Read Angami Naga Mark 9 Bible Online

Mark 9 - Angami Naga bible

Mark 9

¹Süsie puoe uko ki, “A nieko ki pu toushütuo, haki huomia Ukepenuopfü kedi kekuo kevor ngu kemochie siatalie lho zokecü kro puo tha zo” sishü.

²Zha sorou sie Jisu Pitor, Jakob mu Johan zelie di uko rübei kijüthou kerükrie puo gei kho. Sitse uko mhingu kinu puo kelhou kreikhrota,

³sidi puo pfhenei kra rütsheta, kijü nu miapuorei pfhe menyi pekrapie sükemhie chülie kenjükecü chüta.

⁴Sükisü ukoe Elija mu Mosa unie Jisu ze kerüchü ketha ngu.

⁵Sitse Pitor sie Jisu ki, “Rabi, úko keze haki ba ro vi zotuo; pru[11] se chülie khe, puo n la, puo Mosa la, mu puo Elija la” ishü.

⁶Puoe kedipuo pu morosuo shicü si mota, uko michiethorketa la.

⁷Sitse kimhou shü vor uko soulie, mu kimhou nunu mhapfhe par di, “Hauha a Nuo a Khrieu zo, puo pfhe rünyüliecie!” si.

⁸Süsie uko rükri lutsahatsa meho sie ru, Jisu rübei uko zeketha sie miapuorei ngu mota.

⁹Siro uko kijüthou geinu kerkezhü ki puo uko kha bei di uko bu Themiau Nuou kesiako donu nu rheilasielie kemochie uko mha kenguko se mia puo kirei pu hienuwa.

¹⁰Süla uko kesiako donu nu rheilakesie sü puoca kedipuo shi icü huoniehuo ketso di puo die ze bata.

¹¹Süsie uko puo ketso di, “Kiüdi Thezhokepethako Elija bu vor rie morosuo ükecü puya ga?” ita.

¹²Sitse puo sie uko ki, “Ketho, Elija vor di mha peteko chü pevi lashütuo. Kiüdi siro Themia Nuou kemezhie pie doneiü chü mu mia bu puo meliewatuoükecü dze thupie tuo ga?

¹³Derei a nieko ki pushütuo, Elija vorwate mu puo dze thupiekezhü tuoi mia puo geinu mia medoko chüwate” sita.

¹⁴Süsie uko pethakelieko ki vor tse themia krodi puo uko houpfü ketha ngulie, mu thezhokepetha huo uko ze kemeü tha.

¹⁵Siro themia kroko puo ngushü tse uko ngo phi di ta puo ki vo puo keluta.

¹⁶Sitse puo uko ki, “Nieko uko ze kedipuo keprüli ba ga?” idi ketso.

¹⁷Sitse krodiu donu mia puo sie, “Kepethau, a a nuou ze n ki vorya; mesakemo ruopfü puo ze tuokecü la puo diepulieya mo;

¹⁸mu kehourapuorei puo ketsilie ro puo nepie kijü shüpie zhüwawaya; sidi puo mhitsie meluo rherhe di puo hu thegei krükrütaya, sidi meteitotaya; mu a noe pethakelieko bu süu whuowanushü derei uko süu chülie kenjüte” sishü.

¹⁹Sitse puo uko ki, “Harie, kepele kejüko, a bu kichiepuo nie ze batuo ga? Mu kichie nie gei shügeshühie batuo ga? Puo ze a ki vorcie” sishü.

²⁰Sitse uko süu ze puo ki vor. Siro mesakemo ruopfüu puo ngushü mumetha unuoyo pechü phita, sidi puo pfü kelhoupie kijüshüwa di puo mhitsie meluo rherhepfüzhüta.

²¹Sitse Jisu sie, “Puo teicie kichiepuo hituota ga?” idi puo puou ketso. Sitse puo sie, “Puo nhicu nunu hituota zo.

²²Siro mesakemo ruopfüu va kekra puo biekhriwatuo üdi puo kelhoupie mi nu rei mu dzü nu rei shüwawaya; derei no mha huo chülie vi ro hie ngumezhie di hie khruohishücie” si.

²³Sitse Jisu sie puo ki, “No chülie vi ro le? Peleyakezhamia we mhakehoupuorei chülie vi zo!” sita.

²⁴Sitse puo puo sü shiekhoui di sie, “A rei peleyawe, a kepele ketsa ha chü pekrashü a tsüyi!” si.

²⁵Siro Jisu krodiu takewhuo vorkezhü ngu di puo mesakemo ruopfü süu ruo di sie puo ki, “Keliehuo mu nyievü ruopfüu, a n ki puya, no puo geinu pratacie, sidi mhakipuorei puo nu la le hiecie” sishü.

²⁶Süki ruopfü süu ruorüi mu puo pechüpenyü phishü di prata, mu unuoyo ngupie kesiamia mhiezhüta tse, themia kekra sie, “Puo siate” ita.

²⁷Derei Jisu puo dzie teshülie di puo phoushü tse puo siethalieta.

²⁸Süsie puo kinu vorlie tse, puo pethakelieko pekhre puo ki, “Kiüdi hieko cüu whuolie kenjüta ga?” ishü.

²⁹Sitse puo uko ki, “Hamhiekecüha kecha[12] nunu zo kemosie parlieya mo” sita.

³⁰Süsie uko sünu nu tuo Galil pfüthe vota. Siro mia puo bu rei süu si nyü mota;

³¹kekreilamonyü puoe pethakelieko petha di uko ki, “Themia Nuou tepie mia dzie nu shüwa di mia bu puo dukhriwatuo, sirei puo rheilasielietuo” si.

³²Derei uko puo pukeshüko caüla silie mota mu puo ketso rei michieta.

³³Siro uko Kapernaum nu vorlie di kinu lerlie tse puo uko ketso di, “Nieko chala nu kedipuo pu kemeütuo ga?” ita.

³⁴Derei uko kemekrieta, kekreilamonyü uko chanu ketuo ki supuo kezhatho chütuo shikecü se kemeü tuo.

³⁵Siro puo ke balie, di kerekenieko kieshü di uko ki, “Kehoupuorei rie nyü ro, puo bu kenuotho-u chülie mu mia pete kituo chülie,” sishü.

³⁶Süsie puo nhicumia yopuo ze vor uko donu balie mu süyo pielie di sie, uko ki,

³⁷“Kehoupuorei a za nunu nhicunuo hikecü yopuo rei zelieyakezhau, a zelieya; mu kehoupuorei a zekeliemia a rübei monyü a ketsekeshüu rei zelieya” sita.

³⁸Johan sie puo ki, “Kepethau, hie mia puo n za se terhuokesuoko whuoketuo ngu, mu puo hie siemedzikemo la puo bu chü hienuwate” sita.

³⁹Derei Jisu sie, “Puo kha hie, kekreilamonyü miapuorei a za nunu u ngo mhatho chü tuo di a tha mhatalie kenjü zo.

⁴⁰Kehoupuorei u ngumvükemomia u kitsa zo.

⁴¹A nieko ki putoushütuo, themia kehoupuorei nieko üse Khrista vie üdi dzü hie yopuorei pie nie dieshü ro, mhakipuorei puo zhakhra pejüwalie lho.

⁴²“Kehoupuorei pelekezha kecü hako mia yopuorei chakha chükeshüu mha kegetsie kezha puo pie puo vo gei kheshü di kelhoupie dzükezha nu shükewa we puo dze vikuotuo.

⁴³Mhanuü n dzie n chü pesuoya liro, da kelhouwacie, n dzie kenie pfü di mhetayakemo mizieu[13] nu kele ki lalhi di kerhei nu kevo we n dze vikuotuo.

⁴⁴(Sünu puo khuko siataya mo mu mi rei mhetaya mo.)

⁴⁵Siro n phi n chü pesuo liro da kelhouwacie; n phi kenie pfü di n kelhoupie mizie nu shükewa ki lalhi di kerhei nu kele we n dze vikuotuo.

⁴⁶(Sünu puo khu siataya mo mu mi rei mhetaya mo.)

⁴⁷Tsiu n mhi n chü pesuo liro kerülawacie; n mhi kenie pfü di mizieu[14] nu kele ki mhi puo pfü di Ukepenuopfü kedi nu kele we n dze vikuotuo,

⁴⁸sünu puo khu siataya mo mu mi rei mhetaya mo.

⁴⁹“Kekreilamonyü metsie pie mha pecüyakezha tuoi, mi pie kehoupuorei the pecü phre zotuo.

⁵⁰Metsie vi zo; derei metsie zorei puo kelhe jüta ro, nieko kedipuo pie süu chü pelhe la ta? Metsie tuoi nie kelhe nyilie, mu mia pete ze kezevi balie” sishü.