Read Angami Naga Luk 14 Bible Online

Luk 14 - Angami Naga bible

Luk 14

¹Süsie sabat puo nhie Jisu Farisiko krütamia puo ki hietuoü vo balie, süki themiako puo meho terüpfü ba.

²Ru dzü nuonikepfümia puo puo mhodzünu ba di ngulie.

³Sitse Jisu thezhokesiko mu Farisiko ki, “Sabat nhie mia chü keshürhokecü thezho mo mo ga?” idi ketso

⁴Sirei uko kemekrie zei bata. Sitse Jisu süu mengu ze phir di puo chü keshürhoshü, sidi puo ketsewa.

⁵Süsie puo uko ki, “Nieko miapuonie puo nuo morei thudo puo te kheho nu leta liro sabat nhie zorei kenourhei le süu teshü la par motuo me?” idi ketsota.

⁶Derei uko die hau kela lalie lhota.

⁷Süki mia hienu di kieze vor kebako theba keviko pfhüketuo ngu di puo dievi puo pie uko ki pushü.

⁸“Mia puo n bu nuyie he puo nu hienu n kiekecü ki, no vo theba kevithoko nu bata hiecie, Puo n ki rei therhu pfükuokecümia huo kiepie ba rei silie kelho la;

⁹Siro nnie kiekeshüu vor n ki, ‘N chüu periepie hau tsücie,’ sita ro, no menga phi di ke theba thelatho nu batatuo.

¹⁰Süla mia n kiekeshü ki, no vo theba thelatho nu balie, sitse n kiekeshüu vor n ki, ‘A zeu, no kho theba kerükrie gei baliecie’ silie vi. Siliro no theheu nu hiekeba peteko mhodzünu therhu pfülietuo.

¹¹Kekreilamonyü kehoupuorei puo thuo puo chü kerükrie kenyüu chü kerünuowatuo, tsiu kehoupuorei puo thuo puo chü kerünuolieyakezhau chü kerükrieshütuo.”

¹²Sidi puo sie puo kiekeshüu üse, “No khinhie morei theva mia ze hietuoü liro n khriethomia morei n siezedzürieko morei n se n yiemia morei n zanuomia mha kenyimiako kie zo hiecie, uko n kie ze vo n ze hie lawalie vikecü la.

¹³Derei no mia ze hietuo üro mhakejüko, lalhiko, phiyhoko mu mhicieko kieliecie.

¹⁴Siliro no thejapfülietuo, süko n pu su lalie kenjücü la, tsiu kemiathomia rheilakesie ki Ukepenuopfü thuo n pu chü lashütuo.”

¹⁵Süki hie kebako mia puo puo die süko si di puo ki, “Ukepenuopfü kedi nu hieketuomia sü thejakepfütho” sita.

¹⁶Sitse Jisu puo ki “Mia puo thehe kezha puo keselie di mia kekra kieshü.

¹⁷Siro puo hieketuo teiki puo kituou bu vo kiepiekebako ki, ‘Vorliecie, mha pete kesepie bate’ idi puketuo la ketseshü.

¹⁸Derei uko pete rei kemhie mhapuo kerüpu phreta. Kerieu sie puo ki, ‘A lietsa puo khrülie, ru a tsu süu meho morosuolie; süla a ngumezhie di a kejo vashücie’ ita.

¹⁹Kekreimia puo sie puo ki, ‘A mithu vocie kepfü dziese pengou khrüpie ba, mu süko se tsu uko bu pfü dojü nyü balie; süla a ngumezhie di a kejovashücie’ sita.

²⁰Kekreimia puorei sie, ‘A tsiedoki nu thenulie di ba, mu süla a vorlie suote’ ita.

²¹Süla kituo süu la vor di mha hako pete pie puo niepuu ki pushü. Sitse niepuu puo nou meyie di sie puo kituou ki, ‘No tuo rükri rünau chapfü chaüko mu chatseko nu volie, sidi mhakejümia, lalhimia, mhicieko mu phiyhoko ze hanu vorliecie’ sita.

²²Süsie kituou sie, ‘Kepethau, no chülienu pukeshüko chüliete, sirei tsierei theba ba saluo’ ishü.

²³Süla niepuu sie kituo süu ki, ‘No tuo pra di chaüko mu chatseko nu mia kie bei ze vor a ki ketshuliecie.

²⁴A nieko ki pushütuo, pedzüperie kiepie kebako mia puo bu rei a thehe kesepie kebau methalie lho.’ ”

²⁵Süsie themia krodi puo ze vokezhü ki puo reipra uko ki,

²⁶“Kehoupuorei a ki vorketuomia puo puo mu puo zuo, puo kimia mu puo nuonuo, puo siezedzürie mu puo üpfünuoko mu puo thuo puo kelhou meliewa kemosie a siedzimia chülie kenjü.

²⁷Kehoupuorei puo thuo puo krus pie di a sie medzilie mo ro a siedzimia chülie kenjü.

²⁸Ki-a, nieko miapuonie kuda puo pfhe nyü kesie ki, ba chüsechülie di süu chüketuo la, mu puo süu chü tseilieketuo la priesa ba mo mo shicü rhü mu leyakemo supuo ba ga?

²⁹Simo liro, puo puo mvüdzeu dzepie zhükelie sie kudau chü tseilie lhotatuo; mu mia süu kengu khe puo kre,

³⁰di sie, ‘Themia haunuomia hau chü sede sie di chü tsolie lhote.’

³¹Morei kedimia puo puo themia nyie ker ze kedi kekrei puo themia nyie mepfü ze di puo ze kegeituoü vorkezhüu ze kegeilie vituo mo lho shicü rhü mu le perieyakemo supuo ba ga?

³²Mhanuü puo süu chülie kenjü üro, kedi kekreiu kepecie nu ketuo nu puo dieliemia ketsepie süu ki shü di vitho chüwaketuo die ketsoya.

³³Süsütuoi, nieko kehoupuorei puo vienyako khawa kemosie a siedzimia chülie kenjü.

³⁴“Metsie-e vi zo, derei metsie zorei puo kelhe jüta ro, kedipuo pie chü pelhe lalie ta?[30]

³⁵Süu kijü la morei nyorhu la rei puo kevi jütaya; sidi kelhoukewa zotaya. Kehoupuorei puo nyie nyi di rünyü nyüyakezhau bu rünyüliecie!” sishü.