Read Angami Naga Luk 12 Bible Online

Luk 12 - Angami Naga bible

Luk 12

¹Süki mia soünyie krodi chü vor kengulie, ru themia krathorta, süla uko huoniehuo phi kede zota, süki puo sie puoe pethakelieko ki, “Nieko Farisiko khreiu, süusü ketherakecüko la menuoliecie.

²Derei mhapuorei se mia pesi pengulie lho üdi whepie keba jü; tsiu mia bu si motuoü di keviepie kezhü jü zo.

³Süla nieko kezei nunu pukeshüko mia kezie nunu süko situo, tsiu nie kinutshekou nu pukeshüko pie kitsü geinu shieshütuo.

⁴“A kezeko, a nie ki pushütuo, themo-u dukhriwa rei süsie mhapuorei chü salie kenjükecü, nie mha süko prei hiecie.

⁵Derei a nie bu supuo prei zhü shikecü pushü nie kietuo: Dukhrikewa sie rei kelhoupie mizie nu shüwalie kevi kekuo kebau preiliecie. Ketho zo, a nieko ki pushütuo, puo prei zolie!

⁶Ciekhrienuo pengou pie priesa kenie nu zeya mo me? Siüderei Ukepenuopfü mhodzünu we süko yopuo rüli rei rükra motaya mo.

⁷Sizomonyü nie tsü gei nie thaprüko pete rei phrüliete. Süla michiepie hiecie: nieko Ciekhrienuo kekra ki rei vikuo eru!

⁸“Siro a nieko ki pu toushütuo, themia kehoupuorei themia mhodzünu a phraya liro, Themia Nuou rei Ukepenuopfü dielieko mhodzünu puo phratuo,

⁹derei kehoupuorei themia mhodzünu a melieta ro, Themia Nuou rei Ukepenuopfü dielieko mhodzünu puo meliewa zotuo.

¹⁰Siro themia kehoupuorei Themia Nuou kepetsou die kepu la zowe vapie tsütuo; derei kehoupuorei Kemesa Ruopfü tha ro vapie tsülie lho.

¹¹Mu mia nie ze sinagogko nu, kezhako mu kekuokeseko mhodzünu kevo ki nie thuo nie rüguolieketuo la morei kedipuo putuo shicü le nie noukemezhie hiecie,

¹²nie bu pu morokesuoko puotei touki nu Kemesa Ruopfü thuo khashü nie tsü zotuocü la” sita.

¹³Süsie mia krodiu donu mia puo sie puo ki, “Kepethau, no a siezeu bu hienie kinu thekau a ze kezalienushücie” si.

¹⁴Derei puo sie süu ki, “Kezeu, supuo a bu nnie nyiekecütuoü morei nnie vieko kezaketuo chüshü ga?” sita.

¹⁵Sitse puo uko ki, “Menuolie, tsiu mha kemehou pete nu nie kirei seituolie; themia kelhou ha puo kinyi kekra keba la rei balieya mo zocü la.

¹⁶Süsie puo dievi puo pie uko ki pu di sie, “Kenyimia puo puo lie nu mhatho si rüchü philie.

¹⁷Sitse puo thuo puo nounu puo rüchü di, ‘A a mhatho siko kenguketuo thechü puorei jüte, a kedipuo chü ro vituo shi?’ iba.

¹⁸Sitse puo sie, ‘A hau chütie, a a lhakiko rhuowa di süki zhakuokecü kro puo chülietuo, sidi süko nu a lhako mu mhanya kekreiko pete kengupie balietuo.

¹⁹sidi a a ruopfü üse, a ruopfü, no teicie kekra se morokesuo la mha kevi pete bate, mhachümhalie hie, cüükrielie, sidi n thuo n nei batalie’ isi ba.

²⁰Derei Ukepenuopfü sie puo ki, ‘No mhalekemo-u, tsiezhü n geinu n ruopfü zelietatuo. Sita ro no kengupie kebako pete supuo vie chütuo shi?’ sishü.

²¹Süla kehoupuorei Ukepenuopfü kitsa mha kenyi le mo di u thuo u kinyi kenguyakezhamia sümhie zotuo” sita.

²²Süla puo sie pethakelieko ki, “A nieko ki pushütuo, nie kelhou la, cüükrieketuo, morei nie mo-u la, pfhemenei seketuo dze lepie nie noukemezhie hiecie.

²³Kekreilamonyü nie kelhouu kecüca ki rei meyiekuo, tsiu nie mo-u nie pfhenei ki rei meyiekuo.

²⁴Shüzhako rüli leshücie, uko tsia se tsu cieya mo, morei re reiya mo, süko mha kengupie baketuo bou morei telhaki rei jü; siürei Ukepenuopfü süko va thuo rei chüya! Nieko we perako kirei vi phikuo zo!

²⁵Siro nie supuonie puo nou kenyü chükeshü geinu puo kelhouzha thu puo chie chü pechalie vi ta?[28]

²⁶Nieko mha kecü sikecü yopuo rei chülie kenjü ro, mha kekreiko dze la thenoukenyü chü ba ki ta?

²⁷Nha nu terhuobiepouko kimhie di memielieya shicü leshücie: süko mhachümhalie morei terhiterhie chüya mo. Sishierei a nieko ki pushütuo, Solomon zapuzayie kechü pete nu zorei süko mhie kerütso mo.

²⁸Derei Ukepenuopfüe lie nu keba nhako thie lhou ba rei mia sodu chü kelhoupie miphu nu thewaketuoko rütso rei chüshü üro, nie kepele ketsako, süko kirei puo nieko rütso chükuoshü motuo me?

²⁹Süla nieko we kedipuo cü mu krietie shikecü pfhü ba zo hie mu nie nou meyhumezhie ba zo hie.

³⁰Kekreilamonyü kijü hau nu kelhouko we mha süko pete pfhü baya zo, derei nie Puou nieko mha hako pete se morokesuo si ba.

³¹Sikecüumonyü, nieko puo[29] kedi pfhüliecie, siro mha hako pete pie nie tsüshütuo.

³²“Michiepie hiecie, nie themia ketsa kro-u, kekreilamonyü nie Puou puo kedi khapie nie tsütuoükecü puo nei puo medote.

³³Nie vieko zelie di khapie mia ngumezhiewaliecie. Nie thuo nie la suotalie kelho kinyi keseliecie, sidi katalie kelho nie kinyi teigeinu kenguliecie, sünu kerügumia rei vo tsolieya mo, morei shülhe rei cü pejüwalie lho.

³⁴Kekreilamonyü nie kinyi kebara nie nou rei süra ba zotuocü la.

³⁵“Nie chie phapfü dojü ba zolie, mu nie mitu petuse ba zolie,

³⁶mia kituomia u niepumia nuyie he nunu la vorketuo pfhe bayakezha tuoi ba zolie, puo vor di kikha ketoushü ro, süko kikha khrü mhashü puo tsüya.

³⁷Siro niepuu kevor ki puo kituoko puo pfhe ba di ngukelieko thejakepfütho; a nieko ki pu toushütuo, puo puo chie phapfülie di süko bu mhacüketuo la ke balietuo, sidi puo vor mha ka kezapie uko tsütuo.

³⁸Siro khisoteiluo morei teisotie nu shierei sükemhie ba di ngukelie kituoko thejakepfütho.

³⁹“Derei hau siliecie: ki niepuu kerügumia vorketuo tei si keba sie mia bu puo ki rhie lelie lho.

⁴⁰Süla nieko rei dojü baliecie, nie le mo keba nu Themia Nuou vor zotuokecü la” sishü.

⁴¹Sitse Pitor sie, “Niepuu, no dievi kepu hau hieko la mo pete la rei ga?”

⁴²Sitse Niepuu sie, “Supuonie kituo kedietho mu mhakesemenuokezhau chü di puo niepumia bu puo chüpie puo kinu kezha chü di puotei tou ki mha khapie uko tsünu tuo ga?

⁴³Puo niepuu kevor ki sükemhie chü ba di ngukelie kituou thejakepfütho.

⁴⁴A nieko ki pu toushütuo, puoe puo chüpie puo vienya peteko kemeho-u chüwatuo.

⁴⁵Derei kituo süu puo nou nu “A niepuu vor menuotuo,” idi kituo thenu rei thepfu rei vü, tsiu mhacümhakrie mu meze bata ro,

⁴⁶kituo süu niepuu, puo le mokeba puo nhie mu si ba kemo tei puo nu vor niepuu bu puo dathe phaphawa di puo khapie pelekemoko chü nu shüwatuo.

⁴⁷Kituo süu puo niepuu medo-u si, derei puo dojülie mo morei süu chü rei mo kebau, vü kratuo.

⁴⁸Derei si mo di mia bu puo vüketuo thoko chükecümia zowe vü petsatuo. Sizomonyü khapie puo tsü krakeshümia kinu ngu kralie morosuo, mu mhapie u pele krashü ro, sümia kinu mia rei cha kratuo.

⁴⁹“A mi khapie kijü gei shüketuo la vor; mu süu tsie tu parketa we a neituo.

⁵⁰A dzülukepfü puo pie a petselie morosuo ba, mu süu tseilie kemochie kiderei a nou kemezhietie shi!

⁵¹Nieko aü kezekevi se kijü gei shütuoü di vor ükecü leya me? A nieko ki puya, si mo, derei mia pfükhoketuo zo.

⁵²Tsie yawinu mia pengou keba kikruu kepfüphrotatuo, sidi mia se bu mia kenie ngumvü mu mia kenie bu mia se ngumvü isietuo.

⁵³Uko kepfüphrotatuo: Puo puoe puo nuo ngumvü, mu puonuo rei puo puo ngumvü, puo zuoe puo nuopfü ngumvü, mu puo nuopfü rei puo zuo ngumvü, puo niapfüe puo zuopfü ngumvü mu puo miepfü rei puo niapfü ngumvütatuo” ishü.

⁵⁴Süsie puo themia kro-u ki rei pu di, “Nieko niakratsa nu kimhou sierkezhü ngu ro, ‘Teirü vortuo’ idi puya; mu süu chütaya.

⁵⁵Tsiu pekhrotsa nu teirükhrie vorta ro, nieko sie, ‘Teile vortatuo’ idi puya, mu süu chütaya.

⁵⁶Harie, nieko ketherakezhako! Nieko tei mu kijü zie kevikesuo silieya; siüro kiüdi nieko tsiedo ki rüliko ha puoca silieya mo ga?

⁵⁷“Nieko kiüdi viükecüu pepilieya mo ga?

⁵⁸Sümhie, no miapuonie n pejo di n ze dienya kecüyakezhau ki votuoüta ro, chala nu tuoluokecü nu puo ze kemezhü chüwalie, simo liro puo n ze dienyakeseu mhodzünu votuo, siro dienyakeseu n khapie kedieki nu kezhau dzie nu shütuo mu süu n khapie kedie chüwatuo.

⁵⁹A nieko ki pu toushütuo, no priesa yopuo rei su tseiwa kemochie sünu nu parkelie jütatuo” sita.