Read Angami Naga Luk 15 Bible Online

Luk 15 - Angami Naga bible

Luk 15

¹Süki khezhanuo khruoyakezhako mu kephoumako kekra puo die rünyütuoü di vor.

²Sitse Farisiko mu thezhokesiko panya di sie, “Themia hau kephoumamia rei zelie di uko ze mhacüya” ita.

³Süla puo uko ki dievi hau pu di:

⁴“Nieko miapuonie tekuo krie puo ba di süko puo pejüwa ro, puo hiethepfüethepfüko khapie rayha nu bawa di vo jüketayo ngulie kemochie pfhüyakemo supuo ba ga?

⁵Sidi puo süyo ngulieta tse pie puo boukanie gei shülie di puo nei phitaya.

⁶Sidi kinu vor tse, puo zeko mu zanuoko kie kengulie di uko ki, ‘Nieko rei a ze nie neiliecie, a a kuo jüketayo ngulieketa la’ isiya.

⁷A nieko ki pu toushütuo, süsütuoi thenoukedikecü se morei vikecü kemiathomia hiethepfüethepfüko ki rei kephoumamia puo thenou kedikelie la teigei u neituo.

⁸“Morei miapfü puo rakachü kapie ker ba di süko donu puo pejüwa liro, puo puo mi petulie di süyo ngulie kemochie puo kitsho di pfhüya kemo supuo ba ga?

⁹Siro puo süyo ngulie tse, puo khriethokhriechümia mu puo zanuomia kie kengulie di sie, ‘Nieko rei a ze nie neiliecie, a a rakachü kapie pejükewayo ngukelie la.’

¹⁰Süsütuoi a nieko ki pu toushütuo, kephoumamia puo thenoukedikelie la Ukepenuopfü dielieko rei u nei baya,” sishü.

¹¹Jisu la sie, “Mia puo puo nuo kenie nyi.

¹²Ru nhicuyoe sie puo puo ki, ‘A puo, mha a yako pie a tsüwacie’ sita. Süla puo puoe puo vieko kezapie unie tsüwa.

¹³Zha huoyo sie nhicuyoe puo yako pete selie di rüna kepecie puo nu vota, sidi puo sünu nu rügerüzhü di puo vieko pete ketsiwa.

¹⁴Siro puo puo vie pete zecü thelie tse, rüna sünu pekrie kriedi sierta mu puo mhapuorei jü bata.

¹⁵Süla puo vo rüna sünu khenumia puo kivo chüta, sitse themia süu puo ketsepie puo bu lie nu thevo pfhe.

¹⁶Süki puo thevo ca chüyakezha rücüpreiko rei pie puo valuo chükelie mengu zo bata; derei miapuorei mhapuorei se puo tsü mo.

¹⁷Derei puo puo melou mecielie tse puo thuo puo rüchü di sie, ‘A puonuomia mia zhakhrü ze puo kituo chüyakezhako thuo zorei kecüca u kelhuo kezie ba, derei a we haki nu thekhepfü siatatuoü bate!

¹⁸A sielie di tuo la a puo ki vo di puo ki, “A puo, a teigeiu mhodzünu rei mu n mhodzü rei phoumawate;

¹⁹a n bu aü n nuo ücü rei kielie sü mote, a bu n kituo zhakhramia puorei chüliecü mu” si bata.’

²⁰Süla puo sielie di tuo puo puo ki vota. Derei puo ratsa tuoluocü nu puo puo puo ngushü di puo nou mezhieta, sidi ta vo puo ciepielie di puo mebota.

²¹Sitse puo nuou sie puo ki, ‘Apuo, a teigeiu mu n mhodzü rei phoumawate, n bu aü n nuo ücü rei kielie sü mote.’[31] sita.

²²Derei puo puoe puo kituoko kielie di sie, “Nieko mhai vo pfhe kevitho-u se vor puo bu dzielie; siro dziekha puopie puo dziekinuo gei shüshülie mu phikou rei puo bu nyülie.

²³Siro vo u thunuo puo phou kevithoyo puo dukhrilie, sidi úko keze cüükrie u nei khe;

²⁴Kekreilamonyü a nuo hau siata ru, rheilaliete; mu jüta ru ngu laliete” sishü. Sidi uko keze u nei bata.

²⁵“Süki puo dzürieu tsu lie nu tuo di tuo ki penuo vorkezhü ki puo mia ütsali chü mu nashü keba silie.

²⁶Süla puo kituoko mia puo kielie di kedipuo chü ba shicü ketso.

²⁷Sitse puo sie, ‘N siezeu la vorte, mu n puo mithunuo puo phou kevithoyo dukhripie thehe chü balie, n siezeu vishürhotuo di la vorlieketa la’ sishü.

²⁸Sitse puo puo nou meyie di kinu le mvüta. Süla puo puo par di puo se beita.

²⁹Derei puo sie puo puo ki, ‘Harie rünyüliecie! A teicie hatsuohachie n lie chü vor, mu mhakipuorei n kepuko vacieya mo; sishierei no khunhie puorei temvü yopuo rei pie a tsü di a bu a zeko rei ze a neikecü chü mo.

³⁰Derei n nuo hau thethenuko ze tuo di n vieko peka cülie, di la vor ru u thunuo puo phou kevithoyo dukhri bate le!’ sita.

³¹Sitse puo puo sie puo ki, ‘A nuo, no sü a ze sei baya zo, mu a vieko pete sü n vie ze.

³²Derei n siezeu siata ru rheilaliete; puo jüta ru ngu laliete, süla we u nei mu u noumvü keba mese ze’ ” sishü.