Read Angami Naga Luk 17 Bible Online

Luk 17 - Angami Naga bible

Luk 17

¹Süsie Jisu puoe pethakelieko ki, “Mia phi kemesü tei vor zotuo, derei ce, puo geinu süko se voryakezhau we chülietie.

²Themia süu bu kecü hako miapuorei chüpie kephouma nu shükewau ki rei mha kegetsie puo pie puo vo nu khelie di puo kelhoupie dzükezha nu shükewa we puo dze vikuotuo.

³Süla nie kireiliecie! Mhanuü pethakeliemia[34] puoe kephouma puo chü ro puo kerhieshülie, derei puo nou kedilieta ro vapie tsüwalie.

⁴Siro themia süu khunhie zorei n gei va thenie kejo chü di va thenie la vor n ki puo kejo cha di ‘A kekrüte’ isi ro, no puo kejo vashü morosuo” sita.

⁵Sitse apostelko Niepuu ki, “Hie kepele chü penyi sashücie” sita.

⁶Sitse Niepuu sie, “Nie kepele gakrieshü de yopuorei ba liro, nieko sie khrabvübo hau ki, ‘N thuo rülou dzükezha nu le sepfü batacie,’ ishü zorei nieko die zetatuo.

⁷“Nieko mia puo, nie kituomia lie nu mhachü tuo morei tekuo pfhe tuo di vor mumetha sie ‘Rükri vo mhacülie’ idi puya me?

⁸Sikecüumonyü nie puo ki, ‘No vo di a mhaca keseshücie, sidi pfhepie n chie phapfülie di a cüükrielie kemochie pfhe thalie, süsie nu no cüükrielie’ siya mo me?

⁹Siro kituo süu puo kepuko chükeshü la puo thezieshütuo me?

¹⁰Nieko rei sümhie ze, mia nieko bu chünukeshüko chü phrelieta tse, ‘Hie kituo rei kituo kevimia mo, hie bu chünukeshükoyo rübei chükeshü zo,’ siliecie.”

¹¹Siro Jisu Jerusalem nu vokezhü ki puo Samaria mu Galil nie tierie nu vozhü.

¹²Sidi puo rüna nu le tse mpakechümia mia ker puo ki vorzhü. Mu uko kepetse nu tha,

¹³Sitse uko shiekhoui di sie, “Jisu, kepethau, hieko ngu mezhieshücie!” sita.

¹⁴Sitse puo uko ngushü di sie uko ki, “Nieko tuo vo di zievoko bu nieko mehowacie” sishü. Sidi uko tuo vozhü ru uko kechü menelieta.

¹⁵Sükisü uko mia puo puo kechü menelieketa ngulie di melie puo rhiechü Kepenuopfü tshe di la vorta.

¹⁶Siro puo tsu Jisu phiki zerepfü zhülie di puo thezieta. Mu puo samariamia puo.

¹⁷Sitse Jisu sie, “Mia ker chü kemeneshü mo me? Siro mia thepfüko kira vota ga?

¹⁸Kiüdi chazoumia hau rübei sie kekreimia puorei la vor Ukepenuopfü tshe mota ga?” sita.

¹⁹Sidi puo süu ki, “Sielie di tuo votalie; n kepele thuo n chü kemenewate ho” sita.

²⁰Va puo Farisiko sie Jisu ki kedikechükipuo Ukepenuopfü kedi vortuo shicü ketsoketa la, puo sie “Kepenuopfü kedi we mia bu ngulie kevi chü vorlie lho.

²¹Morei miapuorei sie, ‘Harie, haki ba!’ morei ‘Luki ba!’ idi pulie lho. Kekreilamonyü Ukepenuopfü kedi nie nou ba zokecü la” sita.

²²Süsie puoe pethakelieko ki, “Nieko Themia Nuou kevor teisozha puo zo rei ngushü nyükecü tei vortuo, derei nie süu ngulie lho.

²³Süki huomia sie nieko ki, ‘Lere, Luki!’ morei ‘Harie, haki!’ isi di putuo. Sirei nie vo hie, medzi rei hie.

²⁴Tei melakeshü ki tietsa puo nu kekreitsatie zie mha votayakezha tuoi, Themia Nuou kevor rei sümhie zotuo.

²⁵Derei puo kemezhiekecü ngu phi di thephou hau bu puo melie rietuo.

²⁶Siro Noah teiki tuoi, Themia Nuou teisozha ki rei sümhie zotuo.

²⁷Süki Noah rouu nu leketa zha nhie ketso mia mhacümhakrie, thenulie mu thenyhü chü iba zo, sidi dzü bu sier süko pete pelhei khriwa.

²⁸Siro Lot teiki tuoi zotuo: Ukoe mhacümhakrie, mhakhrümhaze, tsiu mha pelhou mu ki chü ba zo,

²⁹derei Lot Sodom nunu tuoketa nhie teigei nu mu mi mitsie perüpie süko pete pekawa.

³⁰Themia Nuou mia bu mhotsou puo nguketuo nhie rei sümhie zotuo.

³¹Sünhie kehoupuorei ki mho gei baketau bu puo kinu vienyako chülietuoü la ke hie; mu sümhie puo lie nu ketuomia bu rei rürei la vo hie.

³²Lot kimiapfü rükrashücie.

³³Kehoupuorei puo phouu pekrulieketuo leyakezhau süu pejüwatuo; tsiu kehoupuorei puo phou pejükeshüu süu pekrulietuo.

³⁴A nie ki puya, süzhü mia kenie keze thezhü puo gei zhütuo, mia puo chü setatuo, tsiu kekreiu khawatuo.

³⁵Siro thenumia kenie keze mhage batuo; mia pfü puo chü setatuo, mu kekreipfü khawatuo” sishü.

³⁶(Mia kenie keze lie nu mhachü tuotuo; mia puo chü setatuo mu kekreiu khawatuo.)

³⁷Sitse uko sie, “Niepuu, kirapuo ya?” ita. Sitse puo uko ki, “Kehourapuorei kesia mo kezhüra, chürhaüko rei vo sünu kengutuo” sita.