Read Angami Naga Luk 24 Bible Online

Luk 24 - Angami Naga bible

Luk 24

¹Siro zhali nhie khise rüna thenuko mhare kethengu mu tierko pie di mekhruu nu vo.

²Sitse uko ketsieu mekhruu nunu rütouketa ngulie.

³Siro uko tuo le ru; themo-u ngulie mo.[44]

⁴Sitse uko mha süu lepie uko medo kejü chü tha tse mia kenie pfhenei phriephrie leileikecü se di vor uko khieki thalieta.

⁵Thenu süko michie phi di uko zie pesupfü thata ru, unie sie uko ki, “Nieko kiüdi kesiako do nunu rheituoketau pfhüya ga? Puo haki zhü mote, derei puo rheilasiete.

⁶Puo Galil nu keba ki nieko ki kedipuo pushü shi, rükraliecie,

⁷Mia bu Themia Nuou tepie kephoumamia dzie nu shü morosuo, tsiu mia bu krus geinu puo goutuo, sirei zha se nhie puo rheilasielietuo” sishü.

⁸Sitse uko puo dieko rükralie,

⁹Sidi mekhru nunu tuo lata, mu vor mha hako pete pie kerepuokrüko mu kekreiko pete ki pu phreshü.

¹⁰Thenu süko Maria Magdalapfü, Joana mu Maria Jakobnuo zuopfü, siro uko mu uko zeketuo thenu kekreiko mha hako pie apostelko ki pushü.

¹¹Derei uko thenuko dieko üse diethuo puo puya nhiecü le di uko pele mota.

¹²Derei Pitor sielie di ta mekhruu nu vo; sidi puo nuke tsu ru linen pfheko rübei kengu zota. Siro puo kedipuo chüte shicü lepie puo ngopfü di kinu la vorta.

¹³Sünhie uko donu mia kenie Ema ükecü rünau, Jerusalem ze maildo thenie mese kepeciekecüu nu vozhü,

¹⁴mu unie mha süko chüketa dzeko pete kepu vozhü ru,

¹⁵Jisu puo thuo unie khieki vor di unie ze tuota,

¹⁶derei unie mhi bu puo silie kenjükecü chüwata.

¹⁷Sitse puo unie ki, “Nnie cha tuo chakhrie kedipuo kerüchütuo ga?” idi ketso. Sitse unie unie zie suo siepfü di thopfü thata.[45]

¹⁸Siro unie mia puo za Kleopa ru, puo sie puo ki, “Rüve Jerusalem nu kevoko donu n rübei tsiedo kinu rüna süu nu mhachüketako dze si kemo zote nhie ha?” sita.

¹⁹Sitse puo unie ki, “Kedipuo ya?” idi ketso. Sitse unie sie, “Jisu Nazaret-u gei chüketa dze zemu, themia süu siedzekesimia, Ukepenuopfü mu themia peteko mhodzünu puo die mu puo mhatho nu rei kuo sekecü puo,

²⁰mu u zievo kezhako mu kekuokeseko puo tepie mia dzienu shü di puo pejowate, sidi puo gouwate.

²¹Derei hie puo üse Israel rhalietuoü di kevor-u zo ükecü merü vor zo. Mu u zo, puo mha hako chüketa sie rei, puo siaketa thie zha sete.

²²Sizomonyü hieko kro-u nu thenuko huomia kinu u ngokecü die huo rei site. Uko khiserüna mekhruu nu vo,

²³derei puo mo-u zhü ngu mota tse, uko la vor hieki pukecü uko teigeidieliemia kenie ngu ru sünie-e uko ki puo rheilasieta ükecü pu.

²⁴Hieko kro-u nu huomia mekhruu nu vo di thenuko kepu mhie tou di ngulie, derei, uko puo ngulie mota” sishü.

²⁵Sitse puo sie unie ki, “Harie, nieko kemeloko, tsiu siedzekesimia pupieketuoko rei pele thotsa zokecüko!

²⁶Khrista bu mha hako nu kemezhiekelie sie nu puo zayieu nu le morosuo mo me?” sita.

²⁷Sidi puo sie Mosa leshüko mu siedzekesiko thukeshüko pete nu sede di Ketholeshüko nu puo dze thupieketuoko pete ca vatshapie unie kieshü.

²⁸Siro uko keze unie votuoüketuo rünau penuo vorzhüta rei, puo we pecie sa votuoükezhü mhie tuo zo.

²⁹Derei unie puo kha di sie, “No rei úko keze batacie, kekreilamonyü teisozha vothetazhie mu tsie teizeitazhü ru” sishü. Süla puo unie ze batatuo üdi vota.

³⁰Siro mhacütuo üdi uko ke balie tse, puo niekhrüdau pielie di jashü, mu bietshielie di pie unie tsüshü

³¹Sishü mumetha unie mhi mecie par di puo silieta, derei unie mhingu kinu puo ngu sa mota.

³²Sitse unie thuo kerüchü di, “Puo cha nu avu ze di ketholeshü cako vatshapie avu kieketuo ki avu nou leloupfütuo zo mo me?” ibata.

³³Süsie unie bavüdo süu nu sielie di la Jerusalem nu vorta tse pethakelie kerepuoko sünu nu kekreimiako sa ze di ba.

³⁴Sidi uko kerüchü di, “Niepuu rheilasieta ketho zo, mu puo Simon rei pengushü zowe!” si ba.

³⁵Sitse unie rei chau nu ketuo ki kedipuo chüte shikecü mu Niepuu niekhrüda bietshiekeshü ki kimhie di puo siliete shikecü dzepie pushü.

³⁶Siro uko hau dze kerüchü tuokecü nu, Jisu vor uko donu thalie di sie uko ki, “Nieko Keviu chüliecie” sishü.

³⁷Sitse uko temi puo ngu zo ükecü le di michie kemerie chüta.

³⁸Sitse puo uko ki, “Nieko kiüdi michieta ga? Kiüdi nieko nou hade puo kenoudota ga?

³⁹A phi a dzieko meholie, sidi a zo ükecü siliecie. A bieshü di siliecie, kekreilamonyü temi zowe a kemhie di puochü puoru baya mo” sita.

⁴⁰Puo hau pushü di puo phi puo dzie pie uko pekieshü.

⁴¹Siürei ukoe u ngo mu u keneipfü pelelie mo ba zota, süla puo sie uko üse, “Nieko kecüca huo ba me?” ishü.

⁴²Sitse uko khuo chapie keba khrie puo pie puo tsüshü,

⁴³Sitse puo süu pielie di uko mhingu kinu cülieta.

⁴⁴Süsie puo uko ki, “Mha hako pete a nieko ze keba ki nu, Mosa zhonu, siedzekesiko leshü nu mu Chieliko nu a dze thupiekezhüko pete chü tseilie morosuo” ükecü pukeshü a die zo.

⁴⁵Sidi puo uko nou chüphreipie uko bu Ketholeshü cako silieketuo chüshü,

⁴⁶Süsie puo uko ki, “Hakemhie thupiezhü, Khrista bu kemezhieshü di zha se nhie kesia nunu rheilasielietuo,

⁴⁷mu puo zanu thenoukedikecü, tsiu kejokephoumako vapie tsüketuo dze Jerusalem nunu sede di seyie neiüko ki pethashülie morosuo.

⁴⁸Nieko mha hako zhapuko zo.

⁴⁹Siro, a a Puoe khashütuo üdi phrapiekezhüu ketsepie nieko tsütuo. Derei nieko pesogeinu kekuo ngulie kemochie nadiu nu pfhe ba zoliecie” sishü.

⁵⁰Süsie puo uko ze Bethani ketso vo di, sünu nu puo dzienie chasie di japie uko tsü.

⁵¹Siro puo japie uko tsü ketha ki uko ze kekhota, sidi puo ze teigei khota.

⁵²Siro uko puo rüsuota, tsiu uko neipie mhapuochü di la Jerusalem nu vota;

⁵³sidi uko rüsuoki nu Ukepenuopfü tshe rei ba zota.[46]