Read Angami Naga Luk 2 Bible Online

Luk 2 - Angami Naga bible

Luk 2

¹Siro sükisü Augustu Kaisar-e kijü nu keba pete bu u za thuketuo die puo khashü.

²Nuolhou phrü kerietho hau teiki Kurini bu Siria mhokezha chü ba.

³Mu mia pete u za thutuo üdi u thuo u ra vo phre.

⁴Siro Josef rei Galil kijü Nazaret rünau nunu tuo Judia nu David rüna Bethlehem ükezhau nu vo, puo Davidnuo kinumia mu puo yiemia zocü la.

⁵Puo za thutuo üdi puo ze kerituoüwaketapfü Maria rei ze vo, mu süpfü nuoze teita.

⁶Ru unie vo sünu keba ki süpfü puo nuo penuoketuo tei vorta.

⁷Sidi puo nuo nuorieu thepfumia yopuo penuolie, sidi pfhe pie puo kezülie di khapie peri bu mhacüyakezha khou nu zhü, kekreilamonyü rüsoki nu unie la thechü jüketa la.

⁸Siro rüna sünu tekuokepfheko terha zhü di theva u kuoko pfheya.

⁹Süki Niepuu dieliemia puo vor uko mhodzünu thalie, mu Niepuu kezieu uko vapie lutsahatsa ziekruoita, süla uko michie phita.

¹⁰Derei teigeidielieu sie uko ki, “Nieko michie hiecie! Harie, themia pete u nei phiketuo dieliekevi a se nie ki vorzhie:

¹¹Thie David rüna nunu Kelakelieu Niepuu Khrista sü penuoliete ho.

¹²Hau nie la zasiu chütuo: nieko pfhenyhie pie u nuoyo kezüpie peri bu mhacüyakezha khou puo nu zhü di ngulietuo.”

¹³Sishü tse teigei nu dieliemia krodi[4] puo puo ze Ukepenuopfü tshekecü hamhie:

¹⁴“Tei pesotho gei keba Ukepenuopfü bu puo za kemeyieu chüliecie; mu kijü keba themia puo puo neiyakezhako bu kevi chüwaliecie!”[5]

¹⁵Süsie teigeidielieko uko khawa di teigei khota tse, tekuo kepfheko huoniehuo üse, “Úko Bethlehem nu vo, di Niepuu u ki pukeshü mhie mha chüketako meho khe” sita.

¹⁶Sidi uko kenourhei vo ru, Maria mu Josef unie, mu u nuoyo bu peri khou nu zhü di ngulie.

¹⁷Siro uko süu ngulie tse, nuo hayo dze uko ki pukeshüko pie mia ki pushü.

¹⁸Mu tekuokepfheko pukeshüko kesi khe u ngo phita.

¹⁹Derei Maria mha hako pete pie puo nou shü se di süko le sei tuota.

²⁰Siro tekuokepfheko teigeidielieu pie uko ki pukeshü kemhie touu ngukelie la, Ukepenuopfü za pu kemeyie mu puo tshe mu rhu di tuo lata.

²¹Siro puo penuokelie zha thetha tseita di u nuoyo zhükere tei tsolie tse, puo za thopie Jisu chülie, theza süu puo nuonipfü kemo nu teigeidielieu thuo thoshü zo.

²²Siro Mosa zho-u nu kepu tuoi u chü kemesaketuo teisozhako tsolie tse, Josef mu Maria unie u nuoyo pie Niepuu tsüketuo la Jerusalem nu kho;

²³(Niepuu zho-u nu thupiekezhü hamhie, “Thepfunuorie penuokelie khe kha pekreipie Niepuu vie chütuo” isi.)

²⁴Süla Niepuu zho-u nu pupiekezhü “Khruleinuo kenie moro paranuo kemedzü kenie” ikeshü mhie di sünie sa se kho di ruosuo chü.

²⁵Süki mia puo puo za Simeon üdi Jerusalem nu baya; mu themia süu miatho mu pecü di Israelmia nou thu peluoshüketuou merü tuoya mu Kemesa Ruopfü puo gei tuo.

²⁶Siro Kemesa Ruopfü thuo puo bu Niepuu Khristau ngu kemochie siatalie lho ükecü puo ki pupie tuo.

²⁷Ru Ruopfüu Simeon hü ze rüsuokiu nu vor; mu süki thezho-u nu kepuko chütuo üdi, puo krünie u nuoyo Jisu ze rüsuokiu nu vor,

²⁸mu Simeon u nuoyo toupielie di Ukepenuopfü tshekeshü hamhie:

²⁹“Niepuu, no n die medzi di, tsiewe noune nunu n kituou[6] ketseshüwazhie;

³⁰a mhipie n kelakelieu nguwatacü la,

³¹No themia pete mhodzünu kesekeshüu,

³²Judakemoko la kezie pesipengukeshü puo, mu n themia Israelko la zayieu” sishü.

³³Siro puo dze pukeshü süko la puo puo puo zuonie bu u ngota.

³⁴Siro Simeon japie uko tsüshü, sidi u nuoyo zuo Maria ki, “Harie nuo hayoha la Israelmia kekra bu krütatuo mu lasie reilietuo; mu mia bu puo petsouketuo zasi puo,

³⁵tsiu themia kekra noudo hiepie ngulie kevi chüshütuo, mu zhiecha pie n melou keze chü zotuo” sita.

³⁶Süki siedzekesinupfü puo ba, puo za Ana, hapfüe Asher yiemia Fanuel nuopfü. Puo cie thenie rübei puo nupfu ze lhou, mu puo phichü phi bata.

³⁷Puo samipfü puo zo mu cie hiethethaediata. Hapfüe mhakipuorei rüsuokiu cietaya chie mo; sidi puo theva rei khinhie rei Ukepenuopfü rüsuo di mevo mu cha baya.

³⁸Sütei touki thenu süpfü vor, di Ukepenuopfü tsheta, mu u nuoyo dzepie Jerusalem rha lashüketuo pfhe keba pete pushü.

³⁹Süsie Niepuu zho-u nu chü morokesuo pete chü tseikewa sie, uko keze la Galil nu uko ra Nazaret nu vota.

⁴⁰Siro nuo süyo phichülie mu meteilie; tsiu mhasi pie puo tshulie mu Kepenuopfü ngukemezhieu rei puo gei balie.

⁴¹Teiciekepra Ciekevonyi nyikecü la puo puo mu puo zuo unie Jerusalem nu kho seiya.

⁴²Sidi puo cie kerekenie ki, u zho ki tuoi uko thenyiu nu kho.

⁴³Mu thenyiu tseita di la vorkezhü ki u nuoyo Jisu sü Jerusalem nu bata, derei puo puo puo zuo unie hau si tuo mo.

⁴⁴Siro unie puo üse rüvemia kro-u nu tuo nhiecü letuo zo, sidi unie zha puo chatuo nu vota, süsie unie seyiemiako mu unie zeko donu puo pfhü sie.

⁴⁵Sidi unie puo ngulie mota tse, unie la Jerusalem nu puo pfhü vo.

⁴⁶Sidi zha se sienu rüsuoki nu ba di puo ngulie; sükisü puo kepethako donu ba di uko die rünyü mu uko ki mha ketso iba.

⁴⁷Siro puo die kesi kheko puo kemecie mu uko die kelakeshüko la uko ngo phreta.

⁴⁸Süki puo krünie puo ngu di unie ngota; sitse puo zuo sie puo ki, “A nuo, no kiüdi hienie gei hita mu? N puo hienie bu hienie nou kemezhie se di n pfhütuoe” sita.

⁴⁹Sitse puo sie unie ki, “Kiüdi nnie a pfhü tuo ga? A a puo kinu ba morosuokecü nnie si mo me?” idi puta.

⁵⁰Derei unie puo pukeshü cau silie mota.

⁵¹Süsie puo unie ze Nazaret nu vota, tsiu puo unie die ze ba zolie, siro puo zuoe die hako pete pie puo nou shüse tuota.

⁵²Siro Jisu mhasi miemielie mu phichü[7]sierlie, sidi Ukepenuopfü mu themia khrie rei pfülie.