Read Angami Naga Luk 21 Bible Online

Luk 21 - Angami Naga bible

Luk 21

¹Siro puo tosie kenyimiako mha pie kinyibou nu shükeba ngulie;

²tsiu thenu sami mha kejüpfü puo rei priesa kenie khakeshü ngu,

³Sitse puo sie, “A nieko ki pu toushütuo, mhakejü sami hapfü kekreimia pete ki rei mha kha krashü ho;

⁴kekreilamonyü kekreimia we u ketshukelhuo chü keba nunu khashü; derei hapfüha zo we puo kejü donu rei puo vie ketuokoyo khashüwata zo” sita.

⁵Süsie huomia ketsie kevi se rüsuokiu ketso kezivi phipie keba mu mhapie Ukepenuopfü ketsü dzeko kepu tha ru, puo sie,

⁶“Nieko ngukethako la, teisozhako vortuo, sidi ketsie puo bu rei kekrei puo gei ba motatuo; pete ne ketou phrewatuo” sita.

⁷Süki uko sie, “Kepethau, kicükipuo mha hau chütatuo ga? Siro mha süko chütaketuo teiki zasi kikecü puo chüshütuo ga?”

⁸Sitse puo sie, “Nieko mia bu nie sewa molieketuo la nie kirei tuoliecie, kekreilamonyü themia kekra a za se, ‘A puo zowe!’[38] tsiu ‘Puoteiu sü vorte!’[39] isi vortuo. Siürei süko medzita hie.

⁹“Siro nieko terhü kegeikecü mu mha kebvükecü dzeko kesi ki michieta hiecie; mha sikecüko chü perie vor morosuo, derei süu puotei thelau moluo” sishü.

¹⁰Sitse puo uko ki, “Seyie puoe seyie kekrei puo ngumvü mu kedi puoe kedi kekrei puo perhietuo;

¹¹tsiu kiükishü kemerie chü mu lukihaki pekrie mu thepetheruo siertuo; siro teigei nu mha kemeriekecü mu ngupie michie zokecü zasi chü phishütuo.

¹²“Derei mha hako chüketa mhodzü mia bu nieko telie di nie pechüpenyütuo, mia nieko tepie sinagogko nu mu kediekiko nu votuo, tsiu a za la mia bu nieko teze kezhako mu kediko mhodzünu votuo.

¹³Hau nieko bu zhapu chüshülieketuo tei puo zo.

¹⁴Süla nieko mia ki kedipuo putuo shicü pedzüperie le medo ba hie;

¹⁵kekreilamonyü ngumvümia bu nie mese chülie kelho morei nie prülilie kelho dieko[40] mu mhasi a thuo pie nie tsü zotuo.

¹⁶Siro nie krünuo, nie siezedzüriemia, nie seyiemia mu nie khriethomia thuo nie teshütuo; sidi ukoe nieko huomia dukhrituo.

¹⁷A za la mia pete bu nieko ngumecütuo.

¹⁸Derei nie tsü geinu nie thaprü yopuo rei pekawalie lho.

¹⁹Nieko shügeshühiekelie geinu nie kerheiro kelalietuo.

²⁰“Siro chüpahimia vor Jerusalem houpfülieketa nieko ngukelie ki, süu pekaperuowaketuo teiu penuota ücü siliecie.

²¹Süki Judia nu ketuoko bu ta kijüthouko gei votalie; siro nadiu nu kebako bu tatalie, tsiu chazou ketuoko bu la rünau nu le hie.

²²Kekreilamonyü sükisü thupieketuoko chü tseilieketuo khepu teisozhako zocü la.

²³Süki nuonipfüketuoko tsiu u nuonuo nuyakezhako we ce chülietie! Kekreilamonyü kijüu gei kemezhiepie kemeriekecü mu noupfhüu themia hako gei vortuo.

²⁴Süko huomia zhiecha geinu tetsutatuo, mu huomia mia diechü seyieko donu votatuo; mu Judakemoko teiko tseita kemochie Judakemoko bu Jerusalem kedewatuo.

²⁵“Süki niaki, khrü mu themvüko geinu zasi neiüko partuo; tsiu kijüu gei lhouketuo seyie neiüko dzükezha mu süu pfheko la u va pethopfü di kemezhie phitatuo.

²⁶Siro kijüu gei mhachü vorkezhüko la themiako michie di phisiatatuo, kekreilamonyü süki teigei kekuoko shükenieshütuo.

²⁷Siro süki uko “Themia Nuou kimhou geinu kekuo mu zapuzayie se di mia mhingu chü ketsur ngutuo.

²⁸Mu mha hako chü vorta tse nieko tosie pesogei meho zolie, kekreilamonyü nieko rhalieketuo tei penuoketa la” sita.

²⁹Süsie puo dievi puo uko ki pu di: “Chiedebo-u mu seibo kekreiko pete mehoshücie,

³⁰Süko puo nyü thela kepar ki teile tieta ükecü nieko thuo silieya.

³¹Süsütuoi nie rei mha hako chü parketa ngukeshü ki, nieko Kepenuopfü kedi vortaketuo tieta ükecü siliecie.

³²A nieko ki pu toushütuo, mha hako chü thewa kemochie thephou hau jütalie lho.

³³Tei mu kijü jütatuo, derei a dieko we jütalie lho zo.

³⁴“Derei nieko rüzhü mu meze tsiu tsiedo kelhou ki mereiko chü di rüporüvüpfü ba, nieko lekemo kinu teisozha süu bu nie tewa moketuo la, nie kirei baliecie;

³⁵kekreilamonyü süu kijü zie gei keba pete gei vor zotuokecü la.

³⁶Derei nieko we mha süko pete chü kevor ki metei tha di süko therhielieketuo mu Themia Nuou mhodzü thalieketuo la pfheüla mu cha ba zoliecie” sishü.

³⁷Siro puo teisonhie rüsuoki nunu mia petha ba di thevalie ro vo Oliv kijüthou üdi kieyakezhau geinu puotei pevovoya.

³⁸Siro themiako pete puo die rünyüketuo la khiserüna sielie di rüsuokiu nu vorürya.