Read Angami Naga Luk 16 Bible Online

Luk 16 - Angami Naga bible

Luk 16

¹Sitse Jisu pethakelieko ki, “Kenyimia puo mia bu puo vie pete mehoyakezha puo nyi, ru mia vo puo ki themia hau puo kinyiko se kehoukeruo chüyaükecü puta.

²Süla puo puo kielie di puo ki, ‘A n dze kesi hau kiüta ga? No mha mehoyakezha thoko chü kemesa tseipie a tsücie, n bu a kinyiko keseu chü salie kenjüketa la’ sita.

³Sitse kinyi kemeho-u puo thuo puo nou nu, ‘A mhatho nunu a niepuu a khawatuoü bate, mu a kedipuo chü ro vi ta? A kijü dutuoü mu metei mo, tsiu khruocütuoü mu mengae.

⁴A kinyi mehoyakezha tho-u nunu a khawaketa sie mia bu a ze u kinu tuolie kevi thedo puo a leliete.’

⁵Süla puo sie puo niepuu pu pfükezhüko mia puopuo kie ze vor di therieu ki, ‘No mha kidepuo a niepuu pu pfüzhü ga?’ idi ketso.

⁶Sitse puo sie, ‘Oliv tier bou krie puo’ ishü. Sitse puo sie puo ki, ‘N thepu leshüu pielie, ke balie di hiepengou thushülie!’ sita.

⁷Sitse puo sie mia kekreiu ki, ‘Ki-a no thepu kidepuo pfüzhü ga?’ idi ketsoshü. Ru puo sie, ‘Thoulha kemejü bou krie puo’ isi. Sitse puo sie puo ki, ‘Thepu leshüu pielie di hiethetha thulie!’ sita.

⁸Siro puo niepuue puo kituo mezhükemo-u üse puo do vi phi di mhachü üta; kekreilamonyü tsiedo nuonuoko u thuo u tshümia teiki leshütuoü ro kezieu nuonuoko ki u do vikuotuo.

⁹Siro a nieko ki pushütuo, kethokemo kinyiko[32] se nie khrietho pfhüliecie, siliro kinyi süko jüketako ki mia kechachie baketuo kiko nu nieko zelietuo.

¹⁰“Kehoupuorei mha ketsa keduonuoyo puo nu rei mia bu puo pelelie kevi chü liro, mha kekra nu rei mia bu puo pelelie vi; mu kehoupuorei mha ketsa keduoyo nu rei mia bu puo pelelie suota ro, mha kekra nu rei mia puo pelelie lho.

¹¹Süla nieko kethokemo kinyi nu dietholieya mo üliro kedipuo mhie di ketho kinyiu pie nie pelelie vituo ga?

¹²Siro nieko mia vie gei thuo rei dietho shülieya mo liro, supuonie mha khapie nie dzie nu shü di nie bu se nie vie chütuo ga?

¹³Kituomia puorei niepumia kenie kituo chü keduolie kenjü; siliro puo mia puo ngumecü mu kekreiu khrietatuo, morei puo mia puo gei dietho mu kekreiu thitatuo. Nieko Ukepenuopfü mu kishükinyi[33] lie chü keduolie kenjü.”

¹⁴Sitse Farisiko shükeiraka kemehouko die süko si di uko kre nyüta.

¹⁵Süla puo uko ki, “Nieko mia mhingu ki we nie thuo nie üse mezhü ütuoya, derei Ukepenuopfü nie nou si ba; themia mhodzüki mha kezha ükezha puoe Ukepenuopfü mhodzünu kerütse zocü la.

¹⁶“Johan kevor mhodzü thezho-u mu siedzekesiko zhonu tuo; süsie Ukepenuopfü kedi dieliekeviu pupie mia petha vor, sidi themiako kehoupuorei mia kemvü chü sünu ler nyü sie.

¹⁷Derei thezho-u nu thupiekezhü kethushü kevi yopuo chü pejüwaketuou ki rei tei mu kijü bu rüdiketa we rüükuotuo.

¹⁸“Themia kehoupuorei puo kimia khawa di thenu kekrei puo ze keri lata ro pieü chüta zo; tsiu miapuonie mia puo khakewapfü ze keri lakecüu rei pieü chüta zo.

¹⁹“Thiedzü kenyimia puo pfhe meriemegekecü mu linen kevipfü dzie di teisonhie hie puo theguo chü baya.

²⁰Mu Lazar ükecü kejümia puo kechüpfü thuo tshupfü di puo care ki baya,

²¹puo kenyiu mizhü geinu kecüca rürie ketsuko cü nyü sieipfü baya; sidi tefüko zorei vor puo gei kechüpfüko meyo baya.

²²Sitse mhakejüu siata mu teigeidielieko puo pie vo Abraham merü gei bawa. Siro kenyiu rei siata di khruwa.

²³Sidi puo vo Hades nunu kemezhie phi bata, sidi puo tosie ru, vo ratsa Abraham khieki Lazar ba di ngulie.

²⁴Sitse melie puo rhiechü di sie, ‘A puo, Abraham, a ngumezhiecie, no Lazar ketsepie puo bu puo dziekinuo se vor dzü selie di pie a meü se pekoushücie, kekreilamonyü a miü hau nunu meyhumezhie baketa la,’ sita.

²⁵Derei Abraham sie, ‘A nuo n thuo rei rükrashücie, no n kerhei ki mha kevi khe nguwate, sirei Lazar we mha kesuo kheko ngu, derei tsiewe puo ketheguo, mu no we kemezhie bate.

²⁶Sizomonyü hieko mu nieko donu kheho kesou se puo bate, süla hatsanu miapuorei tuo nie kitsa pfükelie jü mu miapuorei cütsa nu hieko kitsa vorlie kenjü’ sishü.

²⁷Sitse puo sie, ‘Siro apuo, no a ngumezhie zo di puo ketsepie a puou kinu shücie,

²⁸sünu a siezedzüriemia pengou baluo mu uko bu kemezhiekecü chü hau nu vor molieketuo la puo bu uko ki pushü beicie.’

²⁹Derei Abraham la sie, ‘Uko Mosa mu siedzekesiko ba, uko bu süko die rünyüliecie.’

³⁰Sitse puo sie, ‘Apuo Abraham, si suolie, mia puo kesia nunu rhei lalie di uko ki vo ro, uko rei uko nou kedilietuolie.’

³¹Derei puo sie puo ki, ‘Uko Mosa mu siedzekesiko die thuo rei rünyü mo ro, mia puo kesia nunu rhei lalie di ze vo zorei uko pelelie lholie’ ” sita.