Read Angami Naga Luk 23 Bible Online

Luk 23 - Angami Naga bible

Luk 23

¹Süsie themia kro süu pete sielie di Jisu ze Pilat mhodzünu vo.

²Mu uko puo pejo di sie, “Hieko themia hauha u seyieu ketsipesuo, u bu khezhanuo khruopie Kaisar tsü hienu, mu puo thuo puo üse Khristau, kediu[41] üketa la” sita.

³Sitse Pilat sie puo ki, “No Judako Kediu me?” idi ketso. Sitse puo sie, “N kepuu zo” sita.

⁴Süsie Pilat sie zievo kezhako mu themia krodiko ki, “A themia hau pejolieketuo ca puorei ngulie mo” sita.

⁵Derei uko u rhiechü sa di sie, “Puo puo kepetha dieu pu Judia kijü pete nu themiako pfükerhü mu mha kebvü di Galil kijü nu sede di hanu rei vorte” sita.

⁶Siro Pilat die hau sishü tse, puo Galilmia mo ki shicü mia ki ketso.

⁷Sidi puoe puo Herod diyakezha kijütsa nu vor ükecü silie tse puo ketsepie Herod ki shüwa, süki süu Jerusalem nu bakecü la.

⁸Siro Herod Jisu ngulie tse puo nei phita, kekreilamonyü puo Jisu dze sishü di telhe puo ngushü nyü tuotacü la, mu puo u ngo mhatho chüshü puo kietuo nhiemu idi merütuo.

⁹Süla puo puo ki mha kekra ketso, derei Jisu puo ki mhapuorei pu lashü mo.

¹⁰Siro zievo kezhako mu thezhokepethako süki tha di puo pejopie mhapuo chüta.

¹¹Siro Herod mu puo rüpfhünuoko puo pese se mu puo pie kethekre seshü di puo bu pfhenei phriephriecü puo dzielie, di puo ketse lapie Pilat kishü.

¹²Sünhie yawinu Herod mu Pilat unie khrietho chülieta; ha mhodzü we unie kengumvü tuoya.

¹³Süsie Pilat zievo kezhako krütamiako mu themiako kie kengushü,

¹⁴sidi uko ki, “Nieko themia hau teze a ki vor mu puo üse themiako ketsi pesuoya üte; mu harie a nieko mhodzünu puo ketso menuo sie zorei nieko puo pejokecü dieko le kesie ki a puo pejolieketuo puorei ngulie mo.

¹⁵Sizomonyü Herod rei mia bu puo pesiawalie kesü mhatho puorei ngulie kemo la puo ketse lashüte.

¹⁶Süla a puo vüwa di puo kha lashüwatuo” sishü.

¹⁷(Siro thenyiu nu mia puo khashü uko tsü morosuoya).

¹⁸Süla uko shie di, “Themia hau dukhriwacie mu Barabas khapie hie tsüwalie!” sita.

¹⁹(Themia hau nadiu nu mha kebvükecü la mia kedukhri nyie puo la kedieki nu ba.)

²⁰Siro Pilat Jisu khashüwa nyü di uko ki pu la;

²¹derei uko melie u rhiechü di, “Puo gouwacie! Puo gouwacie!” sita.

²²Va seu va rei puo uko ki, “Puo kedipuo kejo chüwata ga? A puo sia kesü mhatho chüwaketa puorei ngulie mo. Süla a puo vüwa di puo kha lashüwatuo” sishü

²³Derei uko shie u rhiechü di puo gouwanu tha zota, sidi uko pfhe la kuolie.

²⁴Süla Pilat uko kechau chüpie tsüwaketuo pepilieta.

²⁵Sidi puo uko cha ketha themiau, mha kebvü mu mia kedukhri la kedieki nu khapie kebau khashüwa, mu puo Jisu pie uko bu u medo chülienu di uko dzienu khashüwata.

²⁶Süsie uko puo merhashü ze vozhü tse, Simon ükecü Kurinmia puo kijü kekreitsa nu vorkezhü ngulie ru puo telie di puo bu krus-u pielie, di puo bu Jisu medzilienuta.

²⁷Süki mia krodi puo puo siemedzi vozhü; süko donu thenuko huomia rei tuo di puo la u merü kepfhü di thekrü chütuo.

²⁸Derei Jisu reipra uko ki, “Jerusalem nuopfüko, a la kra hiecie, derei nie thuo nie la mu nie nuonuoko la kraliecie.

²⁹Kekreilamonyü mia sie, ‘Nuojüpfüko mu nuo penuo mo zoluokecüko, tsiu nhicunuomia bu mhakipuorei u nu nu kemoko thejakepfütho’ idi puketuo teisozha puo vorzhie.

³⁰Süki mia kijüthou kerükrieko rei üse, ‘Nieko me hie gei tsurcie’ situo; tsiu kijükhruko ki, ‘Vor hie yapfüliecie’ isietuo.

³¹Kekreilamonyü mia seibo kerhei gei thuo rei mha hako chü liro, seibo kesiako gei we kedipuo chüshü ta?” sita.

³²Süki thezho kevarhuomia kenie sa Jisu ze goutuoü di ze vozhü.

³³Sidi uko vo thechü puo Miatsütsoru ücüu tsolie tse, sü geinu mia Jisu gouwata, siro kejokechünie rei mia puo puo zatsa mu mia puo puo vitsa idi puo sa gouwa.

³⁴Sitse Jisu sie, “A Puo, uko kejo vashücie; kekreilamonyü uko kedipuo chü tha shicü sikemo la” sishü. Siro uko dape di puo pfheneiko kezalieta.

³⁵Siro themiako sükinu meho tha, derei pehüko puo kre di sie, “Puo kekreimia we kelashüya; mhanuü puo Ukepenuopfü kedakelie Khristau üro puo bu puo thuo puo kelaliecie” ibata.

³⁶Rüpfhünuoko rei puo pie kethekre, tsiu zu kekhro se puo tsü,

³⁷sidi sie, “No Judako kediu üro n thuo n kelaliecie” sita.

³⁸Siro puo tsü mhokinu,[42] “Hauha Judako kediu” sikecü rei thu sashü.

³⁹Siro thezho kevarhuo la goupiekezhanie mia puo puo pese di sie, “No Khristau zo üro n thuo n kelalie mu hienie rei kelashücie” sita.

⁴⁰Derei kekreiu puo kerhie di sie, “No Kepenuopfü prei mo me? Puo rei n kemhie kemezhiezhü ze.

⁴¹Derei avu we avu siazha ngulie rei zhü, avu we avu mhatho zhakhra nguzhie, derei themia hau we mhapuorei chü kekrü mo” sita.

⁴²Sidi puo sie, “Jisu no n kedi nu kevo ki a va rükrashücie” sita.

⁴³Süla puo sie, “A n ki pu toushütuo, no thie a ze kerüüchü nu batatuo” sishü.

⁴⁴Siro keba kerekenie nunu vo keba se ketso kijü pete zeibouita;

⁴⁵niaki rei zieshü mo, siro rüsuokiu nu pfhe lhapiekezhau rei rürha kenie chüta

⁴⁶Süki Jisu shie puo rhiechü di “A puo, a a ruopfü khapie n dzienu shüwate ho” isi, sidi puo die süu pushü di puo ruopfü khashüwa.

⁴⁷Siro chüpahi krie mhokezhau mha chüketako pete ngushü di Ukepenuopfü tshe di sie, “Themia hau kejokejümia[43] puo tou zo” sita.

⁴⁸Siro meho ketha themia kro-u rei mhachüketa pete ngu di u merü vü di la kinu vota.

⁴⁹Siro puo kesi kheko mu Galil nunu puo siemedzi kevor thenuko rei vo ratsanu mha süko meho tha.

⁵⁰Süki Judamia puo puo za Josef ükecü themia kevi mu kemiatho, mechü kehou tsüphrü puo chüya,

⁵¹derei puo kekreiko mharhü mu mhatho-u puo medo mo. Puo Judamia rüna Arimathia nunu vor, mu puo Kepenuopfü kedi vorketuo pfhetuoyakezhamia puo.

⁵²Themia hau Pilat ki vo di Jisu mo cha.

⁵³Sidi puo themo-u pie kerlie, mu linen pfhe pie kezilie di pie vo tsiekrie geinu hokelie mia puo mo rei se shükemo puo nu zhüwa.

⁵⁴Siro sünhie mhakesekecü teiso, mu sabat zha rei sedetazhü.

⁵⁵Siro Galil nunu puo siemedziketuo thenuko rei Josef ze vo mekhruu nu puo mo khapie kezhü ngu.

⁵⁶Süsie uko la kinu vor di Jisu kenheketuo la mhare kethengu mu tierko keselie sidi thezho-u medzi di uko sabat nhie rüleilie.