Read Angami Naga Luk 11 Bible Online

Luk 11 - Angami Naga bible

Luk 11

¹Süsie puo mharapuonu cha ba di chathekewa ki, puoe pethakelieko mia puo sie puo ki, “Niepuu, Johan puo siedziko pethakeshü tuoi kechakechü do pie hieko pethashücü mu” sita.

²Sitse puo uko ki, “Nieko chakecü ki, hamhie di pulie: “Hie Puou[25], n za bu kemesau chüliecie, N kedi chü vorliecie.

³Thiethie va kha hie tsücie.

⁴Siro hie kephoumako vashü hie tsücie, hie rei mia hie thepesuokeshüko vapie mia tsükewa tuoi. Siro hie khapie kedokecü nu shü hiecie” sishü.

⁵Sitse puo uko ki, “Nieko donu miapuonie puo khrietho puo nyi di khisoteiluo ze puo ki vo di sie puo ki, ‘A zeu, no niekhrüda se pie a thepu bacie;

⁶Kekreilamonyü a zemia puo a ki vorte, mu a mhapuorei pie puo tsüketuo jüte.’

⁷siro puo kinu nu sie, ‘A keyhu hie; kikha rei khaliete, mu a nuonuoko rei hieko thezhünu zhü phrete; a la sie mhapuorei khapie n tsülie kenjüte’ situo me?

⁸A nieko ki pushütuo, puoe puo zeucü la sier mha pie puo tsü monyü, puoe cha bei zo thaketa la puo sie di puo kecha kheko khapie puo tsü zotuo.

⁹“Süla a nieko ki pushütuo: Chacie, siro khapie nie tsütuo, pfhücie, siro nie ngulietuo; ketouya zocie, siro khrüshü nie tsütuo.

¹⁰Kekreilamonyü themia kehoupuorei chayakezhau ngulieya, mu pfhüyakezhamia rei ngulieya, tsiu ketouyakezhamia mia kikha khrüshü sümia tsüya zo.

¹¹Nie donu supuonie puo nuo khuo cha ro,[26] khuo sounu tinyhü pie puo tsüya ga?

¹²morei puo thevüdzü cha ro, seba pie puo tsüya ga?

¹³Siro nie kesuomia zo rei, mha kevi pie nie nuonuo ketsü do si ro, teigei keba Puou Kemesa Ruopfüu[27] pie puo ki chayakezhamia tsü phishü motuo me?” sita.

¹⁴Süsie puo keliehuou geinu terhuokesuou whuoshü ru, terhuokesuou parta tse, themia süu die pulieta, süla themia krodiu u ngota.

¹⁵Derei süko mia huo sie, “Puo terhuokesuoko kekhakezhau Belzebul ze di terhuokesuoko whuoketuo zowe” sita.

¹⁶Sirei kekreiko puo kedo di puo bu teigeinu zasi puo chüpie uko kienuta.

¹⁷Derei puo uko noudoko silie di uko ki, “Kedi kehoupuorei puo thuo puo pfüphrota ro kataya, mu ki puo bie pie ketsieyashü ro tetsutaya.

¹⁸Mhanuü Satan rei puo la kekrei di kepfüphrota ro kikidi puo kedi thalietuo ga? Kekreilamonyü nieko a üse Belzebul ze di terhuokesuoko whuoya üte.

¹⁹Sirei tsie a Belzebul ze di terhuokesuoko whuoya ro, nieko nuonuoko supuo ze di süko whuoya ga? Süla uko nie capi chütuo.

²⁰Derei a Ukepenuopfü dziekinuo se terhuokesuoko whuoya liro Ukepenuopfü kedi vor nie tso bate.

²¹Kekuomia puo puo rünyie pete kesepfü di puo ki pfhe bakelie ki puo vienyako kru balieya.

²²Derei puo ki kuokuocü mia puo vor puo penyülie sidi puo rünyieko pete pielie, tsiu puoe sekelieko geinu pete kezalieya.

²³Kehoupuorei a kitsatie kemo-u a ngumvümia zo, mu kehoupuorei a ze mha kenguya kemo-u kezakeziwaya.

²⁴“Mesakemo ruopfüe mia puo geinu praketa ki, puo kerülei ba pfhü di dzü kejüko nu voya. Derei ngulie kemo la puo thuo puo rüchü di sie, ‘A tuo la a thuo a kinu votatuo’ si tuoya.

²⁵Süla puo la kevor ki, mia ki süu tsho kemesa mu ketsopie keba ngulieya.

²⁶Siro puo tuo la pra puo kirei suokuokecü ruopfü kekrei thenie zelie di la vor süu nu bataya, sidi themia süu rüli thelatsa therietsa ki rei suokuotaya” sishü.

²⁷Süsie puo die hako pushüwa tse themia krodiu do nunu miapfü puo melie puo rhie chü di sie puo ki, “N penuokeshüpfü mu n nukeshüpfü ki thejakepfü jü” sita.

²⁸Derei puo sie, “Süu ki rei Ukepenuopfü dieu rünyülie mu süu chüüzekelieko we thejapfükuo zo” sita.

²⁹Siro themia krodi vor kengu miemielie tse, puo sie, “Tsiedo nuoko ha themia kerüzhü kro puo zo; uko zasi puo chaya, derei Jona geinu chükeshü zasiu zo kemosie zasi kekrei puorei chüpie uko kie salie lho.

³⁰Thiedzü Jona pie Nineviko mhodzü zasi chükeshü tuoi, sütuoi Themia Nuou pie tsiedo nuoko la zasi puo chütuo.

³¹Siro mia ketsoketuo nhie pesotsa kedipfü siethalie di tsiedo nuoko pejotuo, puo kijü vala nunu Solomon mhasi die rünyütuoü vor zocü la, mu harie, Solomon ki zhakuocü puo haki tha.

³²Siro mia ketsoketuo nhie Ninevimiako sier tsiedo themia hako ze thalie di uko pejotuo; süko Jona bu vo uko pethakecü ki uko nou kedilieketa la; mu harie, Jona ki zhakuokecü puo haki tha zo.

³³“Miapuorei mibou petupie mia ngu kemora khapie baya mo, morei bie khro baya mo, derei khapie mituba gei baya sidi kinu kelerko bu kezie ngulieya.

³⁴N mhi-e n mo-u la mituu zo. N mhi vi ba ro n mo peteu ziepoui baya, derei n mhi suota ro n mo rei zei boui bataya.

³⁵Süla no n gei keba kezieu kezei nu bate mo ki shi le menuoshülie.

³⁶Süla n mo pete ziepoui di keduonuoyo puorei zei moto balie liro, mitue puo kezie kemevau se n va peziekezha tuoi, n mo pete ziepoui balietuo.”

³⁷Jisu die pu ketha nu, Farisimia puo puo ze hietuoü di puo kie, süla puo puo kinu mhacütuoü ke balie.

³⁸Süki Farisi-ue Jisu mhakecü mhodzü puo dzie meteikemo ngupie puo ngota.

³⁹Süla Niepuu puo ki, “Nieko Farisiko nie khou nie hieko puo mhotsa we chü kemesaya, derei puo noutsa we kerüzhü mu kesuo thuo tshutuoya.

⁴⁰Harie, kenyako! Chazoutsa chükeshüu puonou tsa rei chüshü mo me?

⁴¹Süla mha nie kinu kebako khapie mia ngumezhiewacie, siliro nie la, mha pete rei mesatatuo.

⁴²“Derei Farisiko, nieko we ce, chülietie! Nie ganyagara neiüko, nietso mu niepfhü kemhieko rei ker zau khashüya, derei nie Ukepenuopfü la kethoca mu kekhrie we therhietaya, kekreiko rei khawa mo di nie hako rei chü zhü zo.

⁴³Harie Farisiko, nieko we ce, chülietie! kekreilamonyü sinagogko nu theba keviko nu ba nyü tsiu lhithochüko nu mia bu nie kelucü nie neiya.

⁴⁴Nieko we ce, chülietie! kekreilamonyü nie mia nguyakemo mekhru mia puo gei tuo vo rei siyakemo mhie zo” sita.

⁴⁵Sitse thezhokesiko mia puo lasie puo üse, “Kepethau, no die hau pukeshü hieko rei sa kengata zo!” sita.

⁴⁶Sitse Jisu sie, “Ce, nieko thezhokesiko rei chülietie! kekreilamonyü nie thepie pfülie kelhoko mia bu pfüya, derei nie thuo zowe nie dziekinuoyo puorei pie phi thepie süko nyüya mo.

⁴⁷Nieko we ce, chülietie! Nie puotsanuoko thuo dukhrikewa siedzekesiko mekhru pfhetuoyakecü la.

⁴⁸Siüro, nie thuo rei nie puotsanuokoe chüwaketako nie medo zoükecü thashüta zo; uko siedzekesiko dukhri, mu nie süko mekhruko chüya.

⁴⁹Süla Ukepenuopfü Mhasiu rei pucü, ‘A siedzekesiko mu Apostelko ketsepie uko kishütuo; sitse uko süko dukhri mu kekreiko pechüpenyütuo’ isi zo.

⁵⁰Sidi kijü chülie tse nu siedzekesiko zie kepekru khepuu tsiedo nuoko geinu lieketuo ki,

⁵¹Abel zie nunu vo ruosuobau mu ruosuokiu do nunu dukhrikewa Zakaria zie ketsotuo. U, a nieko ki pushütuo tsiedo nuoko geinu khepuu lie zotuo.

⁵²Thezhokesithoko, nieko we ce chülietie! nie mhasi cabiu pielieketa la; nie thuo zorei leya mo, tsiu kekreimia lekezhüko rei khawaya!” sita.

⁵³Siro puo sünu nu prazhü tse, leshükesithoko mu Farisiko puo nou chü kerüpepie puo bu mha neiü kelaketuo la mha kekra pie puo ketsota,

⁵⁴Sidi puo mha pu kesie nu mha huo kekrüshü tse puo telieketuo le terütuota.