Read Angami Naga Luk 10 Bible Online

Luk 10 - Angami Naga bible

Luk 10

¹Mha hako sie Niepuu mia kekrei hiethenie kedalie di süko mia kenienie di ketsepie puo votuoükeba rünako mu thechüko nu shü.

²Sidi puo uko ki, “Lieyie we krathorzhü zo, derei liethomia we tsa, süla nieko lieyie Niepuu bu mhathomia ketsepie puo lieyie nu shülieketuo la puo ki chaliecie.

³Nieko tuoshülie. Harie, tekuo socie donu kevo tuoi a nieko ketseshüzhie.

⁴Nieko priesabou morei likhuo morei phikou puorei se hie; siro chala nu miapuorei kelu tha hie.

⁵Siro nieko ki kehoupuo nu le rei, ‘Nouneu bu ki hanu baliecie!’ idi pushü rielie.

⁶Mu noune lielie kenyü huo sünu ba ro, nie nouneu bu süu gei balietuo, mo liro nouneu la nie gei vortatuo.

⁷Siro lekelie kiu nu ba zolie, sidi mia mha khakeshüko cü mu krielie, mhakechümia puo zha ngu zhü zocü la. Ki puo nu ba di rüdi la ki kekrei puo nu vota hie.

⁸Nieko rüna kehoupuonurei kele ki mia nieko zelie ro, mia mha kesekeshüko cüliecie;

⁹tsiu rüna süu nu kechükenyüko chü keshürhoshülie, mu uko ki, ‘Ukepenuopfü kedi vor nie penuo batewe,’[23] idi pushülie.

¹⁰Derei nieko rüna kehoupuonurei lecü ki mia nieko ze mvüta ro, chaüko nu par di,

¹¹‘Nie rüna nunu nyophe hie phi gei pfüketako kepfhü lapie nie gei shüya. Sirei hau we siliecie: Ukepenuopfü kedi vor penuo bate’ ishülie.

¹²A nieko ki pu toushütuo, sünhie rüna süu rüli ki Sodom kijünuko rüli we hiepfü rüükuotuo.

¹³“Ce, Korasin, no we chülietie! Ce, Bethsaida, no rei chülietie! Mhanuü nnie gei chükeshü u ngo mhathoko Tur mu Sidon nie gei chüshücü siewe thiedzütho rüna sünie nu themiako gakhropfhe dzie, tsiu migepie u kenhepfü di u nou kedilietieciü.

¹⁴Süla ketsokecü nhie unie ki Tur mu Sidon nie rüli we hiepfü rüükuotuo.

¹⁵Siro no Kapernaum, n thuo n chü kerükrie se kho tei thutuoü ba me? N chü kerünuopie Hades nu tsuwatuo.

¹⁶“Themia kehoupuorei nie pfhe rünyükezhau a pfhe rünyüya; tsiu kehoupuorei nie melieyakezhau a melieya mu a ketsekeshüu rei meliewaya” sita.

¹⁷Süsie hiethenieko[24] u nei phi di la vor di sie, “Niepuu, terhuokesuoko zorei n zanu hieko die zeliewe!” sishü.

¹⁸Süsie puo uko ki, “Satan teigeinu teikemela tuoi te tsurketa a ngu ho.

¹⁹Harie, a nieko bu tinyhü mu seba kedelieketuo tsiu ngumvüu kekuo pete penyülieketuo mu mhapuorei bu nie pechüwalie kelho kekuo khashü nie tsüwate.

²⁰Sirei ruopfüko nie die zeketa la nieko nei hieü, nie za thupie teigei zhüketa la nie neiliecie” sishü.

²¹Süki Jisu Kemesa Ruopfüu nunu puo nei di sie, “A Puo, tei mu kijü chükeshüu, a n tsheya, no mhakesikeleko ki we mha hako kevie se tuo di pie nuoranuoko pesikeshü la; ketho, a Puo mha hau n mhodzüki we n nei n medote.

²²A Puouu thuo mha peteko khapie a dzie nu shüwate, Puou zokemosie miapuorei Nuou supuo shi siya mo, sütuoi Nuou mu Nuo süu thuo thapie kiekeshüu zo kemosie miapuorei Puou supuo shi siya mo” si.

²³Süsie Jisu reipra pethakelieko meho di pekhre uko ki “Nie nguyakezhako ngukecüko we thejakepfütho!

²⁴Kekreilamonyü a nieko ki pushütuo, siedzekesimia mu kedimia kekra rei nie kenguko ngu nyü phi vor, derei ngulie mo, nie kerünyüko rünyü nyü phi vor, derei rünyülie mote” sita.

²⁵Siro thezhokesimia puo sier Jisu kedo di sie, “Kepethau, a bu kechachie kerhei ngulieketuo la kedipuo chülie morosuo ga?” ita.

²⁶Sitse puo sie puo ki, “Thezho-u nu kedipuo thupiezhü ga? No kimhie di süko phrüya ga?” ishü.

²⁷Sitse puo sie, “No n melou pete, n kerheiro pete, n kekuo pete tsiu n nou pete se Niepuu n Kepenuopfü khrieliecie, mu n siezanuomia khriepie n thuo n kekhrie mhielie” sishü.

²⁸Sitse Jisu sie puo ki, “No kela toushüte, no hau chülie, silie liro no rheilietuo” sita.

²⁹Derei puo thuo puoü mezhülie nyü di sie Jisu ki, “Siro supuo a zanuou ga?” ita.

³⁰Sitse Jisu sie, “Thiedzü mia puo Jerusalem nunu rüve Jeriko nu kezhü ru sekecümia kro puo bu puo telie, puo pfheneiko rhuowa, mu puo vüpie puo bu siatanuo di khapie zhüwa di tuota.

³¹Siro süki thekhrüchü zievomia puo cha süu ze ker, themia süu ngu derei puo khie rho kekreitsa vota.

³²Süsütuoi Levimia puo rei süki ker ru, themia süu ngu di chakhie rho kekreitsa prata.

³³Derei Samariamia puo rüve cha süu khieki vor ru; puo süu ngushü di puo nou mezhieta.

³⁴Tsiu puo tuo süu ki phi di tier mu khubezu rupie thepfüko vashü di pha phreshü; sidi puo gada geinu puo pfü rüsoki nu vo di puo theke bata.

³⁵Siro süsie nhie puo denari kenie chüpie rüsoki niepuu tsü di sie, ‘No puo theke balie; siro no ha kezie peprawa zorei, a la kevor ki khapie n tsüwatuo’ ishü.

³⁶Ki-a, n kele ki hako seko donu kiu mia bu puo vükewau zanuomia ücü le ga?” sita.

³⁷Sitse puo sie, “Puo ngumezhiekeshüu ze mu” sita. Süla Jisu sie puo ki, “No rei vo di sükemhie chüliecie” sishü.

³⁸Süsie uko chanu vozhü ru, puo rüna puo nu le; sitse puo za Martha ücüpfü puoe puo pesolie.

³⁹Siro süpfü puo siezepfü puo ba, mu puo za Maria üsi ru süpfüsü Niepuu phinu ba di puo die rünyü ba.

⁴⁰Derei Martha we mha neiüko chü merei ba zo, süla hapfü puo ki par di sie, “Niepuu, a siezepfü tuota di a bu a rübei merei bakecü ha no n nounyü mo zo me? No puo ketseshü di puo bu vor a khruohishücie” sita.

⁴¹Derei Niepuu puo ki, “Martha, Martha, no we mha neiüko chü di n nounyü mu n noukemezhie chüzhie,

⁴²derei chü kezhütho-u we mha puo rübei zo. Maria we mha kevitho-u, mhakipuorei puo dzie nunu sesetalie kelho-u kedaliete” sita.