Read Angami Naga Luk 18 Bible Online

Luk 18 - Angami Naga bible

Luk 18

¹Siro Jisue dievi nunu uko bu kecha chü sei tuolienu mu u chamezieta hienukecü pu.

²Sidi puo sie, “Nadi puo nu capimia Ukepenuopfü mu themia rei preiyakemo puo ba.

³Mu nadi süu nu samipfü puo rei baya ru tsiekenuo puo ki vor di, ‘No a kepetsoumia gei a khepushü di a bu a mezhüu nguliecie’ idi pu seiya.

⁴Sirei capi süu puotei huo süu chü mvü vorta, derei kenuotsa puo thuo puo rüchü di sie, ‘A Ukepenuopfü preiya mo mu themia rei rhuya mo ürei,

⁵Sami hapfü a keyhukezhie sei vorketa la a puo bu puo mezhüu ngulieketuo chüshüwatuo, moro puo vor a kecha khriwatie.’ ”[35] sita.

⁶Sitse Niepuu sie, “Nieko mezhükemo capiu die rünyüshücie.

⁷Siro Ukepenuopfü puo thuo puo nou cha zoüderei teisonhie teizei metsei puo ki cha sei baya zocü puoe kedakelieko khepushü motatuo me?

⁸A nieko ki pushütuo, puo kenourhei sie uko khepu zotuo. Sirei Themia Nuou kevor ki kijüu gei kepele ba di puo bu ngulietuo me?” sita.

⁹Süsie rei puo mia kro puo u thuo u le kemiatho di kekreimiako üse mhaütuoya kemoko la dievi hau pushü:

¹⁰“Mia kenie-e kecha chütuo üdi rüsuokiu nu vo, mia puo Farisimia mu kekreiu Khezhanuo kekhruomia puo.

¹¹Siro Farisiu tha di kecha chü di sie, ‘Kepenuopfü, a themia kekreimia, mia vie sekecümia, miathokemomia morei pieü kechümia morei khezhanuo kekhruo hau rei mhiekemo la a n tsheya.

¹²A zhadoudo puo nu va kenie mevoya, tsiu a ngukelie pete geinu ker zau khashü n tsüya’ si tha.

¹³Derei khezhanuo kekhruou kepetse nu tha di tosie teigei rei meholie lho, tsiu puo merü kepfhü di sie, ‘Kepenuopfü, no kephoumau a ha rei ngumezhiecie’ si tha.

¹⁴A nieko ki pushütuo, themia hau mezhülie di tuo puo kinu vote. Kekreilamonyü themia kehoupuorei puo thuo puo chü pezhayakezhau chü kerünuowatuo, tsiu kehoupuorei puo thuo puo chü kerünuolieyakezhau chü pezhashütuo” sita.

¹⁵Süsie mia puo bu puo dzie yhapie u gei shüketuo la nuoranuoko rei ze vor, sitse pethakelieko süu ngu di süko khata.

¹⁶Derei Jisu süko kie di sie, “Nhicuko bu a ki vorlie, mu uko kha hiecie, Ukepenuopfü kedi-e hamhiecüko vie zocü la.

¹⁷A nieko ki pu toushütuo, kehoupuorei nhicumia yopuo mhie di Ukepenuopfü kedi lieliekemo sie, mhakipuorei sünu lelie kenjü zo” sita.

¹⁸Süsie kezhamia puo puo ketso di, “Kepetha keviu, a kechachie kerhei ngulieketuo la kedipuo chülie morosuo ga?” si.

¹⁹Sitse Jisu, puo ki, “No kiüdi a üse keviu üya ga? Ukepenuopfü zo kemosie miapuorei kevi jü.

²⁰‘No pieü chü lho, mia dukhri lho, rügu lho, ketijü zhapu chü lho; n puo n zuo rhulie’ idi diekhakeshüko si batuo” sishü.

²¹Sitse süu sie, “A a khriesa nunu hako pete chüüze sierte” si.

²²Siro Jisu hau sishü tse, puo ki, “No tsierei mha puo tso mo baluo. No mha keba pete zelie di rakako khapie mhakejüko tsüwalie, siro teigei n kinyi nyilietuo; sidi vor a siemedziliecie” sita.

²³Derei puo die hau silie tse, puo thesuo sieita, kekreilamonyü puo mhanyi phicü la.

²⁴Siro Jisu puo meho di sie, “Kenyimia puo bu Ukepenuopfü kedi nu leketuo we re zotuo!

²⁵Kenyimia puo bu Ukepenuopfü kedi nu kele ki rei ut puo bu thepremei nu kepra we rüükuotuo.”

²⁶Süki puo die süu kesiko sie, “Di siro, suomianie kelalie vi ta?” sita.

²⁷Sitse puo sie, “Themiae chülie kelhoko Ukepenuopfüe chülie vi” sita.

²⁸Sitse Pitor sie, “Harie, hieko we hieko ki rei khawa di n siemedzi tuote” si.

²⁹Sitse puo uko ki, “A nieko ki pu toushütuo, kehoupuorei Ukepenuopfü kedi la puo ki morei puo kimia morei puo siezedzürie morei puo krünuo morei puo nuonuo khawaketamia,

³⁰tsiedo kelhou nu rei sü kezie phi ngulietuo, mu thiesie kechachie kerhei ngulietuo” sita.

³¹Süsie puo kerekenieko ze krei puo ki vor di uko ki, “Harie, úko Jerusalem nu khotuoüzhie, mu siedzekesiko bu Themia Nuou dze thupieketuoko chü tseilietuo,

³²Kekreilamonyü mia bu puo tepie Judakemoko dzie nu shüwatuo, sidi mia bu puo pie kethekre, puo kenga, tsiu puo mho mhitsietuo.

³³Sidi uko puo vüwa di puo dukhriwatuo, derei zha se nhie puo rheilalietuo” sishü.

³⁴Derei uko mha hako ca puorei silie mota; puo pukeshüko uko kinu keviewatacü la, sidi uko puo kedipuo putuo shicü dze puorei situo mota.

³⁵Siro puo Jeriko penuo vozhü tse, mhiciemia puo chakhieki nu khruocü ba.

³⁶Siro puo themia krodi vorkezhü sishü tse, kedipuo chütuote shicü ketso.

³⁷Sitse uko puo ki, “Nazaret-u Jisu vorzhülie” sishü.

³⁸Sitse puo shiekhoui di sie “David Nuou, Jisu, a ngumezhieshücie” si bata.

³⁹Süki rieketuoko puo kerhie di puo bu kemekrie balie nuta; derei puo shiekechü sa di sie, “David Nuou, a ngumezhieshücie!” sita.

⁴⁰Süla Jisu thalie di mia bu mhicieu ze puo ki vornushü; sidi puo puo penuo vor tse, puo sie puo ki,

⁴¹“A bu n gei kedipuo chüshü nyüya ga?” isita. Sitse puo sie, “Niepuu, a bu mha ngu laliecie” sita.

⁴²Sitse Jisu puo ki, “Mha nguliecie; n kepele thuo n kelaliete ho” sishü.

⁴³Sishü mumetha themia süu mha ngu lalieta, sidi puo puo siemedzi tuota, tsiu Ukepenuopfü tshe tuota.