie metei mo di, mhacükecü ngu.

³(Kekreilamonyü Farisiko mu Judamia pete u pfutsanuo zho ze u dzie metei menuo kemosie mhacüya mo;

⁴mu lhithochü nunu vor rei u dzie metei kemosie mha kehoupuorei cüya mo, mu süsie rei tehiemekhou mu tieligali mu mesepie kechü mhakhouko mu thegiko puo zho tou medzi di khrü morokesuo la.)

⁵Süla Farisiko mu thezho pethayakezhako sie puo ki, “Kiüdi n siedziko u pfutsanuoko ki nu keyie kevor zhoko medzi mo di u dzie bu rhu di mhacüya ga?” sishü

⁶Sitse puo uko ki, “Isaya siedzekesiu nieko ketherakezhako dze pu toushü di thupiekezhü hamhie, ‘Themia hako u tie se a rhuyakezha zo, derei u noue a ze kepecie phi tuo;

⁷Uko a rüsuo thedo chü tuote, uko themia thuo chücü zhoko se Kepenuopfü zhoko üdi pethayacü la’ sishü.

⁸Niekoe Kepenuopfü diekhakeshüko khawa mu themia thuo kechü zhoko ze menuotuoya” sishü.

⁹Sitse puo uko ki, “Nieko Ukepenuopfü die khakeshüko khawa di nie pfutsanuo zhoko keze do si phite.

¹⁰Kekreilamonyü Mosae sie, ‘Nie puo nie zuo rhulie’; si mu ‘Kehoupuorei puo puo morei puo zuo rüsekezhau bu sia zotuo’ siya.

¹¹Derei mhanuü miapuonie puo puo morei puo zuo ki, ‘A mhakehoupuo rei se n khruohi kezhükoe Korban-u te,’ (puoca, pie Kepenuopfü tsüshüte,)

¹²no mhapuorei n puo morei n zuo la chüshü mote,

¹³sükemhie di nie thuo nie pfutsanuoko zho se mia petha di Ukepenuopfü dieu pie kemethuo chüwate. Mu nieko hamhiekecü kekra chütuoya” sishü.

¹⁴Süsie puo themia krodiu kie lalie di sie, “Nieko pete a die rünyülie di siliecie.

¹⁵Mhakehoupuorei chazou nu themia nou le di puo perhuwaya mo, derei themia nou nu kepar-u thuo puo chü perhuwayakezha zo,

¹⁶(Süla kehoupuorei unyie kenyimia bu rünyüliecie”) sishü.

¹⁷Sidi puo themia krodi-u khawa di tuo kinu le tse puo siedziko dieviu ca ketsota.

¹⁸Puo sie uko ki, “Nieko mhasi mo hathede chütuo zoluo me? Chazou nu themia nou leyakezhako themia chü perhuwalie kenjü,

¹⁹süko u melou nu le monyü u va nu ke di cavüchü nu votayakezha nieko leya mo zo me” sishü. (Puoe sükemhie di kecüca pete mesa üshü)

²⁰Puo la sie, “Themia nounu paryakezhau thuo themia chü perhuwaya.

²¹Kekreilamonyü themia nounu mha kesuo kemedo pierüü kechü, kerügu, mia kedukhri, pieü,

²²Mha kemehou, u nou kerüzhü, mha kese, kekhriekeze nyükecü, mia ngu u mhikelukecü, mia rüpfhürüsekecü, kemiakokecü, kerhanyakecü parya.

²³Mha kesuo hako pete u nounu par di u chü perhuwaya” sita.

²⁴Süsie Jisu thechü sünu nu tuo Tur[8] rünatsa vota. Sidi puo ki puo nu lelie mu miapuorei bu puo sünu keba si nyü mota. Derei puo rüshülie kenjüta,

²⁵sükisü miapfü puo puo nuopfü mesakemo ruopfü bu puo kebi zetuoketapfü puo, puo dze si mumetha kenourhei vor puo phinu zhüta.

²⁶Thenu süpfü Sairofonik nunu kevor Judakemomiapfü puo. Sitse hapfüe puo bu puo nuopfü gei terhuokesuou whuowanu chata.

²⁷Süsie puo hapfü ki, “Nhicuko bu pevülie riecie, nhicunuoko nouva kelhoupie tefüko tsükewa puotou mokecü la” sita.

²⁸Derei hapfü la sie, “Kepethau, siürei tefünuoko rei mizhü khro nu nhicunuoko ca rürie ketsurko pa cüya zolie” sishü.

²⁹Süla puo sie hapfü ki, “N die süu la, kinu la volie, terhuokesuou n nuopfü geinu prate ho” sita.

³⁰Sitse süpfü kinu vo ru unuoyo thezhü gei zhü mu terhuokesuou puo geinu praketa ngulie.

³¹Siro puo Tur rünatsa nu la vorlie, sidi Sidon pfüthe Dekapoli rünatsa nu Galil dzükezha nu vor.

³²Sitse mia nyievü mu diepu keluodekecümia puo ze puo ki vor; sidi uko puo bu süu bieshünu puo ki cha beita.

³³Süla puo themia krodiu nunu puo ze krei mharapuo vo di, puo dziekinuo pie themia süyo nyieto nu shü mu puo mhitsielie di se puo meü bieshü.

³⁴Sidi puo teigei meho mu shiekhoui di sie, “Efatha” puoca, “Cie parliecie” sishü.

³⁵Sitse vapuonu mha pfhe silieta, mu puo meü rüprei parlie di diepu kemecielieta.

³⁶Süsie Jisu themiako bu süu se mia puo ki rei pu hienu beiwa, derei uko bu pu hienukeshüu pu kechükuota.

³⁷Sitse themia pete u ngo pie u ngothorta di sie, “Puo mha kehoupuorei chü pevi seshü ze; puo nyievümia bu rei mha pfhe silie mu keliehuomia bu rei diepuliete!” sita.