Read Angami Naga Luk 20 Bible Online

Luk 20 - Angami Naga bible

Luk 20

¹Siro puo khunhie puo rüsuokiu nu mia petha tsiu dieliekeviu pupie mia kie keba ki, zievo kezhako mu thezhokepethakoe pehüko ze di vor,

²di sie puo ki, “No kedipuo kekuo se mha hako chüya ga? Siro supuonie kekuo hau pie n tsü ga? Hie ki pushücie” sita.

³Sitse puo uko ki, “A rei nieko ki mha puo ketsotuo, a ki pushücie:

⁴Johan mia baptaiz kechüu teigeinu mo themia kinu vor ga?” ita.

⁵Sitse uko donu die süu kepu di sie, “Mhanuü we ‘Puo teigeinuwe,’ sishü ro, puo sie, ‘Siliro nieko kiüdi puo pelelie mo ga?’ sitie.

⁶Siro we sie, ‘Süu themia kinu zo’ ishü ro, themia pete ketsie pie u vatie, ukoe Johan üse siedzekesimia puo ücü pele touketa la” si thata.

⁷Sidi uko sie puo kirapuonu vor shikecü si moüta.

⁸Sitse Jisu uko ki, “A rei kedipuo kekuo üse mha hako chü tuo shicü se nieko ki pulie lho” siwata.

⁹Süsie puo dievi hau pie themiako ki pushü: “Mia puo khube lietsa puo ciepiezhü di süu pie mia penyiewa di rüve rüna kepecie puo nu vo tuo cha phita.

¹⁰Siro puotei vorlie tse puo lieu nyiekebako ki khube si puoya meseko kenguketuo la puo kituomia puo ketseshü, derei lie nyiekebako süu vüwa mu mhapuorei pie puo tsü mo di puo ketse lawa.

¹¹Süsie puo kituomia kekrei puo ketse lashü; derei süu rei vüwa mu puo bie kethengashü tsiu mhapuorei pie puo tsü mo di ketse lashü.

¹²Süsie rei puo mia seu ketse lashü, hau va rei uko puo bie kerüzashü di puo whuowa.

¹³Süsie khubelie niepuu sie, ‘A kedipuo chü ro vi ta? A a nuo a khrieu ketseshütuo; siro uko puo sü rhulie rei si mo.’ idi lelie.

¹⁴Derei lie nyiekebako puo ngushü mu uko kerüchü di sie, ‘Hauha kayieute; úko puo dukhriwa khe, sitse puo kayieko u vie chülietuo.’

¹⁵Sidi uko puo teshü khubelie nhaphie pra di puo dukhriwa. Siliro khubelie niepuu uko gei kedipuo chütuo ga?

¹⁶Puo vor di lie nyiekebako pekawatuo, sidi puo khubelieu pie kekreimia tsüwatuo” sita. Siro uko hau sishü tse, uko sie, “Kenyüthor mu” sita.

¹⁷Derei puo uko mehoshü di sie, “Kikechüko khawaketa tsieu, süu puo kenu tsieu[37] chüte, idi thupiekezhüu ca kedipuo ga? sita.

¹⁸Kehoupuorei te ketsie süu gei ketsuu kesetshie phawatuo; tsiu süu kehou puo gei tsu rei süu vütshie pie nyophe chüwatuo” sita

¹⁹süki thezhokepethako mu zievoko puo uko petsou di dievi süu kepu lelie tse puo telietaketuo leta derei uko themiako preita.

²⁰Süla uko puo die geinu puo telie di khapie kekuokeseko mu kezhau dzie nu shüwaketuo la mha rieketuo kro puo bu kemiatho mevi chü di ketse pie puo rie.

²¹Sitse süko puo ki, “Kepethau, hie no kemezhü touu pie mia petha tsiu mia puo gei rei n nei si kreiya mocü si ba, derei Ukepenuopfü cha ketho-u pie pethayakezha si ba.

²²Hie Kaisar khruo khruokecü thezho mo mo ga?” ishü.

²³Derei puo uko do silie di uko ki,

²⁴“Denari puo pie a pekieshücie. Süu gei supuo tsü mu supuo za thupie tuo ga?” sitse uko sie, “Kaisar zo” sishü.

²⁵Sitse puo uko ki, “Kaisar vieko pie Kaisar tsüwalie, mu Kepenuopfü vieko pie Kepenuopfü tsüwaliecie” sita.

²⁶Süki uko themiako mhodzünu puo dieko la puo telie lhota, tsiu puo uko die kelakeshüko la uko ngopfü di kemekrie zeita.

²⁷Siro themia kesia nunu rheilasielie lho üyakezha Sadukiko huo vo puo ketso di sie,

²⁸“Kepethau, Mosa hie la thupiekezhü mhanuü mia puo puo kimia nyi derei puo nuo jü di siata ro, puo yie bu tuolieketuo la puo siezeu bu süpfü lie morosuo.

²⁹Siro siezedzürie thenie tuoya ru, phichütho-u kiyalie mu puo nuo jü di siata;

³⁰Süsie kenieu

³¹mu mia seu bu rei süpfü lie, ru sükemhie mia thenieko pete rei u nuonuo jü di sia phreta.

³²Sidi kenuotsa thenupfü rei siata.

³³Siliro rheilakesie nhie thenu süpfü bu supuo kimia chütuo ga? mia thenieko süpfü lie phre zocü la?” sita.

³⁴Sitse Jisu uko ki, “Tsiedo kelhouko ha kiya mu nyhü ituoya;

³⁵derei kenuou kelhou nu volie keviko mu kesia nunu rheilasieketuoko kishükiya chülie lho.

³⁶Siro süko sia lalie kenjü, kekreilamonyü uko teigeidieliemia mhie zo mu rheilakesie nuonuokocü la Ukepenuopfü nuonuo reita zo.

³⁷Jisu Mosa zorei kesiamia rheilasielieyakecü tha kemecieshü zo, seinyho puo dzeu nu ngukelie puo Niepuu üse Abraham Kepenuopfü, Isak Kepenuopfü mu Jakob Kepenuopfü üdi pu zo.

³⁸Siro puo kesiako monyü kerheiko Kepenuopfü zo, kekreilamonyü süko pete puo la rhei ba zocü la” sishü.

³⁹Sitse thezhokepethako huo sie, “Kepethau, no pu touwata zo” sita.

⁴⁰Kekreilamonyü uko puo ki mha ketso sa michieketa la.

⁴¹Siro puo sie uko ki, “Kiüdi mia Khrista üse David nuo üdi pulie vituo ga?

⁴²Kekreilamonyü David thuo zorei Chieliko leshü nunu pukeshü: Niepuu sie a Niepuu ki, No a zatsa ba zolie,

⁴³a n ngumvüko khapie n phikhro shüwa kemochie isi zo.

⁴⁴David thuo rei puo üse Niepuu idi puo kie ro; kikidi puo üse puo nuou ülietuo ga?” sita.

⁴⁵Siro themia peteko puo die rünyü ketha nu puo sie pethakelieko ki,

⁴⁶“Thezhokepethako gei nie kireiliecie, uko u pfhenei rütshusecü se di tuo whiketuo u neiya, tsiu lhithochüko nu mia bu uko kelu nyüya, tsiu uko sinagogko nu theba kerükrieko nu ba nyü, mu thehethehieko nu therhubako nu ba nyüya.

⁴⁷Uko samipfüko kiko pekacü tsiu puo meviva di cha pecha tuoyakezha zo! Uko mia ki rei uko siazha rekuotuo” sita.