Read Angami Naga Mark 8 Bible Online

Mark 8 - Angami Naga bible

Mark 8

¹Süsie themia krodi puo la vor kengulie mu uko kecüca puorei tuo mocü la puoe puo pethakelieko kielie di sie,

²“A themia krodiu ngumezhiete, kekreilamonyü uko zha se a zetuote mu kecüca puorei tuo mote.

³A uko vachüshü mo di ketsepie kinu shü ro uko cha nunu phisiatatie, kekreilamonyü uko huomia cha cha phicü nunu vor” sita.

⁴Sitse puoe pethakelieko sie, “Kimhie di rayha nu kecüca themia hade kelhuo ngulie vituo ga?” ita.

⁵Sitse puo sie, “Nieko niekhrüda kitsuo se tuo ga?” idi ketso. Uko sie, “Thenie” sishü.

⁶Sitse puo themiako bu kijü balienushü; sidi puo niekhrüda thenieko chüpielie mu kethezie khashü di süko bietshielie di pethakelieko bu pie themiako tsünu khashü; mu ukoe süko zashü.

⁷Siro uko khuo kecü nuonuo huoyo rei se tuo, sitse puo jashü süko gei reishü di uko bu pie themiako zashünushü.

⁸Mu themia pete cü di pevü phrelie; süsie pethakelieko cü kepesha puoseko merha thenie ketshu kengu lalie. Süsie puo uko ketseshüwa.

⁹Mu süko mia nyie dia mese.

¹⁰Süsie puo pethakelieko ze rou puo nu pfü mhalie di Dalmanutha[9] kijütsa vota.

¹¹Sitse Farisiko vor puo kedo di puo bu teigei nu zasi puo chüpie uko kieshünu puo ze keprüli sie.

¹²Derei puo ruopfü nunu puo noukemezhiekecü pfhe phra sie di, “Kiüdi thephou hau u ngo mhatho pfhüya shi? A nieko ki pu toushütuo, zasi sikecü puorei kha lapie thephou hau tsülie lhote” sita.

¹³Sidi puo uko khawa di rou nu lelie di tuo kekreitsa vota.

¹⁴Puoe pethakelieko niekhrüda chülie rükra mota; mu uko rou nu niekhrüda puo zie se tuo mota.

¹⁵Siro Jisu uko tarho di sie, “Menuolieluo, Farisiko khrei mu Herod khrei la nie kireiliecie” ishü.

¹⁶Sidi uko sie huoniehuo ki, “Úko niekhrüda se tuo moketa la süu pute” ituo.

¹⁷Sitse Jisu süu silie di sie uko ki, “Nieko kiüdi niekhrüda pfü tuokemo dze kepu ba mu? Nieko tsierei si mu lelie mo zo me? Nieko nou repie hi ba zo me?

¹⁸Nie mhi nyi di mhangulieya mo zo me? Nie nyie nyi di rünyülieya mo zo me? Nie süsü lelie mo me?

¹⁹A niekhrüda pengou bietshiepie mia nyie pengou vachükeshü ki nie puoseko merha kitsuo ketshu kengu lalie ga?” ishü. Sitse uko sie puo ki, “Kerekenie” sishü.

²⁰“Siro a niekhrüda thenie bietshiepie mia nyie dia vachükeshü ki nie puoseko merha kitsuo ketshu kengu lalie ga?” sita. Sitse uko la sie, “Thenie” ishü.

²¹Sitse puo uko ki, “Nieko tsierei puocapuola silie mo zo me?” sishü.

²²Süsie uko Bethsaida nu vorlie. Sitse mia kro puo mhiciemia puo ze Jisu ki vor di puo bu puo bieshünuta.

²³Sitse puo mhicieu dzie teshüse rüna khie prata, sidi puo mhitsie üse puo mhi nu shü mu puo dzienie pie puo bie di “No mha huo ngu ba mo?” ishü.

²⁴Sitse themiau sie mha mehoshü di, “A themia ngu tha, derei uko ngupie seibo mhie di chatuo tuo” si.

²⁵Sitse Jisu puo dzienie pie themiau mhi bie lashü; mu themiau puo mhi pelapie mha mehoshü ru puo mhi mhangu par di mha pete ngu mecümecielieta.

²⁶Süsie Jisu puo bu kinu votanu di, “No rünau nu la le hie”[10] iwa.

²⁷Süsie Jisu puoe pethakelieko ze Kaisaria Filipi kepenuo rünako nu vota, cha nu ketuo ki puoe pethakelieko ki, “Mia a üse supuo üya ga?” idi ketso.

²⁸Sitse uko sie puo ki, “Johan mia baptaiz chükezhau; mu kekreiko Elija üsi, tsiu huomia we siedzekesiko mia puo üsiya” sishü.

²⁹Sitse puo uko ki, “Derei nieko we a üse supuo üya ga?” idi ketso, sitse Pitor puo ki, “No Khristau zo” si.

³⁰Sitse puo uko bu puo dze pie mia puo ki rei pu hienu di uko kha beiwata.

³¹Süsie puoe Themia Nuou kemezhie phiketuo mu pehüko, phichükezhako mu thezhokepethako bu puo meliewaketuo, tsiu mia bu puo dukhriwa, derei zha se sie puo rhei lasielieketuo pushü.

³²Mu puo die süko pete pulapuluoshü. Sitse Pitor puo ze kerei vo di puo kerhieta.

³³Derei puo rürei vo puoe pethakelieko meho, mu Pitor kerhie di sie, “No a sietsa votalie, Satan! kekreilamonyü no n noupie Ukepenuopfü gei monyü themia rüliko medoyakezha ze ha!” sita.

³⁴Süsie puo themia kro-u mu puoe pethakelieko sa kiepie puo ki shülie di uko ki, “Themia kehoupuorei a siemedzi kenyümia, sümia bu puo thuo puo meliewa mu puo krus pielie di a siemedziliecie.

³⁵Kekreilamonyü kehoupuorei puo thuo puo phou pekrupie puo vie chülie nyüyakezhamia süu pejüwatuo, derei kehoupuorei a la mu dieliekeviu la puo phou khakeshümia süu pekrulie zotuo.

³⁶Siro mia puo kijü pete peviepie puo vie chülie ürei puo kerheiro pekawa ro kedipuo kepra ba ga?

³⁷Kekreilamonyü puo mhapuorei pie puo phousou chülie kenjü zo.

³⁸Kehoupuorei pieü mu kephouma hako mhodzünu a dze mu a dieko pu mengaya ro, Themia Nuou rei kemesa dieliemiako ze puo Puou zapuzayie nunu kevor ki puo dze pu mengatatuo” sishü.