Read Angami Naga Luk 22 Bible Online

Luk 22 - Angami Naga bible

Luk 22

¹Siro ciekevo ükecü Khreiü shükemo Niekhrüda Nyiu penuotazhü.

²Sitse zievo kezhako mu thezhokepethako kimhie di Jisu dukhrilietuo shikecü rhü ba, derei uko themiako prei ba.

³Süki Satan-e Iskariot ükezha Judas nou leta, puo kerekenieko donu mia puo.

⁴Süla puo vo di zievo kezhako mu rüsuoki pfheyakezha kezhako ze kimhie di puo tepie uko tsülie vi tuo shicü kerüchü.

⁵Sitse uko nei phita di raka kha puo tsütuoülie.

⁶Sitse Judas süu puo medota di themia krodiu tuokemo ki puo nu Jisu tepie uko tsüshüketuo puotei kevi puo rü terütuota.

⁷Süsie Khreiü shükemo Niekhrüda zha, Ciekevonyiu la tekuonuo dukhriyakezha teisozhau vorta.

⁸Süla Jisu Pitor mu Johan unie ketseshü di sie, “Nnie vo di úko keze Ciekevonyiu cüketuo la mha keseliecie” sishü.

⁹Sitse unie puo ki, “No hienie bu kirapuonu süu kesekecü n medo ga?” idi ketso.

¹⁰Sitse puo unie ki, “Harie,” nnie tuo nadiu nu le tse mia puo dzü lipfhü puo pie tuo di ze keselietuo ho; nnie puo siemedzi puo kinu zo lelie,

¹¹sidi ki niepuu ki, ‘Kepetha-ue n ki, “Ae pethakelieko ze Ciekevonyi nyiketuo la kibouu kirapuo ba ga?” iyalie’ sicie.

¹²Sitse puo pesogei kese tseipiekeba kibou kezha puo thashütuo ho. Sünu nu úko la mha keseliecie” sishü.

¹³Sidi unie tuo vo ru, Jisu unie ki pukeshü mhie tou di ngulie, mu unie Ciekevonyiu la mha keselie.

¹⁴Süsie puotei tso vorlie tse, puoe pethakelieko ze mhacütuoü ke balie.

¹⁵Sidi puo uko ki, “A kemezhieketa mhodzü nieko ze Ciekevo Nyi hau cü nyüthor vor zo;

¹⁶a nieko ki pushütuo, Ukepenuopfü kedi nu süu chü tsei vorlie kemochie, a mhakipuorei nieko ze hau cü lalie lhoketa la” sita.

¹⁷Süsie puo tehieu pielie di kethezie khashülie di sie, “Nieko hau pielie di keza kriecie;

¹⁸Kekreilamonyü a nieko ki pushütuo, Ukepenuopfü kedi vorlie kemochie tsie yawinu a nieko ze khubedzü hau krie salie lhoketa la” sishü.

¹⁹Süsie puo niekhrüdau chülie, sidi kethezie khashü, tsiu süu bietshielie di khapie uko tsü di sie, “Hauha nieko la khakeshü a mo-u zo. Nieko a rükra tuolieketuo la hau chüchücie” ishü.

²⁰Süsütuoi uko mhacükelie sie, puo tehieu rei pielie di sie, “Tehie hauha rei nieko la pekrukeshü a zieu la dietseidiekhokelie kesau zowe.

²¹Derei harie, a teshüketuou rei a ze ba, mu puo dzie rei mizhü gei ba zo.

²²Siro Themia Nuou rüli we pedzüperie chütuoü di rhüpieketuo kemhie chü zotuocü la, derei ce, puo teshüketuo-u we chülietie” sita.

²³Süsie uko huoniehuo ketso di supuonie hau chütuoü bate shisü, ibata.

²⁴Siro pethakelieko sie uko donu supuonie kezhatho-u chütie shicü keprülita.

²⁵Derei puo uko ki, “Judakemoko donu kediko we uko mho diya, mu uko mho kekuo kenyiko üse u razou krü chüya.

²⁶Derei nieko bu we silie lho; sikecüumonyü nieko donu kezhatho-u bu kecütho-u kemhielie, mu krütau bu mia thekemia mhielie.

²⁷Ka siro, mizhü ki kebau mo, mia lie chükethau zhakuo ütuo ga? Mizhü khieki kebau moü me? Derei a we nieko do nunu mia thekeyakezhamia mhie tuoya ze.

²⁸“Sirei nieko we a dophi ngukelie pete nu rei a ze thakelieko zo;

²⁹Süla a Puou kedi khapie a ketsü tuoi a rei süu pie nieko tsütuo,

³⁰Sidi nieko bu a kedi nu a ze mhacümhakrietuo, tsiu nieko bu a kedibau gei ba di Israel seyie kerekenieko mho dituo.

³¹“Harie Simon, Simon, thoulha tuoi nieko rüzotuo üdi Satan-e chaliete,

³²derei n kepele bu jüta molieketuo la a n la chashüwe, siro no rürei la vorkelie ki, n kezeko chü kethepfuliecie” sishü.

³³Sitse puo sie puo ki, “Niepuu a n ze kedieki nu rei mu kesia nu rei vo zoketuo dojüpfü bawe!” sita.

³⁴Sitse Jisu sie, “Pitor, a n ki pushütuo, no a si mo üdi va se pu kemochie tsiezhü thevü khoulie lho” sita.

³⁵Sitse puo uko ki, “A hadzü nieko bu priesabou, likhuo morei phikou se mo di ketsekeshü ki nieko mha huo tsopfhüte me?” idi ketso. Sitse uko sie, “Mhapuorei tsopfhüta mo” sishü.

³⁶Süla puo uko ki, “Derei tsiewe kehoupuorei priesabou morei likhuo kebau süu selie morosuo. Siro kehoupuorei zhiecha puorei bakemo-u puo boulie zelie di puo khrülie morosuo.

³⁷Kekreilamonyü a nieko ki pushütuo, ‘Puo phrüpie thezho kevarhuoko saliete’; ikecü thupieketuou a geinu chü tseilie morosuokecü la; kekreilamonyü a dze die süko chü tsei vortatuoükezhü la” sita.

³⁸Sitse uko sie, “Harie, Niepuu hieko haki zhiecha kenie pie tuolie!” sita. Sitse puo sie, “Sü zorei vi” sita.

³⁹Süsie puo tuo pra di puo zho ki tuoi Oliv kijüthou gei vota; mu pethakelieko rei puo ze vo.

⁴⁰Sidi puo vo thechüu tsolie tse, puo uko ki, “Nieko dophi nu leta molieketuo la cha baliecie” sita.

⁴¹Sishü di puo uko ki nu tsiedei chie puo mese pecie phi di khoutoupfülie di cha di sie,

⁴²“A Puo, n medotuo liro, a ki nu tehie hau chüwacie; derei a medo monyü n medo-u chüliecie” sishü.

⁴³Sishü tse teigeinu dieliemia puo ker puo chü pekuoshü.

⁴⁴Süsie puo kemezhie phi di cha puo teitso chü sakuo bata; tsiu puo rükhru thezie tuoi di po kijü tsurta.

⁴⁵Süsie puo chakeshü sie sier di tuo puoe pethakelieko ki phir ru uko nou kemezhiekecü pfü zezhüketa ngulie,

⁴⁶Sitse puo sie uko ki, “Nieko kiüdi zezhü zo ga? Nieko medokephi nu leta molieketuo la sie di cha baliecie” sishü.

⁴⁷Puo die süko pu ketha nu harie, mia krodi puo Judas ükezha pethakelie kerekenieko donu mia puo bu uko chatha ze vor mu puo Jisu meboshütuo üdi puo ki phir,

⁴⁸derei Jisu puo ki, “Judas, no Themia Nuou meboshü di puo teshütuoüya me?” sita.

⁴⁹Süki puo zeketuoko kedipuo chütatuoüzhü shicü ngulie tse, uko puo ki, “Niepuu, hieko bu zhiecha pie mia dutieya mo?” ita.

⁵⁰Sidi süko mia puo puo zhiecha pie zievo kezhau kituou du di puo nyie thezatsa metakreiwa.

⁵¹Derei Jisu sie, “Ci zota” sishü. Sidi puo themia süu nyieto bie di chü pevi lashüwata.

⁵²Siro Jisu sie puo tetuo üdi kevor zievo kezhako, rüsuokiu nu kezhako mu pehüko ki, “Nieko zhiecha mu seide pie di thezho kevarhuomia puo teketuo tuoi a tetuoü vorzhü me?

⁵³A teisonhie nieko ze rüsuokiu nu baya ze, mu nieko süki nie dziepie a gei shü chie mo. Derei tsie nieko teiute, mu kezeiu puo kekuo nyite” sita.

⁵⁴Siro uko Jisu telie di puo ze phichü kezhau kinu vota. Derei Pitor-e ratsanu puo siemedzi tuo.

⁵⁵Süki mia kitiezha nu mi chü peguo ba, mu Pitor rei süki kebako ze ba.

⁵⁶Sitse kituomiapfü puo puo mi peguokeba ngulie di puo meho terü di sie, “Themia hau rei puo ze tuoya zowe!” sita.

⁵⁷Derei Pitor mo üdi sie, “Thenupfü a puo si mo” sita.

⁵⁸Ge za ba tse mia kekreimia puo puo ngulie di sie, “No rei uko mia puo zo!” sita. Derei Pitor sie, “Themiau, a mo zo” sita.

⁵⁹Siro si ba di bavüdo puo mese sie nu mia kekreimia puo puo thochü di, “Themia hau Jisu ze tuoya ketho zo, puo Galilmia zocü la” sita.

⁶⁰Derei Pitor sie, “Themiau, a no kedipuo pu tha shicü si mo zolie” sita. Siro puo die süu pu ketha nu thevü khoushüta.

⁶¹Süki Niepuu reipra Pitor mehoshü, sitse Pitor hadzü Niepuu puo ki, “No thevü kekhou mhodzü va se a phra mvütatuo” idi pukeshü dieu rükralieta.

⁶²Sidi puo krapie mhapuochü di chazou vota.

⁶³Süki puo merhashü kethako puo pie kethekre di puo vüta;

⁶⁴Uko puo mhi dzelie mu puo ketso di, “Ka supuo n vü ga? Chieshüliecie!” sita.

⁶⁵Siro uko puo kengakecü die neiü puta.

⁶⁶Teiso par tse pehüko, zievo kezhako mu thezhokepethako vor kengulie, sidi uko puo ze mechü kehouu nu vorlie.

⁶⁷Sidi uko sie, “No Khristau zoü liro hie ki pushücie,” sita. Sitse puo sie, “A nieko ki pu rei niekoe pelelie lho;

⁶⁸mu a mha nieko ketso shierei, nieko süu a ki pulie lho.

⁶⁹Derei tsieyawinu Themia Nuou Kepenuopfü kekuou zatsa batatuo” sita.

⁷⁰Sitse uko pete sie, “Di siro no Kepenuopfü Nuou me?” idi ketsota. Sitse puo uko ki, “Nieko a üse süu üya” sita.

⁷¹Sitse uko sie, “Úko zhapu kikecüpuo pfhü sa ta? We puo tie nunu silieta ze ru!” sita.