Read Angami Naga Luk 13 Bible Online

Luk 13 - Angami Naga bible

Luk 13

¹Siro sütei touki mia kro puo vor di puo ki Pilat-e Galilmia kro puo zie pie uko ruotho sa kereikewako dze pushü.

²Sitse puo uko ki, “Nieko Galilmia hako sükemhie di kemezhiekelie-e Galilmia kekreiko pete ki rei phoumakuo ükecü leya me?

³A nieko ki pushütuo, si mo, derei nieko nie nou kedilie kemosie nieko rei süko mhiei ka phretatuo.

⁴Siro Siloam tsiepfheu me tsur mia kerethetha vakhriwaketa süko üse Jerusalem nu keba themia kekrei peteko kirei phoumakuoücü nie leya me?

⁵A nieko ki pushütuo, süu si mo; derei nie thenoukedilie kemosie süko mhiei ka phreta zotuo” sishü.

⁶Süsie puo dievi hau pushü: “Mia puo khube lieu nu chiedebo puo leipie ba, mu puo süu geinu puo si pfhü vor ru, puo si puorei ngulie mota.

⁷Süla puo sie tezie kepfheu ki, ‘Harie mehoshücie! A cie se rüso chiedebo hau si pfhü vorte, derei puosi puorei ngulie mo. Chiedebo-u wiwacie! Kiüdi süu bu kijü peka ba zotuo ga?’ sita.

⁸Puo sie, ‘Kepethau, puo bu ciethie ba sa phicie, sidi a bu puo phi nu kepushü di nyorhu pie vashücie.

⁹Süsie puo si vülie ro vi zo, mota ro süze süu wi reiwacie.’ ”

¹⁰Sabat puo nhie puo sinagogki puo nunu mia petha

¹¹Siro sükisü cie kerethetha kechükenyü ruopfü bu puo ze tuoketapfü puo vor. Hapfüe puo chie kehoupfü di tosielie lho tuoya.

¹²Siro Jisu puo ngu tse, puo kielie di sie puo ki, “Thenupfü, n kechü nunu n phreishüwate ho” sishü.

¹³Sidi puo puo dzie chapie thenu süpfü gei shü tse, va puonu puo peto lalieta di Ukepenuopfü tsheta.

¹⁴Derei Jisu sabat nhie mia chü keshürhokeshü la sinagog nu kezhau puo nei mo di sie themia kro-u ki, “U bu mhachülie nukeshü zha sorou ba; süla zha süko nu vor di nie chü keshürholie, derei sabat nhie we süu chü hie!” sita.

¹⁵Derei Niepuu puo die kela di sie, “Nieko ketherakezhako! Nie kehoupuorei sabat nhie nie thu morei nie gada phrei ze tsu dzü krieya mo me?

¹⁶Siliro satan bu cie kerethetha puo phapfü tuoketa Abraham yie hapfü rei sabat nhie phreishüwa zhü mo me?” sita.

¹⁷Siro puo hau pushü tse, puo kepetsouko pete menga phreta; tsiu themia kro-u zo we puo u ngo zokecü chükeshü pete la u nei phi phreta.

¹⁸Süla puo sie, “Ukepenuopfü kedi kedipuo ze kemhie ga? Mu a bu kedipuo pie süu ze kemejüshütuo ga?

¹⁹Süu gakrie tsia yopuo mia puoe se tsu tezie nu prukeshü mhie zo; sitse süu lhou zha sier seibo puo chülie mu perako vo di puo coko geinu u kru chülieya” sishü.

²⁰Sidi puo la sie, “A bu Ukepenuopfü kedi pie kedipuo ze kemejütuo ga?

²¹süu thenumiapfü puoe khrei se vashü di süu bu pou parkelie mhie zo” sishü.

²²Süsie puo rüna kecü rei kezha rei pfüthe se mia petha di Jerusalem va vozhü.

²³Sitse mia puo puo ki, “Niepuu, mia keduoyo kelakelie zotuo me?” si.

²⁴Sitse puo uko ki, “Nieko kharu kemereu ze lelieketuo nie rhie chüliecie; a nieko ki pu toushütuo, themia kekra süu nu leketuo pfhü hutuo, derei lelie lho.

²⁵Süki ki niepuu sie kikha khalieta ro, nieko kitie tha di kikha ketou di, ‘Niepuu, kikha khrüpie hie tsücie,’ itse puo sie nie ki, ‘A nieko kirapuonu vor shi si mo ho’ idi kelatatuo.

²⁶Süsie nie sie, ‘Hieko n ze mhacümhakrie vor zo, mu no hie chaüko nu rei petha’ isituo.

²⁷Derei puo sie, ‘A nieko kirapuonu vor shi si mo. Nieko kesuo chüyakezhako tuo a thertacie’ sitatuo.

²⁸Sitse nieko Abraham mu Isak tsiu Jakob mu siedzekesiko pete Ukepenuopfü kedi nu ba di ngukelie ki mia nieko whuopie kitieshüwaketa la sünu nu kra mu nie hu thegeipie batatuo!

²⁹Sitse mia niathutsa mu niakratsa nu, pesotsa mu pekhrotsa nu vor di Kepenuopfü kedi heu nu batatuo.

³⁰Ketho zo, kenuoko huomia rietatuo mu kerieko huomia nuotatuo.”

³¹Sütei touki Farisiko huo puo ki vor di sie, “No haki nu tuotaliecie, Herod n dukhriwa nyü batacü la” sita.

³²Sitse puo uko ki, “Nieko vo a la meseruu ki pushücie, ‘Rünyüliecie, a thie mu sodu terhuokesuoko whuo mu kechümia chü keshürho batuo, sidi zha se nhie we a mhatho tseitatuo.

³³Siüderei a thie mu sodu tsiu nuonhieko tuoshüzhü zo morosuo, kekreilamonyü Jerusalem nu zokemosie kekreiranu siedzekesimia dukhrilie lho zo.’

³⁴Harie, Jerusalem, Jerusalem, siedzekesiko dukhri mu ketsiepie n ki ketsekeshüko vayakezhapfü! Vükrüe puo nuonuo kekopie puo shükhro shülieyakezha tuoi a va kitsuokidepuo n nuonuoko kie kengulie nyü sie ga? derei no mvüte!

³⁵Süla harie, nieko kiu khapie nieko dzie nu shüwatuo. Siro a nieko ki pushütuo, tsie yawinu nieko, ‘Niepuu za se vorkezhüu thejakepfütho’ idi pu kemochie mhakipuorei nieko a ngulie lhote” isishü.