Read Angami Naga Luk 19 Bible Online

Luk 19 - Angami Naga bible

Luk 19

¹Süsie puo Jeriko nu lelie di süu pfüthe vozhü.

²Sünu Zakia ükecü puo ba; puo khezhanuo kekhruoko donu kezha puo mu mhanyi phi.

³Siro puoe Jisu supuo shicü meho nyü sie, derei themia krathorta mu puoda rünuo nhyicü la puo ngulie lhota.

⁴Süla puo ta rie vo di puo mehotuoü khrabvübo puo lisielie, kekreilamonyü puo süu chatsa vorkezhü la.

⁵Siro Jisu thechü süki vorlie tse tosie puo ki, “Zakia, tuo mha kerlie; kekreilamonyü a thie n kinu vo ba morosuoketa la” sishü.

⁶Süla Zakia mha kerta mu puo nei phi di puo pesolie.

⁷Siro süu ngukecüko pete rei panya di sie, “Puo vo di kephoumamia puo sochü bate” sita.

⁸Sitse Zakia siethalie di Niepuu ki, “Harie, Niepuu a a vie ketoupuo khapie mhakejümiako tsüwatuo, tsiu a huomia sekedalietaü mha liro, a süde dia kha lashüwatuo” sita.

⁹Sitse Jisu puo ki, “Thie kelakelie ki hanu vorte, kekreilamonyü puo rei Abraham nuo puo zocü la.

¹⁰Themia Nuou jüketamia pfhü mu sümia kelalietuoü vor zocü la” sishü.

¹¹Siro uko die süko rünyü tuo mu puoe dievi puo pu sashü, kekreilamonyü puoe Jerusalem penuo votazhü, tsiu ukoe Ukepenuopfü kedi mhai zo vorta thenyüsie di letuocü la.

¹²Süla puo sie, “Kezhamia puo vo kedi kechü kekuo ngulie di la vortuoü rüna kepecie puo nu vota.

¹³Süki puo puoe kituomia ker kie ze vor di mina[36] ker khapie süko tsüshü di uko ki, ‘A vor kemochie hako se thelhi chü bacie’ sishü.

¹⁴Siürei puo ramia thuo puo ngu mecü di puo sietsa nu dieliemia kro puo ketseshü di uko bu sie, ‘Hie themia hau bu hie mho kedi chü nyü mo’ iwa.

¹⁵Süsie puo kedi kechü kekuo ngulie di la vor tse, puo raka pie kituomia kro puo tsükeshüko kieshünushü, süko puo raka pie thelhi chü di prakelieko si nyü di.

¹⁶Sitse kerieu vor di sie, ‘Niepuu, n rakako pie süde ker praliete’ sishü.

¹⁷Sitse puo sie ‘Siyazemu, no kituo kevi! No mha kecüthoyo puo nu rei diethokelie la, nadi ker mho kezha chülie’ sishü.

¹⁸Siro kenieu vor di sie, ‘Niepuu, n raka pie süde pengou praliete.’ sishü.

¹⁹Sitse puo sie süu ki, ‘N bu nadi pengou mhokezha chütuo.’ sishü.

²⁰Kekreimia puo vor di sie, ‘Harie, Niepuu n raka haki tuowe. A pfhenyhie yopuo nu kezilie di khapiezhü zo,

²¹a n preite, kekreilamonyü no themia kepacü sekecü puo, no n vie kemoko rei chülieya, tsiu no prushü kemora rei relieya’ sita.

²²Sitse puo sie süu ki, ‘No kituo kerüzhüu! A n tie nunu kepar n dieu pie n pejotuo! No aü kepacü secü puo, tsiu a vie kemo-u rei chülieya mu a prushü kemora rei relieya ücü sita tele?

²³No kiüdi a rakako khapie rakaki nu rei zhüwa mo ga? Sipiezhü ro a la kevor ki a raka pra rei ngulietieciü’ sita.

²⁴Sidi puo khieki kethako ki, ‘Nieko hau dzie nunu rakako lielie di se vor mina ker kebau tsüwaliecie’ sita.

²⁵(Sitse uko puo ki, ‘Niepuu, süu mina ker bate.’)

²⁶‘A nieko ki pushütuo, kehoupuorei mha kebau khashü puo tsü satuo; derei ba kemo-u puo vie kebau rei puo dzie nunu chü setatuo.

²⁷Derei a ngumvüko a bu uko mho kedi chü nyüyakemoko ze haki vor di a mhodzünu nu süko dukhriwalie.’ ”

²⁸Siro puo die hako pushükewa sie Jerusalem nu votuo üdi uko mhodzü rie vota.

²⁹Siro puo tuo Betfage mu Bethani rünanie kepenuo ki Oliv kijüthou gei vorlie tse, puoe pethakelieko mia kenie ketseshü,

³⁰Sidi sie, “Nnie tuo nnie mhodzütsa keba rünau nu vocie; mu nnie sünu le ro, miapuorei sie puo gei ba mo zoluocü gada yopuo khepie ketha ngulietuo. Süu phreilie di ze vorlie.

³¹Mhanuü huomia, ‘Nnie kedipuo la süu phrei tha ga’ idi ketso ro, ‘Niepuue puo se morosuoyalie!’ siliecie.”

³²Süla unie tuo vo ru mha pete rei puo unie ki pukeshü kemhie tou di ngulie.

³³Sidi unie gadayo phrei tha tse, süu niepumia vor di sie, “Nnie kiüdi gadau phreiya ga?” idi ketsota.

³⁴Sitse unie sie, “Niepuu puo se morosuoyalie” sishü.

³⁵Sidi unie süyo ze Jisu ki vorshü; sidi uko u pfhe rhuopie gadayo gei khrashü di Jisu bu pfü balie.

³⁶Siro puo vokezhü ki, themiako rei u pfhe rhuopie chanu khrashüshü vota.

³⁷Süsie puo tuo Oliv kijüthou phi nu ker tse puo siemedziketuo themia krodiu mha kezha chükeshü nguwaketa la u nei di Ukepenuopfü tshe u rhiechü,

³⁸di sie, “Niepuu zanu vorkezhü kediu bu thejakepfüu chücie! Teigei rei keviu chülie, mu tei pesotho gei kebau bu zayie chülie!” ituota.

³⁹Süki themia krodiu donu Farisiko huo puo ki, “Kepethau, n siedziko kekhawacie” sita.

⁴⁰Sitse puo la sie, “A nieko ki pushütuo, mhanuü hako kemekrieta shierei ketsieko thuo zorei shie partatuo” sita.

⁴¹Siro puo nadiu penuo vorlie tse, süu ngushü di süu la krata,

⁴²sidi sie, “No thie ha zorei nouneu la se morokesuou no si ücü we! Derei süu n mhi kinu keviewate.

⁴³Siro teisozhako n gei vortuo, süki n ngumvümia vor seikhrie dze rükrie kho n houlie, tsiu n khapfülie mu n khie lutsahatsa nu n geteipfü lertuo.

⁴⁴Süko no mu n gei keba n nuonuoko vütshiepie kijü zhüwatuo, siro n gei ketsie puo bu rei kemhosepfü zhülie lho; kekreilamonyü no Ukepenuopfü n pfhü kevor teiu silie moketa la” sishü

⁴⁵Süsie puo kerüsuokiu nu le di mha zekebako whuovü;

⁴⁶Sidi puo sie, “A kiu pie kechaki chütuo, derei nieko süu chüpie mia vie sekecümia ki puo chüwate, idi thupiezhü.”

⁴⁷Siro puo teisonhie kerüsuokiu nunu mia petha. Siürei zievo kezhako, thezhokepethako mu themia krüta chüyakezhako puo dukhriwaketuo cha pfhüta;

⁴⁸derei uko süu chülieketuo puocha ngulie mota, kekreilamonyü themiako puo khashü mo di puo dieko rünyü terüpfü baketa la.